Jeremia 2 - Mukanda Wa Zambi 1970

Zambi yafunga Aisraele

¹ Mwene Zambi yangwamba

² ngulweze akwa Yerusaleme eswe maliji wano ngwenyi: “Ngunewuluka kushishika che ha ukweze we, ni chize twalizangile ha matangwa atangu a umbachiso wetu; yiungukaula mu puya, mu chifuchi chize kaakuwile mbuto.

³ Israele, yena te uli wa yami wika; wabwile mutu wami wa linanga. Natumine lamba ni misongo kuli mweswe yoze wakulingile chibi. Yami Mwene Zambi nachamba.”

Mulonga wa tushakulu twa Aisraele

⁴ Yenu vungu lia Israele banjikenu ku maliji a Mwene Zambi.

⁵ Kanambe ngwenyi: “Chibi chika tushakulu twenu amwene muli yami? Mba chika chaakatwishile ni kungumba yami nyima? Yaakombelela mahamba amokomoko, mba yaalumuka atu amokomoko.

⁶ Kaangwalwile ko ngwe Chuma, chibwe naalamwinyine ku Egiptu ni kwasongwela mu puya, chifuchi cha masekeseke ni mena, chifuchi cha pwila ni kole ni woma, kuze kukushi mutu niumwe chibwe kwendangana mo.

⁷ Yingwaneha mu chifuchi cha chinuno, ni kuwahilila ni mihuko yami ni yuma yikwo yibema. Alioze chifuchi chize naahele; yaachibihisa, yaachipwisa chamokomoko.

⁸ Mahako kaahulile ko ngwo: ‘Mwene Zambi kulihi ali?’ Mahako ja yami mwene kaangunyingikine ko. Akwa kuyula yaangukatukila, akwa munanyi yaahanjika munanyi mu jina lia zambi Bale, yaakombelela mahamba.

Mwene Zambi yasuma atu jenyi mulonga

⁹ “Chenacho yami Mwene Zambi, mungusuma nawa atu jami mulonga. Mungusuma nawa akwa vungu lie mulonga.

¹⁰ Achiyenu ku chitokelo ku hongo lia Shipre, tumenu umwe mutu ku chivumbuko achihengule ku chifuchi cha Kedare. Kumunumona ngwenu, chuma chino haanga kanda chibwa kama chize ku Ubutukilo.

¹¹ Kukushi vungu nilimwe lize haasumbakenya mazambi jo, chibwe kaabwile ko mazambi amwenemwene. Alioze atu jami haangusumbakenya, yami Zambi mulemu, ni mazambi waze kaahashile kwalingila Chuma nichimwe.

¹² Kashika yami Mwene Zambi ngunambila lilu ngwami: ‘Yena lilu chikima, lishimwoke, ivwa woma.’

¹³ Mumu atu jami haavulumuna milonga yaali: haangwehuka yami shima lia meya akekema; haalifulila mashima, mashima waze ali ni miaji, kumwahashile kubwa meya.

Lamba lia Aisraele mumu ha uhulia wo

¹⁴ “Kuma Israele kali ndungo, hanji kasemukinyine mu undungo, nyi? Kuchi mba akwa kole jenyi anamuzombo chichize?

¹⁵ Yaamukenanyina ngwe tambwe, chifuchi chenyi yaachipwisa puya, yeenyeka yihunda yenyi, yiiyalumuka yikulu.

¹⁶ Malunga a ku membo ja Memfise ni Tapane haamulokola mutwe.

¹⁷ Israele, yena mwene walikokela yino yeswe! Wangwehuka yami, Mwene Zambi, Zambi ye, muze nakusongwelele mu jila.

¹⁸ Yika muufumbula ha kuya ku Egiptu, hanga ukanwe meya a lwiji Nile, nyi? Yika muufumbula ha kuya ku Asuria, hanga ukanwe meya a lwiji Ufrateze, nyi?

¹⁹ Muukamona lamba mumu ha ungulungulu we, muukalihiza ha kungwehuka. Alioze muukanyingika ngwe, chili chibi chahiana kungwehuka yami, Mwene Zambi, Zambi ye, kungulemesa nawa ka. Yami Mwene Zambi Mukwa Ndundo Jeswe nachamba.”

