Izaya 66 - Mukanda Wa Zambi 1970

Mwene Zambi makabatwila mavungu

¹ Mwene Zambi kanambe ngwenyi: “Lilu lili chitwamo chami, ni hashi he homa ha kunangika molu jami. Zuwo lika munukangutangila kama? Mulihi muma muze mungutwama?

² Kwoko liami kuliatangile yuma yeswe, nyi? Nakuwahilila ni waze akulikehesa ni akwalumuka ku mbunge, waze akungulemesa ni kungwononokena.

³ “Atu kaakulinga yize yinaawahila. Kuli ayo chili chimuwika kulambula kuji a ngombe wa kushiha hanji mutu wa kushiha; kulambula mwana panga hanji kumakuna kota ya kawa; kulambula mbuto hanji manyinga a ngulu; kulambula milambu ya vumba libema hanji ku kombelela hamba. Kaakuwahilila ni kuwayila cha yizelwokeso.

⁴ Ha chino mungukaamwesa lamba, lize te akuvwila woma mumu niumwe kabanjikile ko muze nahanjikile, chibwe niumwe kakumbulwile ko muze naatambikile. Yaatongola kungukolema ni kulinga yibi.”

⁵ Banjikenu yize Mwene Zambi anambe, yenu waze nwakumulemesa ni kumwononokena. Ngwenyi: “Amwe a kuli atu jenu kaakunuvutwokela, mumu nwakushachila hali yami. Kaakunuseha ni kwamba ngwo: ‘Mwene Zambi asolole unene wenyi, anulamwine, mba tumone chize nunawahilila.’ Alioze ayo ene kumaakevwa sonyi!

⁶ Banjikenu! Chizungozungo mu limbo ni zungo mu zuwo lia Zambi, lili zungo lize Mwene Zambi anamwesa akwa kole jenyi lamba!

⁷ “Limbo liami lia chijila lili ngwe pwo yoze unaseme, alioze kasolo kwivwa musongo.

⁸ Kuma umwe mutu hevwa hanji hamona kama Chuma ngwe chino? Akwa vungu limwe maahasa kusemuka tangwa limuwika, nyi? Zione ha kubutuka musongo, masema vungu lienyi.

⁹ Kanda nunyonga ngwenu, munguneha atu jami ku ola ya kusemuka, alioze chichi kwasema.” Mwene Zambi hachamba.

¹⁰ Wahililenu ni Yerusaleme; wahililenu mumu hali iye, yenu eswe waze nwakuzanga limbo lino! Wahililenu hamwe nenyi haliabwila, eswe waze te nwakunenganyana hali iye!

¹¹ Munukevwa chiseke mumu ha kuyuka chenyi, ngwe mwana ha tulo ya naye.

¹² Mwene Zambi kanambe ngwenyi: “Mungukanuwahisa ndoo ku miaka yeswe; ubite wa mavungu muukapukumuka ngwe lwiji yoze keshi kuma. Munukabwa ngwe mwana yoze anamwisa kuli naye, anakangayika mu kondo ni kumulela ni zango.

¹³ Mungukanulembejeka mu Yerusaleme; ngwe chize mama akulembejeka mwanenyi.

¹⁴ Muze munukamona yuma yino munukawahilila; muyikanutakamisa ni kunuwahisa. Mba munukanyingika ngwenu, yami Mwene Zambi nakukwasa waze akungwononokena; nakusolola utenu wami kuli akwa kole jami.”

¹⁵ Mwene Zambi makeza ni kahia. Makenda ha mapulwa ja kangonga ni kahia, ni kumwesa lamba waze iye te akuvutwokela.

¹⁶ Ni kahia ni mukwale makamwesa lamba akwa milonga eswe a hashi; makaashiha anji.

¹⁷ Mwene Zambi kanambe ngwenyi: “Songo hiliakundama kuli atu waze akwijilila kuwayila mazambi a tundaka, atu waze akwenda ha mikana ni kuya ku minda ya chijila, waze akulia yifwo ya ngulu ni kukulu ni yakulia yikwo ya luchisa.

¹⁸ Ngunanyingika manyonga jo ni yitanga yo. Nguneza ni kukungulula mavungu eswe. Muze eswe haaswa, maakamona chize ngunahase kulinga ni ndundo jami.

¹⁹ Mba maakanyingika ngwo, yami nakwamwesa lamba. “Alioze mungukahandununa amwe a kuli ayo ni kwatuma kuli mavungu, ni ku yifuchi kusuku, kuli atu waze kanda evwa kama lufuma wami, ni kanda amona unene wami ni ndundo jami: akwa Espanya, ni akwa Libia, ni akwa Lidia, mukachi ko muli akwa mana ni mata akwasa, ni akwa Tubale ni akwa Gresia. Mukachi ka mavungu wano maakambujola unene wami.

²⁰ Maakahilwisa atu jenu eswe waze atwama mukachi ka mavungu akwo ngwe chawana kuli yami. Kumaakaneha ku mulundu wami wa chijila, mu Yerusaleme, ha tuvwalu, ni ha yimbulu, ni ha tumelu, ni ha matemba, ngwe chize Aisraele akuneha milambu ya mbuto ku zuwo lia Zambi mu yikashi ya chijila.

²¹ Amwe a kuli ayo mungukaapwisa mahako ni Alevi.

²² “Ngwe chize hashi haha ni lilu haha muyikalinduluka ku ndundo jami, Chenacho nawa vungu lienu ni jina lienu muyikalinduluka.

²³ Ha yiwanyino yeswe ya Kakweji Mwaha ni tangwa heswe lia kuhwima, atu a ku yifuchi yeswe maakeza ni kunguwayila muno mu Yerusaleme.” Mwene Zambi unachambe.

²⁴ “Muze maakahiluka maakamona mijimba ya afu waze angukatukilile. Mavuno waze maakalia keechi kafwa nichimwe, kahia kaze mukakoocha kukeshi kujima nichimwe. Eswe waze maakaamona maakevwa lwaji.”