Izaya 6 - Mukanda Wa Zambi 1970

Zambi yatambika Izaya kubwa mukwa munanyi

¹ Ha mwaka uze afwile mwanangana Uzia, yingumona Mwene Zambi. Te kanatwama ha chitwamo chenyi chinene cha wanangana; kananangama; lubula wenyi yazalisa zuwo lienyi lia chijila.

² Akwa mwono a kahia yaamunyingika. Mukwa mwono mweswe yabwa ni mapulwa asambano. Yalifuka meso ni mapulwa aali, mapulwa akwo aali yalifuka ku molu, akwo aali yahumuka no.

³ Yaalitambieka ngwo: “Munangi, munangi, munangi! Mwene Zambi Mukwa Ndundo Jeswe kali munangi! Uhenya wenyi hiunazala hashi.”

⁴ Liji lio yilinyikisa fundamentu ya zuwo lia Zambi, ni lie zuwo yilizala ni mwishi.

⁵ Yingwamba ngwami: “Lamba liami! Ngunafu! Mumu maliji jami eswe kaali abi, nakutwama mukachi ka atu waze akuhanjika maliji abi wika. Hindu hinamona ni meso jami mwe Mwanangana, Mwene Zambi Mukwa Ndundo Jeswe.”

⁶ Henaho umwe mukwa mwono wa kahia yahumuka, yeza kuli yami, te kanambata kala lia kahia ku lumana, lize anjile ha chilumbilo.

⁷ Yalisa ku kanwa liami, ngwenyi: “Lino hakwata ku kanwa lie; haliabwila milonga ye hakukonekena yo, kuushi nawa ni ushiso.”

⁸ Mba yingwivwa Mwene Zambi nikwamba ngwenyi: “Iya mungutuma? Iya mabwa kanganda ketu?” Yingukumbulula ngwami: “Yami mwane! Ngutume!”

⁹ Mba yangutuma nguye ngukambulwile atu maliji wano ngwenyi: “Kwivwa kumunwivwa, alioze kuchichi kulumbunuka; kumona, kumunukamona, alioze kunuchi kanyingika.”

¹⁰ Mba yangwamba ngwenyi: “Kalisa mbunge ja atu wano, matwi jo ajike, meso jo afukiwe, hanga achine kumona, hanji kwivwa, chibwe kunyingika. Nyi ka, matewuluka kuli yami ngwawuke.”

¹¹ Yinguhula ngwami: “Mwene Zambi, ndoo tangwa lika muchikabwa chino?” Yangukumbulula ngwenyi: “Ndoo membo maakabwa ahululu ni che chifuchi muchikabwa cha woya.

¹² Mungutuma atu kusuku ni yihela muyibwa ya woya mu chifuchi.

¹³ Chibwe mukachi ka atu kumi umuwika masala mu che chifuchi, hindu maamushiha nawa. Mabwa ngwe Chipinji cha chimbunji chize chasala ha kubatula mutondo shene.” (Chimbunji chinalumbunuka ngwo, Ubutukilo Waha wa atu ja Zambi.)