Izaya 55 - Mukanda Wa Zambi 1970

Keke ya Zambi

¹ Mwene Zambi kanambe ngwenyi: “Tweyenu yenu eswe nunevu pwila, meya kuno kwaali! Tweyenu yenu kunushi mbongo, nulande yakulia, nulie! Tweyenu! Nulande vinyu ni yamwa, kuyishi kufwika nichimwe!

² Mumu yika nwakumwanga mbongo ha yuma yize hi yakulia ko? Kuchi mba nwakuhana ubite ha yakulia yize kuyishi kunukuchisa? Ngubanjikenu, nulinge yize ngunambe, mba hanga nukawahilile ni yakulia yibema yahiana.

³ “Atu jami, banjikenu, tweyenu kuli yami; tweyenu kuli yami hanga nubwe ni mwono! Mungukolesa ni yenu Usendo wa miaka yeswe, ni kunuwahisa ngwe chize nalakenyene David.

⁴ Namupwishile mwata, kanda chela wa mavungu, naalwezele ndundo jami ni kwoko lienyi.

⁵ Haliabwila mungutambika mavungu a tundaka, waze te kanda achinunyingika kama, alioze haliabwila meza nikawashi alinunge ni yenu! Yami Mwene Zambi, Zambi yenu, Munangi wa Aisraele, mungulinga yuma yino yeswe, mungunupwisa akwa vumbi ni akwa uhenya.”

⁶ Fupenu Mwene Zambi ha shimbu lize munuhasa kumumona, mutambikenu shimbu uchili hehi.

⁷ Yingulungulu ehuke ndako jo jibi, alumune mbunge jo. Atewulukile kuli Mwene Zambi, Zambi yetu; mumu kali mukwa keke, kakukonekena nikawashi.

⁸ Mwene Zambi kanambe ngwenyi: “Manyonga jami keshiko ngwe manyonga jenu, ni ndako jami kujishi ngwe ndako jenu.

⁹ Ngwe chize lilu lili kusuku ni hashi, chenacho nawa ndako jami ni manyonga jami asuhwa kuli yenu.

¹⁰ “Maliji jami kaali ngwe chiwe ni vula, yize yakukatuka kwilu ni kunoka hashi ni kutuchikisa ho. Kuyakutatwisa mbuto, kuyakuhana mbuto kuli akwa kukuwa ni yakulia kuli akwa zala.

¹¹ Chenacho nawa maabwa maliji waze ngunahanjika, keechi kubwa amokomoko; maalinga yeswe yize nakuzanga.

¹² “Munukatuhuka mu Babilone ni chiseke; makanutuhwisa mu limbo ni uhwimino. Milundu ni mindundena muyikabutuka kwimba; mitondo muyikakololoka ni uwahililo.

¹³ Mitondo Shipre muyikatatuka muze muli mikalale; mitondo mirte muyisoka muze muli mingonga. Chino muchikabwa chilayi ku miaka yeswe, muchikabwa chiwulwiso cha yuma yize yami Mwene Zambi hingunalingi.”