Izaya 8 - Mukanda Wa Zambi 1970

Mwana wa Izaya kali ngwe chilayi kuli atu

¹ Mwene Zambi yangwamba ngwenyi: “Anda baya linene usoneke ho sona jinene ‘Shihenu Nikawashi, Bubenu Nikawashi.’

² Tambika atu amwenemwene aali, hako Uria ni Zakaria, mwana wa Jeberekia, hanga abwe yela.”

³ Munabwamuze pwo liami yaka ufumba. Muze mwanetu hasemuka, Mwene Zambi yangwamba ngwenyi: “Muluke jina ngwe; ‘Shihenu Nikawashi, Bubenu Nikawashi.’

⁴ Shimbu mwana kanda achamba ngwenyi, ‘Tata’ hanji ‘Mama,’ ubite weswe wa mu limbo lia Damasku ni yuma yeswe yize ya mu limbo lia Samaria maakayimbata kuli mwanangana wa Asuria.”

Mwanangana wa Asuria kaneza

⁵ Mwene Zambi yangwamba nawa ngwenyi:

⁶ “Atu wano haalituna meya waze anende hakehe a mu lwiji Shiloa ni kaanachikima ku meso ja mianangana Rezine ni Peka.

⁷ Kashika yami, Mwene Zambi mungushinjika mwanangana wa Asuria ni tujita twenyi eswe hanga ase jita ni Ayuda. Maakeza ngwe sanga lia meya a ku lwiji Ufrateze.

⁸ Maakapukumukina hali Ayuda ngwe sanga lia meya, kumaakasupwoka ndoo mu kota, ni kufuka yuma yeswe.” Zambi kali hamwe ni yetu! Mapulwa jenyi maafuka che chifuchi.

⁹ Yenu mavungu kungulukenu hamuwika ni woma! Yenu masongo ja hashi banjikenu. Lulikenu kwasa jita, alioze ivwenu woma! Lilulikenu, alioze ivwenu woma!

¹⁰ Twamenu punga jenu! Alioze kujichi kakola. Hanjikenu ngwe chize nunazange! Alioze kuchichi kunukwasa nichimwe mumu Zambi kali hamwe ni yetu.

Mwene Zambi yatoweza mwe mukwa munanyi

¹¹ Mwene Zambi ni ndundo jenyi yangutoweza ngwenyi: “Kanda wimbulula ndako jize abwile najo atu wano.

¹² Kanda ulichinga no muze ali ku punga jo, kanda uvwila woma ku yuma yize ayo akuvwila woma.

¹³ Iwuluka ngwe, yami Mwene Zambi Mukwa Ndundo Jeswe, nguli munangi, nguli yoze Chakutamba kuvwila woma.

¹⁴ Yami nguli mwe munangi lume. Kashika nguli ngwe liwe lia kuhukanyisa atu, nguli ngwe muheto uze wakufwa akwa wanangana ja Yuda ni Israele ni akwa limbo lia Yerusaleme.

¹⁵ Atu anji maakatali nga, maakalimbwoka, maakamakwoka. Maakafwa mu muheto.”

Mwene Zambi yakanjisa atu kuhula mana kuli afu

¹⁶ Yenu tumbaji twami, fungenu maliji jami waze anguhele Zambi.

¹⁷ Mwene Zambi halisweka kuli atu jenyi, alioze yami ngunashachila hali iye, ngunamuse mbunge.

¹⁸ Hano nguli hamwe ni ana waze Zambi hanangwehe. Mwene Zambi Mukwa Ndundo Jeswe, yoze ukwete chitwamo chenyi ha mulundu wa Zione, hanatutumu tubwe akwa sango kuli atu ja Israele.

¹⁹ Alioze maakakulweza ngwo: “Chatamba kwita mana kuli tahi ni kuli akwa mahamba waze akulinyinguna ni kulinyinyita, mumu chatamba kwita mana kuli mwiku, ni kuhula afu hakutwala kuli akwa mwono.”

²⁰ Akumbulule ngwe: “Banjikenu chize Mwene Zambi anangulongesa! Kanda ubanjika kuli tahi. Yuma yize akwamba kuyishi kunukwasa nichimwe.”

Matangwa a lamba

²¹ Atu maakendangana mu chifuchi nikulekumuka ni kufwa zala. Mu zala yo ni mu ufwatulo wo maakashililika mwanangana wo ni Zambi yo. Maahasa kutala kwilu,

²² hanji hashi, alioze keechi kamona nichimwe shina kubinda ni milima yahiana muze akwa kole anaashinjikila.