Jeremia 16 - Mukanda Wa Zambi 1970

Manyonga ja Mwene Zambi hali Jeremia

¹ Mwene Zambi yangwamba nawa ngwenyi:

² “Kanda umbata pwo hanji kusemena ana hano.

³ Ngunakulweze yuma yize muyibwa kuli waze maasemukina hano ni kuli e yisemi jo.

⁴ Kumaafwa ni musongo ubi, mutu niumwe kechi kwalila hanji kwafunda. Mijimba yo maayilumbika yingina hashi ngwe pinga. Kumaafwa ni jita ni zala; mijimba yo muyibwa kulia cha tujila ni tushitu a mu yambu.

⁵ “Kuchakutambile kunjila mu zuwo lize analili mufu. Kanda unenganyana hali niumwe. Chichi kuwahisa atu jami ni kwaha uhwimino hanji kwalweza zango ni keke.

⁶ Pichi ni yiswale kumaafwa mu chifuchi chino, alioze niumwe maalila hanji kwafunda. Niumwe malilemeka hanji kulitewula kawewe ni kusoloka ngwo, kanafwisa.

⁷ Niumwe kechi kulia hanji kunwa hamwe ni yoze hafwisa hanga amulembejeke, chibwe yoze hafwisa tato hanji naye.

⁸ “Kanda unjila mu zuwo lize atu anali chiteleka. Kanda utwama hamwe no ni kulia ni kunwa.

⁹ Banjika yize yami Mwene Zambi Mukwa Ndundo Jeswe, Zambi ya Aisraele, ngunambe. Mungukolesa maliji a chiseke ni uwahililio ni maliji a kulikwiza mu yiteleka ya umbachiso. Atu wano kumaamona yuma yino.

¹⁰ “Muze muwalweza yuma yino yeswe, kumaakuhula ngwo, mumu yika Mwene Zambi habatula kutumwesa lamba libwahaha? Kumaakuhula nawa ngwo, yibi yika twalingile Mwene Zambi, Zambi yetu?

¹¹ Mba muwakumbulula ngwe, Mwene Zambi kanambe ngwenyi: ‘Tushakulu twenu angumbile nyima, yaakombelela mahamba ni kwalingila, yaangwehuka ni kulituna longeso liami.

¹² Alioze ubi wenu unahiana uze wa tushakulu twenu. Nuli akwa pami kanda yingulungulu, kunushi kungwononokena.

¹³ Kashika mungukanuhanga mu chifuchi chino ni kunutwala ku chifuchi cheka chize tushakulu twenu kaachinyingikine ko. Kwenako munukalingila mazambi eka mwalwa ni ufuku, chichi kanuvwila keke niyimwe.’ ”

Kuhiluka cha Aisraele

¹⁴ Mwene Zambi kanambe ngwenyi: “Tangwa kulineza lize Aisraele keechi kalishinga nawa ni jina lia yami Zambi ya mwono yoze waatuhwishile mu chifuchi cha Egiptu.

¹⁵ Alioze maalishinga ni jina lia Zambi ya mwono yoze watuhwishile Aisraele mu chifuchi cha ku norde ni mu yifuchi yeswe yikwo kuze naamwanginyine. Mungwahilwisa mu chifuchi cho ene, chize nahanyine kuli tushakulu two. Yami, Mwene Zambi, nachamba.”

Lamba lize muliza

¹⁶ Mwene Zambi kanambe ngwenyi: “Mungutambika atu anji akwa kuta yishi eze oze atu wano. Mba mungutuma nawa mayanga anji ni kwashihila ha milundu ni ha mindundena yeswe ni ku yivwenge ya mawe.

¹⁷ Mumu hinamona yeswe yize akulinga. Chuma nichimwe kuchaswamine ku meso jami; milonga yo kuyisolo kuswama ku meso jami.

¹⁸ Mungwamba afwete mulonga wo ni ungulungulu wo yisuho yaali, mumu haanachisa chifuchi chami ni mahamba jo waze haanalumbika ngwe afu, ni hanachizalisa ni mazambi jo amokomoko.”

Jeremia yalemba kuli Mwene Zambi

¹⁹ Mwene Zambi, yena wika wakungufunga ni kungutakamisa; wakungukwasa ha matangwa a lamba. Mavungu maakakatuka ku mbango jeswe ja hashi ni kwamba ngwo: “Tushakulu twetu abwile ni mazambi amokomoko lume, kaafumbwile ko nichimwe.

²⁰ Kuma mutu mahasa kulilingila mazambi jenyi, nyi? Ka, nyi machilinga keechi kabwa mazambi.”

²¹ Mwene Zambi kanambe ngwenyi: “Kashika, ha chisuho chimuwika mungukanyingikisa mavungu chiyulo chami ni ndundo jami; mba maakanyingika ngwo, kuma nguli Mwene Zambi.”