Jeremia 19 - Mukanda Wa Zambi 1970

Mulondo uze wafwa

¹ Mwene Zambi yangwamba nguye ni kulanda mulondo wa uma. Yangwamba nawa nguye ni amwe makulwana ja Aisraele ni mahako,

² tutuhuke ku chikolo cha Chiyo cha Ndeho (yimbia) nikuya ku chikulo cha Hinome, hanga ngwambujolele ko maliji waze iye mangulweza.

³ Mwene Zambi yangulweza ngwenyi, amba ngwe: “Yenu mianangana ja Ayuda ni akwa Yerusaleme, banjikenu chize yami Mwene Zambi Mukwa Ndundo Jeswe, Zambi ya Israele, ngunambe. Munguneha lamba liahiana homa hano; mweswawo machivwa malishimwoka.

⁴ Munguchilinga mumu atu haangwehuka ni haanabihisa homa hano ni kulambula mulambu kuli mazambi eka; mazambi waze te kaanyingikine ko, chibwe ayo, chibwe tushakulu two, chibwe mianangana ja Ayuda. Haanazalisa homa hano ni manyinga ja atu waze keeshi mulonga,

⁵ haanatungila hamba Bale yilumbilo ya kwocha ana jo ngwe milambu. Chuma chize yami chaalwezele ko achilinge, chibwe chachinyongene ko.

⁶ Kashika, matangwa kumeeza muze atu keechi kuvuluka homa hano nawa ngwo, Tofete, chibwe chikulo cha Hinome. Alioze ngwo, chikulo cha Chishihilo.

⁷ Homa hano he mungusulishila manyonga eswe ja Ayuda ni akwa Yerusaleme. Mungushinjika akwa kole jo kwakumba ni kwashiha mu jita. Mijimba yo maayilia kuli tujila ni kuli tushitu a mu yambu.

⁸ Mungumwesa limbo lino lamba liahiana; mweswawo mabalika ho makomoka ni kulishimwoka.

⁹ Akwa kole maaseleka lie limbo ni kushiha atu jamo. Lamba linji mulibwa mo, mba atu maalilia ene, maalia chibwe ana jo ene.”

¹⁰ Mba Mwene Zambi yangwamba ngushihe we mulondo ku meso ja atu waze ayile hamwe ni yami,

¹¹ ni kwalweza maliji ja Mwene Zambi Mukwa Ndundo Jeswe ngwenyi: “Mungushiha atu wano ni kwonona limbo lino ngwe chize mulondo uno hiwabalwoka, kaahashile kuutenga nawa. Atu maafunda afu jo chibwe mu Tofete, mumu keechi kumona homa hakwo ha kwafunda.

¹² Mwene Zambi kanambe ngwenyi: Mungupwisa mianangana atu wano ni limbo lino ngwe Tofete.

¹³ Mazuwo ja Yerusaleme ni ja Ayuda, ni mazuwo eswe haze akwochela yitumbo ya vumba libema ku matongonoshi ni haze akuzujila vinyu ya milambu kuli mazambi eka, ayo eswe kumaakabwa ngwe Tofete.”

¹⁴ Mba yingukatuka ku Tofete, kuze Mwene Zambi angutumine ni kwambujola maliji jenyi. Yingumana mu yiize ya zuwo lia Zambi. Yingulweza atu eswe

¹⁵ maliji ja Mwene Zambi Mukwa Ndundo Jeswe, Zambi ya Aisraele, ngwenyi: “Munguneha lamba heswe lize nambile ha limbo lino ni ha membo eswe akusulangana, mumu nuli akwa pami, kunushi kubanjika ku maliji jami.”