Jeremia 15 - Mukanda Wa Zambi 1970

Lamba lize muliza hali Ayuda

¹ Mba Mwene Zambi yangwamba ngwenyi: “Chibwe Mose hanji Samuel amane ku meso jami ni kungulembejeka, hindu atu wano chichi kweevwila keke. Akatwise ku meso jami, aye kwo.

² Muze maahula ngwo: ‘Kulihi chatutamba kuya?’ Alweze ngwe: ‘Mwene Zambi kanambe ngwenyi: Atu waze chaatamba kufwa ni misongo, kumaafwa ni misongo; waze chaatamba kufwa mu jita, kumaafwa mu jita; waze chaatamba kufwa ni zala, kumaafwa ni zala; waze chaatamba kuya mu zuwo lia lamba, kumaaya mo!’

³ Yami, Mwene Zambi, hinabatula ngwami, lamba liwana maamona: maashiha mu jita, mijimba yo maayikoka kuli tuwa, tujila maayilia ni tushitu kumaalia yize muyisala.

⁴ Akwa hashi eswe maalishimwoka mumu hali ayo, mumu ha yize Manase mwana wa Hezekia mwanangana wa Ayuda alingile mu Yerusaleme.”

⁵ Mwene Zambi kanambe ngwenyi: “Yenu akwa Yerusaleme, iya manuvwila kama keke, iya manutetekela kama? Iya manuhula kama mumu ha lamba lize nunamono?

⁶ Yenu hinunangwehuka; hinunangumbu nyima. Ni yami hingunolola kwoko liami nikunufwenya mumu hijinanguhu kunukonekena.

⁷ Mu yihunda yeswe hinanufuza ngwe mwambu. Hingunanushihi yenu atu jami, hingunashihi ana jenu, mumu kunwechele ko kulinga yibi.

⁸ Mu chifuchi chenu himwabwa tuliwa anji ngwe masekeseke ku mbumbulu ya kalunga lwiji. Hinashiha akweze jenu waze te achili ni tachi jo, ni kumwesa anaye lamba. Susumuku yingwamwesa lamba ni mwongo.

⁹ Mama yoze hasema ana shimbiali halezumuka, kanatwimashana. Kuli iye tangwa kulialumuka milima; hamona lamba, hasauka. Mungutayiza akwa kole jenu kushiha waze asala ni mwono. Yami, Mwene Zambi, nachamba.”

Jeremia yalinyenga

¹⁰ Mama lamba liamiee! Mumu yika mama angusemenene kwami? Changutamba kuzwela kwami ni atu eswe mu chifuchi. Chasondamishine mbongo hanji kusondama kuli umwe mutu, hindu atu kaanangushingi.

¹¹ Mwene Zambi, mashingo jo eswe akunduluke hali yami nyi Chishi kukulingila kanawa, hanji nyi Chishi kuhakwila akwa kole jami kuli yena muze akubwa mu luyinda ni mu lamba.

¹² (Mutu niumwe mahasa kumakuna utale, chibichibi utale wa ku norde uze wakuchinga ni unengu.)

¹³ Mwene Zambi yangwamba ngwenyi: “Mungutuma akwa kole abube ubite ni yikumba ya atu jami ni kwamwesa lamba mumu ha milonga yize nwavulumwine mu chifuchi.

¹⁴ Mungwapwisa akwa kulingila akwa kole jo mu chifuchi chize kaanyingikine, mumu ufwatulo wami uli ngwe kahia, kumukalekwoka ndoo ku miaka yeswe.”

¹⁵ Mba yami yingwamba ngwami: “Mwene Zambi, yena Unanyingika. Ngwiwuluke kama, ungukwase. Ngukale kama kuli waze akunguhungumiona. Kanda ulihumikiza no angushihe. Iwuluka ngwe haanangushililika mumu hali yena.

¹⁶ Hiwanguhanjikisa, ni yami hinevwa maliji je eswe. Mwene Zambi Mukwa Ndundo Jeswe, nguli niwe, kashika maliji je haanguwahisa.

¹⁷ Te Chishi kuhwisa matangwa jami nikutwama ni atu, ni kusehejela. Yingwononokena maliji je, yingubwa ukawami, yingwivwa wuli unji.

¹⁸ Mumu yika ngunamwena lamba lino? Mumu yika yikola yami kuyisolo kuhwa? Mumu yika Chishi kuhinduka? Kafwa unangupwisa ngwe chitwetwe chize muchuma ha changa, nyi?”

¹⁹ Mwene Zambi yakumbulula ngwenyi: “Nyi wahiluka, mungukutambula, mba muubwa nawa kavumbi kami. Nyi ngwe wahanjika umwenemwene, hi maliji amokomoko ko, mba muubwa nawa mukwa munanyi wami. Atu maatalikisa kuli yena, hi yena ko muutalikisa kuli ayo.

²⁰ Mungukupwisa ngwe mbango ya zuwo hakutwala kuli ayo. Atu wano maazwela ni yena, alioze keechi kukukumba. Mungubwa hamwe ni yena ni kukufunga utwame kanawa.

²¹ Mungukulamwina ku moko ja yingulungulu ni akwa kushiha atu. Yami, Mwene Zambi, nachamba.”