Izaya 9 - Mukanda Wa Zambi 1970

¹ Keechi kahasa kuchina ha matangwa waze a lamba. Yifuchi ya mavungu ja Zabulone ni Naftali yeevwisa sonyi hatangu, alioze kulutwe maakalemesa yifuchi yize, chize ku kalunga lwiji Mediterane ku chitokelo ndoo ku chifuchi cha musali lia Yordau, ni ndoo ku chifuchi cha Galilea muze mwatwama yilambala.

Mwanangana yoze makayula kulutwe

² Atu waze te akwenda mu milima haanamono pangu linene. Waze te atwama mu chifuchi cha milima, pangu hilinaapangulwisa.

³ Mwene Zambi, hiunaawahisa kuhiana; hiuneevwisa chiseke. Kaakuwahilila ha yeswe yize waalingilile, ngwe chize atu akuwahilila ni mihuko yo, hanji ngwe chize malunga akuwahilila muze akulitetela yikumba ya kububa.

⁴ Mumu hiunamakuna kuli jize jaakashile, ni pango yize yamakwine yipaya yo. Hiunakumbu vungu lize abinjishile atu je ngwe chize wakumbile tujita twa Midiane ha shakulu.

⁵ Sapato ja tujita ni mahina jo eswe waze asapwokelele manyinga maakayocha kahia.

⁶ Kuli yetu hikwasemuka mwana! Mwana lunga hatwaha yo! Kumakabwa mukwa kutuyula. Kumaakamuvuluka ngwo: “Mukwa Kukomwesa,” “Mukwa Kukanyamisa,” “Zambi Mukwa Ndundo,” “Tata wa Miaka Yeswe,” “Mwanangana wa Uhwimino.”

⁷ Tachi ja wanangana wenyi muujoka, wanangana wenyi matangwa eswe muukabwa ni uhwimino. Makatwama ha chitwamo cha mwanangana David ni kuyula, makakolesa wanangana wenyi ni umwenemwene ni ululi, chize musono ndoo ku miaka yeswe. Mwene Zambi Mukwa Ndundo Jeswe hanabatula kulinga yuma yino yeswe.

Mwene Zambi makamwesa Aisraele lamba

⁸ Mwene Zambi hahisa wanangana wa Israele, lie vungu lia Yakoba.

⁹ Aisraele eswe, waze atwama mu limbo lia Samaria, maakanyingika ngwo, iye halinga chino. Haliabwila kaali akwa kulengumuka kanda akwa kulisuta. Kaanambe ngwo:

¹⁰ “Mazuwo a briki (tujolo) haabuzuka haaholoka hashi, alioze mutusalakanyisa ho mazuwo akutunga ni mawe. Mitondo misuwa haayiteta haayiholola hashi, alioze mutusalakanyisa ho mitondo yibema sedru.”

¹¹ Mwene Zambi hasangumuna akwa kole jo haakwaseleka.

¹² Asiria a ku chivumbuko ni Afilistia a ku chitokelo haabakula makanwa jo hanga aminye Aisraele. Chibwe chocho utenu wa Mwene Zambi kanda uchihwa hindu kanazozo kwoko lienyi amwese lamba.

¹³ Alioze Aisraele kaasolo kwalumuka ku mbunge. Chibwe Mwene Zambi Mukwa Ndundo Jeswe haanamwesa lamba, hindu kaasolo kuhiluka kuli iye.

¹⁴ Ha tangwa limuwika Mwene Zambi makamwesa miata ja Israele ni atu jo akwo lamba, kumaakaabatula mutwe ni muchila.

¹⁵ Makulwana ni atu alemu we mutwe, akwa munanyi waze akulongesa mahuza we muchila!

¹⁶ Tetekeli ya Aisraele haanaapiangula, haanaabinjisa liakulu.

¹⁷ Ha chino Mwene Zambi kechi kutayiza mukweze niumwe kuchina, kechi kulweza keke kuli tuliwa jo ni ana a shiwa, mumu atu eswe kaali yitanganyanyi kanda yingulungulu. Yuma yeswe yize akuhanjika yili yibi. Chibwe chocho utenu wa Mwene Zambi kuuchi kuhwa, hindu kumazoza kwoko lienyi hanga aamwese lamba.

¹⁸ Ungulungulu wa atu hiwoka ngwe kahia kaze kanocho mingonga ni mikalale. Unaweme ngwe usaki uze unafwindangana ni mwishi.

¹⁹ Mwene Zambi Mukwa Ndundo Jeswe kanatenuka, lamba lienyi lize akumwesa atu lili ngwe kahia kaze kanalekwoka mu chifuchi cheswe ni kwonona atu; mutu mweswe meseka kulilamwina iye mwene.

²⁰ Mu chifuchi cheswe atu kakulipupwisa hanga amone yimwe yuma yize maahasa kulia, hindu zala yo kuyishi kuhwa. Kaakulia chibwe ana jo ene!

²¹ Amanase ni Aefraime kaanalikatukila, mba ayo eswe kaanaseleka Yuda. Chibwe chocho utenu wa Mwene Zambi kanda uchihwa; hindu kanazozo kwoko lienyi ni kwamwesa lamba.