Jeremia 12 - Mukanda Wa Zambi 1970

Jeremia yahula Mwene Zambi yihula

¹ Mwene Zambi, nyi munguhamika ni yena, kachi yena muungukununa. Chibwe chocho ngunakuhula yihula hakutwala ku ululi. Mumu yika yingulungulu akuwaha? Mumu yika akwa uhenge akuyuka?

² Yena wakwatumba, no kaakutanda miji; kaakutatuka ni kwima mihuko. Kaakukuchichimieka shina ni kanwa; alioze mu mbunge keeshi kukuzanga.

³ Alioze Mwene Zambi, yena unangunyingika; Wakumona chize nakulinga, ni chize nakukuzanga. Chiza yingulungulu wano ngwe mapanga waze anaatwala ku chishihilo; waatulike ndoo ku tangwa lia kwashiha.

⁴ Chifuchi chetu ndoo tangwa lika muchuma? Mwambu wa mu minda yeswe ndoo tangwa lika muukoma? Tushitu ni tujila kaakufwafwa mumu ha ungulungulu wa atu jetu, e atu kaakwamba ngwo: “Zambi kechi kumona yize twakulinga.”

⁵ Mwene Zambi yamba ngwenyi: “Jeremia, nyi wakuhonga ha kuzomboka nikulimika ni atu, mba kuchi muuhasa kuzomboka nikulimika ni tuvwalu? Nyi kuwahashile kumanangana mu chana, mba kuchi muulinga mu mushitu hehi ni lwiji Yordau?

⁶ Chibwe ayayenu, akwa jiko lia yena mwene, haanakukunjika, haanalishingi kulimika ni yena. Kanda waafuliela, chibwe maahanjika ni yena maliji a kubebieka.”

Zambi yanenganyana mumu hali atu jenyi

⁷ Mwene Zambi kanambe ngwenyi: “Hinehuka Aisraele; hinalituna vungu lize natongwele. Atu waze te nakuzanga hinaakunjika mu moko ja akwa kole jo.

⁸ Atu jami waze natongwele haangukatukila; haangubwozela ngwe tambwe mu usaki, kashika hingunaavutwokela.

⁹ Atu jami waze natongwele kaali ngwe kajila mubema yoze yiselele haamuseleka ni kulimika nenyi. Tambika tushitu a mu yambu eze ku chiteleka.

¹⁰ Akwa kuyula anji a tundaka heenyeka munda wami wa vinyu; haaliachila mbuto yami hashi; chifuchi chami chibema haachalumuna puya.

¹¹ Haachenyeka; hichabwa chahululu ku meso jami. Chifuchi cheswe hichabwa puya, wakuhi niumwe yoze unachivwila chinyengo.

¹² Akwa kwonona kaanabalika ha milundu ya mu puya, akwa kuchonona heeza. Hinatuma jita ya kwenyeka chifuchi cheswe; niumwe mahasa kutwama mu uhwimino.

¹³ Atu jami haanakuwu tiriku, alioze hanabatula mbimbo; haanahondangana kuhiana, alioze kaanjile ko nichimwe. Mumu ha ufwatulo wami kaabwile ko ni mbuto.”

Chilakenyo cha Mwene Zambi kuli enyembo ja Aisraele

¹⁴ Mwene Zambi kanambe ngwenyi: “Nguli ni maliji hakutwala kuli enyembo abi waze heenyeka chifuchi chize nahele atu jami Aisraele. Yingulungulu waze mungukaatwala kusuku ni yifuchi yo, ngwe chize akutukula chibuta, mungukalamwina Ayuda ku moko jo.

¹⁵ Alioze muze hinaatwala kusuku, mungukeevwila nawa keke; mungukahilwisa vungu lieswe ku chifuchi chenyi, ni ku chihinga chenyi mwene.

¹⁶ Nyi maakatayiza ndako ja atu jami ni mbunge jo jeswe, ni maakalishinga ngwo: ‘Ni Mwene Zambi,’ ngwe chize abwile ni kulingesa atu jami kulishinga ni jina lia hamba Bale, mba no nawa maakabwa a ku mbunga ya atu jami; kumaakawaha.

¹⁷ Alioze nyi vungu limwe kulichi kwononoka, mungulinongesa liakulu ni kulionona. Yami Mwene Zambi nachamba.”