Izaya 64 - Mukanda Wa Zambi 1970

¹ Mumu yika kuushi kubula lilu lihulumuke hashi? Kachi te milundu muyikumona ni kuchikima ni woma.

² Muyichikima ngwe yitete yize hiyakwata kahia, ngwe meya waze anavelwoka ha jiko. Tweya usolole ndundo je kuli akwa kole je, uchikimise mavungu ku meso je!

³ Liabwile tangwa lize wejile ni kulinga yuma ya kukomwesa, kutwanyongene ngwetu, muyilinga. Milundu yaakumwene, yiichikima ni woma.

⁴ Chize ku shakulu niumwe kanda amona kama umwe Zambi ngwe yena, hanji kwivwa sango jakutwala kuli Zambi ngwe yena, yoze wakukwasa waze akumusa mbunge.

⁵ Yena wakutayiza waze akuwahilila ni kulinga yize yinalite, waze akwiwuluka chize wakuzanga yena. Watutenukinyine, hindu yetu yitulinga lume yibi; chibwe watuvwilile ufwatulo, hindu te yetu twakuvulumuna chize ku shakulu.

⁶ Yetu eswe hitwabwa yivulumunyi; yitanga yetu yeswe ya ululi yilimalima a luchisa. Mumu ha milonga yetu tuli ngwe mafwo omu waze akuhehuka ni fuji.

⁷ Niumwe unatewulukila kuli yena mu yilemba; niumwe keshi kukuhula umukwase. Hiwatumba nyima, hiwatwehuka mumu ha milonga yetu.

⁸ Alioze Mwene Zambi, yena uli tata yetu. Yetu tuli ngwe uma, yena uli ngwe tengi. Yena watutangile,

⁹ Kashika kanda ututenukina kuhiana, chibwe kwalula milonga yetu ndoo ku miaka yeswe. Tuli atu je; tuvwile kama keke.

¹⁰ Membo je a chijila haabwa ngwe puya, Yerusaleme hiyabuzuka, hiyabwa yahululu.

¹¹ Zuwo lietu lia Zambi libema lia chijila, kuze te tushakulu twetu akukuwayila, haliocha kahia. Homa heswe haze te twakuzanga hihabuzwoka.

¹² Mwene Zambi, muulihumikiza ni yino yeswe, nyi? Kuuchi kulinga nichimwe, muutayiza tumone lamba, nyi?