Izaya 61 - Mukanda Wa Zambi 1970

Sango jibema ja ulamwino

¹ Mwiku wa Mwene Zambi uli muli yami. Hananguwayisa mu kwambujolela yiswale sango jibema ni kuwuka waze ayiza yikola ya mbunge, ni kwambujola utuswilo kuli funge, ni kutusula waze ali mu zuwo lia lamba,

² ni kwambujola mwaka wa utu wa Mwene Zambi, ni tangwa lia Zambi liakukala milonga, ni kulembejeka eswe waze akulinyenga,

³ ni kuhana kuli waze ananenganyana mu Zione chiseke ni uwahililo ha kusalakana yinyengo, mwaso wa uhaliso kusalakana kubihilila. Kumaakabwa ngwe mitondo yize Mwene Zambi atumbile iye mwene. Eswe maakalinga chize chinalite, atu maakachichimieka Zambi ha yize hanalingi.

⁴ Kumaakatungulula nawa membo waze abuzwokele kulu.

⁵ Atu jami, tundaka maakanulingila. Kumaakafunga yimuna yenu, ni kulima minda yenu ya mbuto, ni kuselela vinyu.

⁶ Atu maakanunyingika ngwo, nuli mahako ja Mwene Zambi, tuvumbi twa Zambi yetu. Munukawaha ni ubite wa mavungu ni kulisamba ngwenu yili niyetu.

⁷ Sonyi jenu ni sau lienu muyikahwa; munukatwama mu chifuchi cha yenwene. Ubite wenu muukaliwezela yisuho yaali, munukawahilila ndoo ku miaka yeswe.

⁸ Mwene Zambi kanambe ngwenyi: “Nakuzanga ubatwilo uze unalite, nakuvutwokela wiji ni uhenge. Mungukakundulula atu jami nikulita ni ululi wo, ni kukolesa no Usendo ku miaka yeswe.

⁹ Kumaakabwa akwa lufuma hakachi ka mavungu; eswe waze maakaamona kumaakanyingika ngwo, kaali atu waze nawahishile.”

¹⁰ Yerusaleme kanawahilila ha yize Mwene Zambi hanalingi. Kali ngwe nandungi yoze hazala mahina a umbachiso. Zambi hanamujiki mahina a ulamwino ni ululi.

¹¹ Ngwe chize mavu akusokesa mbuto ni kuyitatwisa, chenacho nawa Mwene Zambi makalamwina atu jenyi, ni mavungu eswe maakamuchichimieka.