Jeremia 17 - Mukanda Wa Zambi 1970

Shili ya Ayuda ni lamba lio

¹ Mwene Zambi kanambe ngwenyi: “Yenu Ayuda, shili yenu hanayisoneka ni sonekeso ya utale; hanayolo ni liama ha mbunge jenu ni ha mbinga ja yilumbilo yenu.

² Atu jenu kaakuwayila ku yilumbilo ya ku miyombo ya zambi wa pwo Ashera, ni ku mutondo weswe wa wisu, ni ha mindundena,

³ ni ha milundu ya mu chana. Mungushinjika akwa kole jenu akabube yikumba yenu ni ubite wenu weswe mumu ha milonga yeswe yize hinwalinga mu chifuchi cheswe.

⁴ Kumunutokesa chifuchi chize nanuhele, kumunulingila akwa kole jenu mu chifuchi chize kunwanyingikine, mumu utenu wami uli ngwe kahia kaze mukalekwoka ku miaka yeswe.”

Longeso lieka ni lieka

⁵ Mwene Zambi kanambe ngwenyi: “Munguhisa mutu yoze wakungwehuka, ni kujikijila hali atu ni ha tachi ja mukwa hashi.

⁶ Kali ngwe chibuta cha mu puya, chize chinasoko mu puya ha mavu omu, ha mavu a mungwa haze kuheshi kusoka chimwe chikwo. Mutu yoze keshi kuyuka nichimwe.

⁷ “Alioze munguwahisa mutu yoze wakujikijila hali yami.

⁸ Kali ngwe mutondo wakutumba hehi ni meya, miji yawo yakutanda ndoo ku chitwetwe. Kuuchi kulela muze changa muchiza, mumu mafwo jawo maasala a wisu; kuushi kulela muze vula keshi kunoka; kuushi kulitwamina kwima mihuko.

⁹ “Iya mahasa kunyingika mbunge ya mutu? Kuyakwonga kuhiana yuma yeswe yikwo. Yili yibi kuhiana, kaahashile kuyiwuka.

¹⁰ Yami, Mwene Zambi, nakushishika manyonga ja atu ni kweseka mbunge jo. Nakulinga kuli mutu mweswe nikulita ni ndako yenyi, nikulita ni chize akulinga.”

¹¹ Mutu yoze wakufumbula ubite ni uhenge, kali ngwe kajila yoze unautamina monda waze kombile ko. Makatokesa ubite wenyi muze te achili ni tachi, ku songo makabwa lume chihepuke.

¹² Zuwo lietu lia Zambi lili ngwe chitwamo cha uhenya, chize chatwama ha mulundu usuku chize ku Ubutukilo.

¹³ Mwene Zambi yena uli yoze Aisraele asa mbunge. Eswe waze akukwehuka kumeevwa sonyi. Kumaakatoka ngwe majina waze haanasoneka mu fufuta, mumu haanangwehuka, Yena Mwene Zambi, shima lia meya akekema.

Jeremia yahula Mwene Zambi kumukwasa

¹⁴ Mwene Zambi, nguwuke kama mba nguhinduke liakulu; ngulamwine kama mba nguwahe. Yena uli yoze nakuchichimieka!

¹⁵ Atu kaakunguhula ngwo: “Lamba lize Mwene Zambi anazange kutumwesa lilihi mba? Kachi atumwese lio haliabwila!”

¹⁶ Alioze, Mwene Zambi, chakushinjikile nichimwe kwamwesa lamba; Chazangile ayo amone lamba. Mwene Zambi yena unachinyingika; Unanyingika chize nambile.

¹⁷ Kanda unguvwisa mwongo; mumu yena uli chiswamo chami ha matangwa a lamba.

¹⁸ Mwene Zambi vwisa sonyi waze akunguhungumiona, alioze yami ka. Evwise mwongo, alioze yami ka. Amwese lamba, abatwole yipinji yipinyi.

Fungenu tangwa lia kuhwima

¹⁹ Mwene Zambi yangwamba ngwenyi: “Jeremia, yako ulweze maliji jami kuli waze akubalika ku chikolo cha Atu, chikolo chize mianangana ja Ayuda akunjilila mu limbo ni kutuhuka. Mba yako ku yikolo yeswe yikwo ya Yerusaleme.

²⁰ Lweza mianangana ja Ayuda ni atu eswe waze atwama mu Yerusaleme, waze akunjilila mu yikolo yino, abanjike yize ngunahanjika.

²¹ Alweze ngwe, nyi kaanazange mwono wo, kanda ambata yuma yilemu ha tangwa lia kuhwima; hanji kunjila nayo mu yikolo ya Yerusaleme,

²² hanji kwanda chimwe Chuma ku mazuwo jenu ni kuchitwala kweka ha tangwa lia kuhwima. Kanda alinga milimo ha tangwa lia kuhwima; alifunge mumu lili tangwa lia chijila, ngwe chize nalwezele tushakulu two.

²³ Tushakulu two kaangubanjikile ko hanji kaakanyamine ko. Kaangusele ko mbunge, alioze yaabwa akwa pami; kaangwononokenene ko chibwe kwivwa longeso liami.

²⁴ “Lweza atu wano ngwe, chaatamba kwononoka ku Shimbi jami jeswe. Kanda ambata yuma yilemu ni kunjila nayo mu yikolo ya limbo lino ha tangwa lia kuhwima. Afunge tangwa lia kuhwima mumu lili lia chijila, kanda alinga ho milimo niyimwe.

²⁵ Hohene mianangana jo ni miata jo maanjila mu yikolo ya Yerusaleme, mba maabwa ni tachi ja wanangana jize abwile najo David. Ayo hamwe ni Ayuda ni akwa Yerusaleme meendela ha matemba ni ha tuvwalu, limbo lino mulikazala ni atu matangwa eswe.

²⁶ Atu maakeza a ku membo ja Ayuda ni a ku yihunda yize yajingilika Yerusaleme. Maakeza ni a ku chifuchi cha Benjamine, ni a ku mindundena, ni a ku milundu, ni a ku sude mu Yuda. Kumaakaneha milambu ya kwocha ni yawana, ni milambu ya mbuto ni ya maji a vumba libema, ni milambu ya kusakwila.

²⁷ Alioze angwononokene ni kufunga tangwa lia kuhwima mumu lili lia chijila. Kanda anjila ni yuma yilemu mu yikolo ya Yerusaleme ha tangwa lize, mumu nyi maachilinga, mungwocha yajilo ya Yerusaleme, ni mazuwo ja mianangana mu Yerusaleme, niumwe kechi kahasa kusala mo.”