Jeremia 13 - Mukanda Wa Zambi 1970

Longeso lia kaputula

¹ Mwene Zambi yangwamba ngwenyi: “Yako ulilanjile kaputula wa hina lia lefuna Uzale, alioze kanda umusa mu meya.”

² Kashika namulanjile, yinguzala.

³ Mba Mwene Zambi, yangwamba nawa ngwenyi:

⁴ “Yako ku lwiji Ufrateze, usweke ko mwe kaputula mu liwe.”

⁵ Kashika nayile nikumusweka ku mbumbulu ya Ufrateze.

⁶ Kulutwe lia amwe matangwa Mwene Zambi yangwamba nguhiluke ku Ufrateze ni kwanda kaputula yoze.

⁷ Mba yinguhiluka ko, muze nahetele kuma kuze namuswekele, yingumumona habihia.

⁸ Mwene Zambi yangulweza ngwenyi:

⁹ “Chenacho mungukonona akwa kulengumuka a mu Yuda ni a mu Yerusaleme.

¹⁰ Yingulungulu wano kaangwononokenene ko. Te kaali akwa pami lume. Yaawayila nikulingila mazambi akwo. Kashika maakabwa ngwe kaputula yoze wamokomoko.

¹¹ Ngwe chize kaputula akukwata mu zalilo, te Chenacho nawa yami nakuzanga Aisraele ni Ayuda eswe kungulalaminya. Chino hinachilinga hanga abwe atu jami ni hanga anguchichimieke ni kulemesa jina liami; alioze kaasolo kungwononokena.”

Chikashi cha vinyu

¹² Mwene Zambi yangwamba ngwenyi: “Jeremia, lweza Aisraele ngwe, yikashi yeswe ya vinyu chatamba kuyizalisa ni vinyu. No maakumbulula ngwo: ‘Ewa, tunachinyingika.’

¹³ Mba walweza nawa ngwe, yami Mwene Zambi, munguzengewesa atu a ku chifuchi chino ni vinyu: mianangana, akwa vungu lia David, ni mahako, ni akwa munanyi, ni atu eswe a mu Yerusaleme.

¹⁴ Mba mungukabuba umwe ni mukwo ngwe yikashi, tushinakaji ni akweze. Mungukaashiha. Chichi keevwila keke, chibwe kwalweza utu.”

Jeremia yakanyamisa Aisraele mumu ha kulengumuka cho

¹⁵ Yenu Aisraele, Mwene Zambi hahanjika! Likehesenu, numubanjike.

¹⁶ Lemesenu Mwene Zambi, Zambi yenu, shimbu kanda achineha milima, shimbu kanda nutalinga ha milundu; shimbu kanda achalumuna pangu lize nwaselele ko mbunge kubwa milima bwii.

¹⁷ Nyi kunwabanjikile, mungulilila ku tenga mumu ha kulengumuka chenu; mungulila kuhiana, masoji jami maalundumuka mumu atu jami kaanatwama mu undungo.

¹⁸ Mwene Zambi yangwamba ngwenyi: “Lweza mwanangana ni naye akatuke ha yitwamo yo, mumu yipangula yo ya uhenya hiyaholoka ku mitwe yo.

¹⁹ Yihunda ya Yuda ya ku sude haanayajila, wakuhi niumwe yoze mahasa kuyazulula. Ayuda eswe haatwala mu undungo.”

²⁰ Yerusaleme, tala! Akwa kole je a ku norde kaanapalumuka! Atu waze akuhele kufunga ngwe mapanga kulihi ali?

²¹ Kuchi muukamba muze atu waze wanyongene ngwe kaali masepa je, haakukumba ni kaanakuyulu? Kumuubwa ni lamba ngwe pwo yoze unambe kusema.

²² Nyi muulihula ngwe: “Mumu yika yino yeswe yanguwana, mumu yika mahina jami haatanwoka ni haangulimbula ni tachi?” Mungwamba ngwami, mumu milonga ye yoka naye.

²³ Kuma mutu wa ku chifuchi cha Etiopia mahasa kwalumuna kowa lienyi, hanji kolwama mahasa kwalumuna yibeka yenyi, nyi? Nyi kumaahasa, kuma ni yenu waze nwakulinga yibi, munuhasa kulinga yibema.

²⁴ Mwene Zambi manumwanga ngwe chize fuji ya mu puya yakumwanga yiswaswa.

²⁵ Mwene Zambi kanambe ngwenyi, yenayo muyikabwa fweto yenu. Hanabatula kunulinga Chenacho, mumu hinunamuvulumuna, hinunashachila hali mazambi a mahuza.

²⁶ Mwene Zambi iye mwene mafukula mahina jenu ni kunukolesa sonyi.

²⁷ Hananumono nikulinga yuma yize akuvutwokela iye, ni chize nwakuya ni kuwayila mazambi eka ha milundu ni mu yambu, ngwe chize mutu akukaula pwo lia mwenyembo wenyi mu yambu, hanji ngwe kuji a kavwalu unahembeleza chihwo. Aa yenu akwa Yerusaleme, janukangana! Mwiji muka munukashikisa milonga yenu.