Jeremia 18 - Mukanda Wa Zambi 1970

Jeremia ku zuwo lia tengi

¹ Mwene Zambi yangwamba ngwenyi:

² “Palumuka ku zuwo lia tengi, kwenako mungukulwezela maliji jami.”

³ Mba yinguya ko, yingumona mwe tengi kanahondangana milimo yenyi.

⁴ Muze ye ndeho (yimbia) kuyabemene kutenga, yayibuzula, yayitenga Chuma chikwo.

⁵ Mba Mwene Zambi yangwamba ngwenyi:

⁶ “Kuma chahashile kulinga ni yenu Aisraele ngwe chize tengi analingi ni uma, nyi? Yenu nuli mu moko jami ngwe chize uma uli mu moko ja tengi.

⁷ Lieswe tangwa mungwambila limwe vungu ngwami, mungunwonona ni kuchina chifuchi chenu.

⁸ Alioze nyi vungu lize muliecha kulinga yibi, ni yami chichi kwalinga yibi.

⁹ Hanji limwe tangwa mungwambila limwe vungu ngwami, mungunwokesa nubwe anji.

¹⁰ Alioze nyi lie vungu liangukolema ni kulinga yibi, chichi kwalinga ngwe chize nambile.

¹¹ Kashika haliabwila, lwezenu Ayuda ni akwa Yerusaleme ngwami, ngunalulika kulimika no nikwamwesa lamba. Alweze alumuke, alitwamine kulinga yibi.

¹² Ayo kumaakumbulula ngwo: ‘Ka, mumu yika chatutamba kwecha kulinga yibi? Mutubwa lume akwa pami, mutulinga yibi yeswe yize tunazange.’ ”

Atu yaalituna Mwene Zambi

¹³ Mwene Zambi kanambe ngwenyi: “Hula mavungu eswe nyi Chuma ngwe chino hichinabu kama limwe tangwa. Aisraele haalinga Chuma chibi kuhiana!

¹⁴ Kuma milundu ya mawe ya Libano kuyakuhona chiwe (neve), nyi? Kuma lwiji wayo kakuma, nyi?

¹⁵ Alioze atu jami haananguvulama; kaakwochela yitumbo ya vumba libema ku mahamba. Haanatalinga mu jila yize chaatamba kuya. Keeshi kwenda nawa mu majila akulu; alioze kaakwenda mu majila ja ayo ene mu milambo.

¹⁶ Chifuchi chino haanachipwisa cha mwongo, hichinabu Chuma chamokomoko kuli atu ku miaka yeswe. Eswe waze maakabalieka ko maalisozwola ha chize anamono; maahunga mitwe yo ni kulishimwoka.

¹⁷ Mungumwangina atu jami ku meso ja akwa kole jo, ngwe chize fufuta yaakuhehuka ni fuji ya ku chivumbuko. Mungwoomba nyima; muze lamba muliza hali ayo chichi kwakwasa.”

Aisraele yaatwama Jeremia punga

¹⁸ Mba atu yaamba ngwo: “Tuyenu tutwame Jeremia punga! Matangwa eswe mutubwa ni mahako akutulongesa, ni akwa mana akutuyula, ni akwa munanyi akwambujola maliji a Zambi. Tumusumenu mulonga, kanda tumubanjika nawa.”

¹⁹ Kashika nalembele ngwami: “Mwene Zambi, banjika kama yize ngunambe ni yize akwa kole jami anangwambe.

²⁰ Kuma chatamba kuhilwisa chibi ku chibema, nyi? Haangufulila umbu nguholokele mo. Iwuluka kama chize nejile kuli yena ni kwahakwila, hanga yena mu ufwatulo we kuwalingile ko chibi.

²¹ Alioze Mwene Zambi, haliabwila, shiha kama ana jo ni zala; afwile kama mu jita. Mapwo apwise kama tuliwa, shiha kama ana jo; malunga afwe kama ni misongo ni akweze afwile kama mu jita.

²² Tuma kama akwa kububa mazuwo jo susumuku; ashinjike atete ni mwongo. Haangufulila umbu nguholokele mo, haangutela miheto ngufwe mo.

²³ Alioze yena Mwene Zambi, Unanyingika punga jo jeswe ja kungushiha. Kanda wakonekena kama ungulungulu wo ni mulonga wo. Anungune kama ni utenu we ni kwabatwola.”