Izaya 7 - Mukanda Wa Zambi 1970

¹ Muze mwanangana Ahaze, mwana wa Jotame mujikulu wa Uzia, ayulile Ayuda, jita yiibutuka. Rezine, mwanangana wa Siria, ni Peka mwana wa Remalia, mwanangana wa Israele, yasa jita ni Yerusaleme, alioze kahashile ko kwakumba.

² Muze mwanangana wa Yuda hevwa ngwo: “Tujita twa Siria haanjila mu chifuchi cha Israele,” iye ni e atu jenyi yeevwa mwongo, yaachikima ngwe mitondo yize yinatukunga ni fuji.

³ Mwene Zambi yambila Izaya ngwenyi: “Yako ni mwane Sheare Jashube utakane mwanangana Ahaze. Muumutakana mu jila muze akwa kutunga mahina akulingila milimo yo, ku songo lia kapila yoze wakuneha meya a ku chitende cha ku tunda.

⁴ Mwambe ahwime mbunge, kanda evwa woma, mbunge yenyi kanda yilezumuka. Ufwatulo wa mwanangana Rezine ni tujita twenyi Asiria ni wa mwanangana Peka hi Chuma ko. Kuuli lume ngwe mitondo yaali yize yinafwindangana mwishi.

⁵ Asiria, hamwe ni Aisraele ni mwanangana wo haatwama punga.

⁶ Haalitesa kunjila mu chifuchi cha Yuda, ni kwomisa atu alikate no, hanga apwise mwana wa Tabele mwanangana wa Yuda.

⁷ “Alioze yami Mwene Zambi ngunambe ngwami, chino kuchichi kabwa nichimwe.

⁸ Mumu yika? Mumu Siria keshi ni tachi kuhiana Damasku limbo lio lia wanangana, ni Damasku keshi ni tachi kuhiana mwanangana Rezine. Hakutwala ku Israele, ha miaka 65 maakabwa tubinji, kechi kabwa nawa ngwe vungu.

⁹ Israele keshi ni tachi kuhiana limbo lio lia wanangana Samaria, ni Samaria keshi ni tachi kuhiana mwanangana Peka. “Nyi kuushi kunyongonona mu ufulielo kuuchi kalinduluka mu wanangana we.”

Chilayi cha Emanuele

¹⁰ Mwene Zambi yalweza nawa Ahaze maliji akwo ngwenyi:

¹¹ “Mwite Mwene Zambi, Zambi ye, chilayi, chibwe cha muma lia afu kushi hanji cha mwilu.”

¹² Ahaze yakumbulula ngwenyi: “Chichi kwita chilayi. Ngunalitunu kwami ha kweseka Mwene Zambi.”

¹³ Izaya yakumbulula ngwenyi: “Yena wa ku vungu lia mwanangana David, banjika haliabwila. Chili chibi yena kwe seka kulihumikiza cha atu, alioze chili chibi chahiana kweseka kulihumikiza cha Zambi.

¹⁴ Kashika Zambi iye mwene makwaha chilayi: umwe mwana pwo makasema mwana wa lunga ni kumuluka jina ngwo, Emanuele.

¹⁵ Muze hakola, ni mahasa kutongola yibi hanji yibema, henoho atu maanwa yamwa ni maalia wuchi.

¹⁶ Chibwe muze mwana kanda achinyingika yibi ni yibema, yifuchi ya mianangana aali waze anakuvwisa mwongo haliabwila muyikapwa ya woya.

¹⁷ “Mwene Zambi makakokela hali yena ni hali atu je, ni ha jiko lia wanangana matangwa a lamba waze kanda nuchimona kama chize ku tangwa lize wanangana wa Israele alihandunwine ni Yuda; Zambi makanukokela mwanangana wa Asuria.

¹⁸ “Ha matangwa waze, Mwene Zambi makatambika akwa Egiptu ni muluzu ngwe chinyingi. No kumeeza ngwe jiji ku yito ya lwiji Nile. Makatambika nawa Aasuria, no meeza ku chifuchi cho ngwe puka.

¹⁹ Meeza ni kubwila mu yikulo, ni mu yivwenge ya mawe; maalitanda ha mingonga yeswe, ni ha makelo eswe.

²⁰ “Ha matangwa waze, Mwene Zambi makanda mukwa kutewula wa musali lia Ufrateze, mwe mwanangana wa Asuria! Mwenawo makatewula wevu wenu, ni kambu jenu ni wonawona wa ha mijimba yenu.

²¹ “Ha matangwa waze chibwe mukwa yimuna makabwa shina ni ngombe umuwika ni pembe aali,

²² hindu makabwa ni yamwa yinji. Atu waze akepe maakasala mu chifuchi maakanwa yamwa ni kulia wuchi.

²³ “Ha matangwa waze, minda yibema ya vinyu, munda weswe ni mitondo kanunu yize yakufwika kanunu ka mbongo ja prata, muyikalikasa ni mikalale ni mingonga.

²⁴ Mayanga maakazomba mo ni mata a kwasa ni mivwi. Chifuchi cheswe muchikazala ni mikalale ni mingonga.

²⁵ Milundu yeswe yize asangwile muyikalikasa ni mikalale; mutu niumwe kechi kendela ko. Mukukabwa kuma kwa kwendela ngombe ni ulilo wa mapanga.”