Biblia Todo Logo
Bìoball air-loidhne

- Sanasan -

Izaya 60 - Mukanda Wa Zambi 1970


Uhenya wa Yerusaleme uze muwiza ho

1 Yerusaleme, katuka, beyima ngwe tangwa; uhenya wa Mwene Zambi unahenye hali yena!

2 Mavungu akwo maakabwa mu milima, alioze yena, pangu lia Mwene Zambi mulikakupangukila kubeyima cha uhenya wenyi muchikabwa hali yena.

3 Mavungu akwo maakeza ku pangu lie; ni mianangana ku kuvumbuka cha tangwa lie.

4 Achitala sali ni sali umone yize yiliko; atu je kaaneza ku mahie hamuwika! Ana malunga maakakatuka kusuku; anenu a mapwo maakaambata mu moko ngwe ana akemba.

5 Muukachimona ni muukawahilila, muukalikwiza kuhiana. Makakunehena ubite wa mavungu. Ubite wo muukejilila kusuku mu sali lia kalunga lwiji.

6 Mikana ya tumelu anji muyikeza, ya ku Midiane ni Efa. Muyikeza ya ku Sheba nikuneha oru ni yuma ya vumba libema yize akwocha. Atu kumaakambujola sango jibema jize Mwene Zambi hanalingi!

7 Mapanga eswe a ku Kedare ni ku Nebayote kumaakakuneheno ngwe milambu. Kumaakaalambula ha chilumbilo cha Mwene Zambi amuwahise. Mwene Zambi makahenyesa zuwo lienyi kuhiana.

8 Aya wano aneza ngwe malelwa, ngwe membe waze anahiluka ku mahio?

9 Kaali mato waze anakatuka ku yifuchi kusuku, nikuneha atu ja Zambi ku mahio, waze ananeha prata ni oru yakulemesa nayo jina lia Mwene Zambi, Zambi Munangi wa Israele, yoze washinjilile mavungu eswe hanga alemese atu jenyi.

10 Mwene Zambi kanambila Yerusaleme ngwenyi: “Tundaka maakatungulula yipanga ye, mianangana jo maakakulingila. Mu ufwatulo wami nakumwesene lamba, alioze haliabwila mungukulweza utu ni keke.

11 Yajilo ye muyikazuluka mwalwa ni ufuku, hanga mianangana a mavungu akwo maahasa kukunehena ubite wo.

12 Alioze mavungu waze keechi kakulingila mungukanongesa liakulu.

13 “Mitondo mupinyu ni muzunge ni Shipre, mitondo yibema yahiana ya mu usaki wa Libano, maakayineha ni kukutungulula yena Yerusaleme, ni kuhenyesa zuwo liami ni limbo liami.

14 Ana malunga ja waze anubinjishile maakeza ni kufukama ku meso je ni kukulemesa. Eswe waze akulelesele maakakuwayila ku molu je. Maakakuvulwoka ngwo: ‘Limbo lia Mwene Zambi, Zione, limbo lia Zambi Munangi wa Israele.’

15 “Keechi kakwehuka nawa ni kukuvwila kole, yena limbo lize liabwile liahululu. Mungukakupwisa munene ni mubema, mumu we uwahililo wa miaka yeswe.

16 Mavungu ni mianangana maakakulela, ngwe mama yoze unamwisa mwanenyi. Muukanyingika ngwe, yami Mwene Zambi hinakulamwina, yami Mwene Zambi Mukwa Ndundo wa Israele hinakukula.

17 “Mungukakunehena oru ha kusalakanyisa unengu, prata ni unengu ha kusalakanyisa utale ni mitondo, ni utale kusalakanyisa mawe. Miata jenu keechi kanubinjisa nawa. Mungukaashinjika kuyula ni ululi ni uhwimino.

18 Maliji akwonona kuuchi keevwa nawa nichimwe. Kwenyeka kuchichi kabwa nawa mu chifuchi chenu. Alioze muukaluka chipanga che ngwe: ‘Ulamwino,’ muukaluka yajilo ye ngwe: ‘Uhaliso.’

19 “Tangwa kulichi kabwa nawa Pangu lie, ni kakweji kechi kukutwila nawa mweji; Yami, Mwene Zambi, mungukabwa pangu lie ku miaka yeswe; pangu lia uhenya wami mulikakupangukila.

20 Tangwa lie kulichi kanjila nawa, ni kakweji ke kechi kakeha nawa. Yami, Mwene Zambi, mungukabwa Pangu lie ku miaka yeswe, kuuchi kabwa nawa ni matangwa a yinyengo.

21 Atu je eswe maakabwa akwa ululi, maakahinga che chifuchi ku miaka yeswe. Hingunatange, hingunatumbu, ni kusolola uhenya wami kuli eswe.

22 Chibwe jiko likepe liahiana, mulikabwa vungu lia tachi. Muze tangwa mulikeza, Mungukalinga Chuma chino nikawashi. Yami nguli Mwene Zambi!”

The Bible in Chokwe © Bible Society of the Democratic Republic of Congo and Bible Society of Zambia, 1970, 1991.

Bible Society of Zambia
Lean sinn:



Sanasan