Jeremia 11 - Mukanda Wa Zambi 1970

Jeremia ni Usendo wa Zambi ni atu jenyi

¹ Mwene Zambi yangwamba ngwenyi:

² “Banjika ku Shimbi ja Usendo. Lweza Ayuda ni akwa Yerusaleme ngwe,

³ Mwene Zambi ya Aisraele hashinga mweswawo keshi kufunga Shimbi ja Usendo uno.

⁴ Uno we Usendo uze nakolesele ni tushakulu two muze naatuhwishile mu chifuchi cha Egiptu, chize chabwile ngwe lutemo kuli ayo. Yingwalweza hanga ononoke kuli yami ni kulinga yuma yeswe yize naalwezele. Yingwalweza ngwami, nyi maangwononokena, kumaabwa atu jami ni yami mungubwa Zambi yo.

⁵ Mba mungumanununa chilakenyo chize nalakenyene tushakulu two ni kwaha chifuchi cha chinuno chize ali nacho haliabwila.” Yingwamba ngwami: “Ewa Mwene Zambi.”

⁶ Mba Mwene Zambi yangwamba ngwenyi: “Yako mu membo ja Ayuda ni mu majila a Yerusaleme. Ukambujolele mo maliji jami ni kulweza atu abanjike Shimbi ja Usendo ni kujifunga.

⁷ Muze watuhwishile tushakulu two mu Egiptu yingwakanyamisa hanga angwononokene, nakwakanyamisa ndoo ni musono.

⁸ Alioze ayo kaabanjikile ko, koononokene ko. Alioze atu eswe yaanyongonona ni pami jo ni mu yibi yo ngwe hatangu. Te naambile afunge Usendo wami, alioze yaalituna kwo. Kashika yingwakokela lamba heswe lize linasonewa mu Usendo uze.”

⁹ Mba Mwene Zambi yangwamba ngwenyi: “Ayuda ni akwa Yerusaleme kaanangutwama punga.

¹⁰ Haanahiluka ku shili ya tushakulu two, waze alitunyine maliji jami; haanawayila mazambi eka. Aisraele ni Ayuda eswe aali haanashihi Usendo uze nakolesele ni tushakulu two.

¹¹ Kashika haliabwila, yami Mwene Zambi, ngunaatoweza ngwami mungukaamwesa lamba, keechi kachina. Mba muze maakateta kuli yami hanga ngwakwase chichi kubanjika.

¹² Mba Ayuda ni akwa Yerusaleme maaya kuli mazambi waze, kuze akulambula milambu ni kuteta hanga aakwase. Alioze mazambi waze keechi kahasa kwalamwina nichimwe ku kwononona chize muchikeza.

¹³ Ayuda akwo haabwa ni mazambi anji ngwe membo jo, ni akwa Yerusaleme hookesa yilumbilo yakulambwila milambu ya sonyi kuli hamba lio Bale ngwe kwoka cha majila a mu limbo lio.

¹⁴ Jeremia, kanda uliumba kuli yami hanji kungulembejeka hakutwala kuli atu wano. Muze maabwa ni kungutambika hanga ngwakwase, chichi kwabanjika.”

¹⁵ Mwene Zambi kanambe ngwenyi: “Atu waze nakuzanga haanalingi yuma yibi. Ngwe kuchi maahasa kunjila mu zuwo liami? Kuma kaananyongo ngwo, maahasa kukinda kwonona ha kulakenya ni kulambula milambu ya yimuna, nyi?

¹⁶ Naavulukile ngwami, mutondo wa Olive wa wisu wa mihuko yinji yibema; alioze haliabwila, mungwocha mafwo jawo ni kumakuna mitango yawo.

¹⁷ “Yami Mwene Zambi Mukwa Ndundo Jeswe, natumbile Aisraele ni Ayuda; alioze haliabwila mungwamwesa lamba. Haanalikokela lio ayo ene mumu ha chibi chize haanalingi; haananguvwisa ufwatulo ha kulambula Bale milambu.”

Atu yaatwama Jeremia punga yakumushiha

¹⁸ Mwene Zambi yangulweza punga yize angutwamine kuli akwa kole jami.

¹⁹ Yami nabwile ngwe mwana panga chimbovu yoze anatwala ku chishihilo, te Chanyingikine ngwami yami analingi yuma yino. Yaamba ngwo: “Tunungunenu we mutondo shimbu unachilineke ni mihuko; tumushihenu hanga niumwe kechi kamwiwuluka nawa.”

²⁰ Mba yinguliumba ngwami: “Mwene Zambi Mukwa Ndundo Jeswe, yena uli ngaji wa ululi; wakweseka manyonga ja atu ni mbunge jo. Hinakunjika milimo yami mu moko je; kashika ngutayize kama ngumone chize muungukala kuli atu wano.”

²¹ Malunga a ku chihunda cha Anatote azangile kungushiha. Yaangulweza ngwo, nyi muunyongonona kulongesa maliji a Zambi, mutukushiha.

²² Mba Mwene Zambi Mukwa Ndundo Jeswe yangwamba ngwenyi: “Mungwamwesa lamba! Akweze jo maakafwila mu jita ni ana jo maakafwa ni zala.

²³ Hinatongola tangwa lize mungukamwesa lamba akwa Anatote, muze tangwa lize mulikaheta, niumwe kechi kasala ni mwono.”