Jeremia 14 - Mukanda Wa Zambi 1970

Changa chinene

¹ Mwene Zambi yangulweza hakutwala ku changa chinene ngwenyi:

² “Yuda kanalili; yihunda yenyi yinafu, atu jenyi kaanabombo hashi ni kulinyenga, Yerusaleme kanakololoka hanga amukwase.

³ Pichi kaakutuma akwa milimo yo kwatahila meya. No kaakuya ku mashima, alioze meya keeshiko; kaakuhiluka ni swaha ja ubolongo. Kaakwivwa sonyi ni kulekumuka, kaakuhetamina hashi.

⁴ Njimi no kaakumona lamba. Kaakulikwata suswa mutwe mumu vula kasolo kunoka; hashi heswe hihoma chau.

⁵ Chibwe chihwo cha kai kanehuka mwanenyi, mumu yakulia kuyishiko.

⁶ Yimbulu a mu yambu kaakumana ha milundu ni kuhwilijela ngwe mikuza; meso jo haalaa mumu yakulia kuyishiko.

⁷ Atu jami kaakungulilila ngwo; ‘Mwene Zambi, chibwe hitunavulumuna, tukwase kama ngwe chize walakenyene. Hitunakwehuka yisuho yinji; hitunakuvulumuna.

⁸ Yena wika uli yoze Aisraele akusa mbunge; uli yoze wakutulamwina mu lamba. Kuchi mba hiwabwa ngwe chilambala mu chifuchi chetu, ngwe ngeji yoze mabomba tangwa limuwika wika?

⁹ Kuchi mba unasoloka ngwe mutu yoze haatungumuna, ngwe kajita yoze keshi tachi ja kulamwina? Mwene Zambi, chamwenemwene yena uli hamwe ni yetu! Tuli atu je, kanda utwehuka.’ ”

¹⁰ Mwene Zambi kanambe hakutwala kuli atu wano ngwenyi: “Kaanazange kungwehuka, kaasolo kulihumikiza. Kashika Chishi kuwahilila no. Kumungwiwuluka yibi yize haanalingi ni kwamwesa lamba mumu ha milonga yo.”

¹¹ Mwene Zambi yangwamba ngwenyi: “Kanda ungulembejeka hanga ngukwase atu wano.

¹² Chibwe alitwamine kulia, hindu chichi kubanjika ku kulila cho; chibwe angulambule milambu ya kwocha ni ya mbuto, chichi kuwahilila no. Alioze, mungwashihila mu jita, ni zala, ni misongo.”

¹³ Yami yingwamba ngwami: “Mwene Zambi Unanyingika chize akwa munanyi aakulongesa atu ngwo, yena wayilakenyene kukuchi kubwa jita hanji zala. Mu chifuchi mumukabwa lume uhwimino.”

¹⁴ Alioze Mwene Zambi yakumbulula ngwenyi: “Akwa munanyi kaakunguliongela, chaatumine kwami, hanji kwambila hanji kwalweza limwe liji. Usolwelo uze akulumbununa, hi wa kuli yami ko. Kuuli wa mahuza, yilota yamokomoko.

¹⁵ Yami, Mwene Zambi, ngunakulweze chize mungulinga kuli akwa munanyi waze chaatumine, hindu kaakuhanjika mu jina liami nikwamba ngwo, jita ni zala kuyichi kubwa mu chifuchi. Mungwashihila mu jita ni zala.

¹⁶ Atu waze akubanjika longeso lio no che maakafwa. Maambila mu majila a Yerusaleme, niumwe yoze maafunda. Chenacho mungulinga ayo eswe, ni mapwo jo, ni ana jo a malunga ni a mapwo. Mungwalinga nikulita ni ungulungulu wo.”

¹⁷ Mwene Zambi yangwamba nawa ngwenyi: “Jeremia lweza atu ngwe: ‘Nakulila ufuku ni mwalwa, chahashile kuhola, mumu atu jami haalemana chilonda chinene, haalemeka kuhiana.

¹⁸ Muze nakuya mu yambu, nakumona afu waze haashiha mu jita; muze nakuya mu yihunda, nakumona waze haafwa ni zala. Akwa munanyi ni mahako kaakulinga milimo yo, alioze yize akulinga kaayinyingikine.’ ”

Atu yaalembejeka Mwene Zambi

¹⁹ Mwene Zambi, kuma hiwalituna Ayuda liakulu, nyi? Atu ja Zione hiunavutwokela, nyi? Kuchi mba hiwatulamba chibi chichize, kuhasa ka kuliwuka? Te hitunase ko mbunge kubwa ni uhwimino, alioze chibema chakuhi nichimwe; hitunase ko mbunge utuwuke, alioze mwongo wika.

²⁰ Mwene Zambi, hitunakuvulumuna, tunashikisa milonga yetu kuli yena, ni milonga ya tushakulu twetu.

²¹ Iwuluka kama yilakenyo ye, kanda utulelesa; kanda ulelesa kama Yerusaleme, homa ha chitwamo che cha uhenya. Kanda ushiha Usendo uze hiunakolesa ni yetu.

²² Niumwe hakachi ka mazambi ja akwa mavungu mahasa kunokesa vula; chibwe lilu linene kuliahashile kunokesa vula. Aa Mwene Zambi, Zambi yetu, twakusa mbunge kuli yena, mumu yena wika wakulinga yuma yino.