Jeremia 10 - Mukanda Wa Zambi 1970

Kukombelela mahamba ni uwayilo wamwenemwene

¹ Yenu Aisraele banjikenu maliji a Mwene Zambi.

² Ngwenyi: “Kanda nwimbulula ndako ja mavungu akwo; kanda nuvwila woma ha kumona yilayi ya kwilu, chibwe yuma yize mavungu akwo akuvwila woma.

³ Uwayilo wa atu wano uli wamokomoko. Kaakupakula mutondo wa mu usaki; kaakuusonga ni yuma ya mukwa utotombo,

⁴ kaakuwola prata ni oru. Kaakuuhata ni mbambo ni kuukolesa. Nyi ka, muulimbuka.

⁵ Mahamba ngwe wano kaali ngwe yuma yize akuzezejeka mu munda, ha kuhanga tujila. Keeshi kuhasa kuhanjika, chatamba kwambata mumu keeshi kuhasa kwenda. Kanda nweevwila woma, mumu kaahashile kukulinga nichimwe, chibwe kuhasa kukulingila Chuma chibema.”

⁶ Mwene Zambi kukushi niumwe walifwa ni yena; mumu yena uli mukwa ndundo, jina lie lili lia lufuma.

⁷ Yena mwanangana wa mavungu eswe, iya kechi kukulemesa? Yena kuwatela ulemu. Kukushi niumwe walifwa ni yena mukachi ka akwa mana eswe ja mavungu, hanji mukachi ka mianangana jo.

⁸ Ayo eswe kaali yelo kanda yihepuke. Yika maahasa kulilongesa ku mahamba ja mitondo?

⁹ Mahamba jo kaali akutatula ni prata ya ku chifuchi cha Espanya, ni oru ya ku Ufaze; yeswe yili milimo ya akwa utotombo. Mahina jo alauluka ni aufungo, yeswe yili milimo ya akwa utotombo.

¹⁰ Alioze yena Mwene Zambi uli Zambi yamwenemwene, Zambi ya mwono, mwanangana wa miaka yeswe. Muze yena wakutenuka, hashi kuhakuchikima. Mavungu keeshi kuhasa kulihumikiza ni ufwatulo we.

¹¹ (Yenu chanutamba kulweza atu ngwenu, mazambi waze kaatangile ko hashi ni malilu kumaakonona. Keechi kalinduluka hano hashi.)

Mwaso: chichimiekenu Zambi

¹² Mwene Zambi watangile hashi ni ndundo jenyi; yatanga ho ni mana jenyi, yazazulula lilu.

¹³ Ku liji lienyi meya kaakulundumuka kwilu; kakumwisa malelwa ku masongo a hashi. Kakuhenyesa njaji mu vula, kakutuma fuji kuma liayo.

¹⁴ Ha kumona yuma yino, atu kaakunyonga ngwo, kaali yelo kanda yihepuke. Waze akulinga mahamba kaakwivwa sonyi, mumu mazambi waze akulinga kaali amokomoko, keeshi mwono.

¹⁵ Kaali amokomoko, chatamba kwalelesa; muze Mwene Zambi makeza ni kubatwila atu, mahamba kumaakakuwa.

¹⁶ Zambi wa Yakoba keshi ngwe ayo; iye mwe watangile yuma yeswe, yatongola Aisraele kubwa atu jenyi. Mwene Mukwa Ndundo Jeswe lie jina lienyi.

Undungo wa Ayuda

¹⁷ Yenu akwa Yerusaleme, akwa kole kaananuseleka! Kungenu yuma yenu.

¹⁸ Mwene Zambi makanutuhwisa mu chifuchi chino; makanufwita, niumwe wa kuli yenu kechi kusala. Mwene Zambi wachamba.

¹⁹ Akwa Yerusaleme yaateta ngwo: “Mama yami, lamba kuliatuwana! Yilonda yetu kaahashile kuyiwuka. Twanyongene ngwetu, chino chili Chuma chize mutuhasa kulihumikiza nacho.

²⁰ Mazuwo jetu a makubu haabuzula; mihipu yo hiyabatwoka. Ana jetu eswe haamwangashana; niumwe hasala yoze mahasa kujika mazuwo jetu nawa; niumwe hasala yoze mazezejeka mo yikalakala yamo.”

²¹ Yingukumbulula ngwami: “Miata jetu kaali yelo; kaasolo kuhula Mwene Zambi asongwele. Kashika yaalimbwoka, mba atu jetu yaamwangashana.

²² Banjikenu! Sango jaha kujineza! Chizungozungo kuchineza ku chifuchi cha ku norde, tujita twacho maakapwisa membo ja Ayuda puya, muma muze mwatwama mikuza.”

²³ Mwene Zambi, ngunanyingika ngwami, mutu niumwe mahasa kutongola jila yenyi mwene; niumwe mahasa kusongwela mwono wenyi mwene.

²⁴ Mwene Zambi fumba kama yetu atu je; alioze hi ni tachi kuhiana ko, hanji kutumwesa lamba muze unatenuka; nyi ka muukatunongesa liakulu.

²⁵ Mavungu waze keeshi kukuwayila evwile kama ufwatulo, waze akulituna yena. Haanashiha atu je; haanatunongesa upu, haanenyeka chifuchi chetu.