Israele yalituna kuwayila Mwene Zambi

²⁰ Mwene Zambi kanambe ngwenyi: “Israele, hasuku walitunyinine chiyulo chami; hiunalitunu kungwononokena ni kunguwayila. Ha milundu yeswe, ni mushi lia mitondo yeswe ya wisu, te wakuwayila mazambi a utanji.

²¹ Nakutumbile ngwe mutondo wa vinyu, wa mbuto yibema yahiana. Alioze achitala chize hiwabwa haliabwila! Hiwabwa ngwe mutondo wa vinyu wamokomoko uze hiwabola.

²² Chibwe usane ni savo (sabau) ya tachi, hindu luchisa wa shili ye mungumumona.

²³ Ngwe kuchi muuhasa kwamba ngwe, chalingile chibi; nawa ngwe, kuwakombelele ko hamba Bale? Achitala chize hiunavulumuna mu chikulo; achitala chize hiwalinga. Yena uli ngwe chihwo cha kamelu yoze unafupu kuji yoze unazomboka sali ni sali mu puya.

²⁴ Muze anafupu kuji iya mahasa kumuhilwisa? Kuji niumwe yoze unamuzange mamona lamba mumu chihwo kanamufupu.

²⁵ Israele tala kanawa, nyi ka, muwivwa molu yikola, hanji kwivwa pwila ni kukaula nikawashi mazambi eka. Alioze wakwamba ngwe: ‘Ka! Chahashile kwalumuna nawa. Hingunazange mazambi a tundaka, enoo mungukaula kwami.’ ”

Chinalite kumwesa Aisraele lamba

²⁶ Mwene Zambi kanambe ngwenyi: “Ngwe chize mwiji akwivwa sonyi muze haamukwata, Chenacho nawa yenu Aisraele eswe munukevwa sonyi: mianangana ni akwa lutwe, ni mahako, ni akwa munanyi jenu.

²⁷ Yenu eswe munukevwa sonyi, yenu nwakwamba ngwenu, mutondo uli tatenu, nawa ngwenu, liwe lili noko. Chenacho muchikabwa mumu hiwangwehuka. Alioze muze munukabwa mu lamba, munukangutambika nawa ngunulamwine.

²⁸ “Mazambi jenu waze nwalisongelele yenwene, kuli ali? Muze munubwa mu lamba, hianukwase, nyi kumaahasa! Yuda yenu nuli ni mazambi anji ngwe membo jenu.

²⁹ Mba kunenganyana che chaka? Mumu yika hiwangukatukila?

³⁰ Hingunakumwesa lamba, hindu ngwe Chuma chamokomoko, kuushi kuzanga ngukufumbe. Hiunashihi akwa munanyi je ngwe chize akulinga tambwe.

³¹ Yenu Aisraele, banjikenu ku liji liami. Kuma hinabwa ngwe muya kuli yenu, ngwe chifuchi cha milima ni cha utoji, nyi? Mumu yika mba nwakwamba ngwenu, munulinga cheswacho chinanuwahila, kunuchikahiluka nawa nichimwe kuli yami?

³² Kuma mwana pwo mavulama yuma yenyi ya uhenya, nyi? Hanji nandungi mavulama kuzala mahina jenyi a undungi, nyi? Alioze atu jami haananguvulama matangwa anji, kuhasa kwaalula nawa ka.

³³ Chamwenemwene nuli ngwe pwo yoze Unanyingika kanawa kukaula akwa zango lienyi. Chibwe mapwo yitanji mahasa kulilongesa kuli yenu.

³⁴ Chikwo nawa, mahina jenu haasapukila manyinga ja yiswale ni waze keeshi yitela, hi manyinga ja akwa kulokola mazuwo ko.

³⁵ “Kunwakwamba ngwenu: ‘Kutushi kwetu mulonga; Zambi keshi kutuvwila nawa ufwatulo.’ Alioze yami Mwene Zambi, mungunumwesa lamba mumu nwakulisamba ngwenu, kutushi kwetu mulonga.

³⁶ Mumu yika nwakukaula jila yeka nikawashi? Akwa Egiptu maakanukolesa sonyi ngwe chize alingile Aasuria.

³⁷ Munukakatuka ku Egiptu ni suswa mutwe. Yami Mwene Zambi, mungulituna eswe waze nwakujikijila; kunuchi kufumbula nichimwe kuli ayo.”