Izaya 59 - Mukanda Wa Zambi 1970

Mukwa munanyi wa Zambi yahisa yivulumunyi

¹ Kanda nunyonga ngwenu, kwoko lia Mwene Zambi hiliahiha ha kunulamwina, hanji hafwa matwi kahashile kubanjika ku kuliumba chenu!

² Keshi kunubanjika mumu ha shili yenu; milonga yenu yakunuhandununa kuli Zambi muze nwakuzanga kumuwayila.

³ Nuli akwa mahuza, nwakukolema Shimbi, ni kumwanga manyinga.

⁴ Nwakuya ku chota, alioze kunushi kusopa ni ululi. Nwakuhanjika mahuza ha kulisambisa. Nwakwaka uhuka ni kusema Vunda.

^5-6 Punga ja ungulungulu jize nwakutwama jili ngwe monda a chihili. Nyi nwafwenya limwe lionda, mumutuhuka lunoka! Alioze punga jenu kujahashile kunukwasa, jili ngwe mahina amokomoko a wandajili.

⁷ Matangwa eswe nwakunyonga ungulungulu; kuli yenu chili chikalu ha kuwehuka. Kunushi kuyambashana ni kumwanga manyinga ja waze keeshi yitela. Kweswako nwakuya nwakuhichika ko kwenyeka ni kwonona.

⁸ Nyi nuli hakamwihi, niumwe mabwa mu uhwimino; yeswe yize nwakulinga yili ya uhenge. Nwakukaula jila ja uhenge; waze nwakuyikaula kunushi kubwa mu uhwimino.

Aisraele yaashikisa milonga yo

⁹ Atu kaanambe ngwo: “Haliabwila tunanyingika chikuma chize Zambi keshi kutulamwina kuli waze akutubinjisa. Twakusa ko mbunge mutwenda mu pangu, alioze kuli lume milima.

¹⁰ Twakutalinga ngwe tuli tupuputa. Chibwe tangwa ha muchima twakutalinga ngwe ufuku uliko, ngwe tuli mu milima muma lia afu.

¹¹ Tuli ni woma ni yinyengo. Twakuzanga ngwetu, Zambi atulamwine ku kubinda ni ku yihungumiona, hindu kenu.

¹² “Mwene Zambi tuli ni yitela yinji kuli yena. Milonga yetu yinatuhisa. Tunachinyingika kanawa.

¹³ Hitunakukatukila, hitunakwehuka, hitunalitunu kukukaula. Hitunabinjisa atu akwo, hitunakumbu nyima. Tuli ni manyonga a uhepuke; ni maliji jetu kaali a mahuza.

¹⁴ Ubatwilo uze unalite wakuhi. Ululi, ni umwenemwene, ni kutuwika cha mbunge kuyishiko.

¹⁵ Nyi umwe meseka kwecha kulinga yibi, atu akwo maamulinga yibi kuhiana.” Mwene Zambi hachimona, kanevu kubiha mumu ubatwilo unalite wakuhi.

Mwene Zambi yalulika kupulula atu jenyi

¹⁶ Kanalishimwoka ha kumona ngwenyi, hako keshiko yoze unahakwila waze akubinjisa kuli atu akwo. Kashika ni ndundo jenyi maalamwina ni kukumba akwa kole jo.

¹⁷ Mazala ubatwilo uze unalite ngwe chikuto cha jita, ni kukumba ngwe chifulu. Mazala zango lia kukala milonga ngwe kazaku.

¹⁸ Makamwesa lamba akwa kole jenyi nikulita ni yize alingile, chibwe waze atwama mu yifuchi kusuku.

¹⁹ Ku chivumbuko ni ku chitokelo atu eswe maakamuvwila woma mumu ha ndundo jenyi jahiana. Makeza ngwe muhuji wa tachi, ngwe chijimbi.

²⁰ Mwene Zambi kanambila atu jenyi ngwenyi: “Mungwiza ku Yerusaleme ni kukula eswe waze akwalumuka ku mbunge.

²¹ Mungukolesa nenu Usendo: hingunanutakamisa ni ndundo jami ni longeso liami kubwa niyenu ndoo ku miaka yeswe. Chize musono chanutamba kungwononokena ni kulongesa ana jenu ni ajikulu jenu kungwononokena ndoo ku miaka yeswe.”