Izaya 54 - Mukanda Wa Zambi 1970

Zambi kanazange Aisraele

¹ Yerusaleme te hiwabwa ngwe mumba, alioze haliabwila muuhasa kwimba ni kukololoka ni chiseke. Haliabwila muubwa ni ana anji kuhiana pwo yoze kaashimbikile kuli lunga lienyi!

² Tohwesa zuwo lie lia makubu; suhwisa mihipu, kolesa mbambo!

³ Tohwesa njiza je sali ni sali; atu je maakatambula nawa chifuchi cho chize mavungu akwo haatambula. Membo waze ahululu maakazala ni atu.

⁴ Kanda wivwa woma, kuuchi kevwa nawa sonyi; atu keechi kakulelesa nawa. Muukavulama sonyi ja ukweze we, chibwe yinyengo ya utuliwa we.

⁵ Tangi ye makabwa ngwe lunga lie, Jina lienyi Zambi Mukwa Ndundo Jeswe. Zambi Munangi wa Aisraele makakulamwina, kali mukwa kuyula hashi heswe.

⁶ Israele, yena uli ngwe pwo mwaha yoze uli ni chinyenge kuhiana mumu lunga lienyi hamulakula. Alioze Mwene Zambi kanakutambika uhiluke kuli iye, kanambe ngwenyi:

⁷ “Hinakwehuka ha shimbu likepe; mungukutambula nawa ni zango linji.

⁸ Ha shimbu likepe wika nakuvwilile ufwatulo, alioze mungukulweza zango liami ku miaka yeswe.” Chenacho anambe Mwene Zambi Mukwa Ndundo Jeswe.

⁹ “Ha matangwa ja Noa nalakenyene ngwami, chichi kutuma nawa sanga lia meya hashi. Haliabwila ngunalakenya ngwami, chichi kunutenukina nawa; chichi kunumwesa nawa lamba.

¹⁰ Milundu ni mindundena muyihasa kubuzuka, alioze zango liami kuli yenu kulichi kahwa nichimwe, nyi munufunga Usendo wami wa uhwimino ku miaka yeswe.” Chenacho anambe Mwene Zambi yoze wakunuvwila keke.

Yerusaleme mwaha

¹¹ Mwene Zambi kanambe ngwenyi: “Aa Yerusaleme, limbo lia lamba, mukwa muhongono, wakuhi yoze makutakamisa kama, mungutungulula fundamentu ye ni mawe a ndando yinji.

¹² Mungukatunga mazuwo je asuku, akukoleka ni rubi, mawe a ndando yinji, yajilo ye muyikabwa ya mawe alejima ngwe kahia, ni yipanga ya mawe a ndando yilemu.

¹³ “Yami mwene mungukalongesa atu je, ni kwawahisa ni kwahwimisa.

¹⁴ Ululi ni umwenemwene muukakutakamisa. Akwa kole keechi kakubinjisa nawa chibwe kukuvwisa mwongo.

¹⁵ Nyi umwe makasa jita ni yena, machilinga ku zango lienyi mwene; mweswawo makalimika ni yena makalimbuka.

¹⁶ “Yami nakutanga fuli, yoze wakuheha mwaze ni kufula yitwa ya jita. Nakutanga nawa kajita, yoze wakushiha atu ni ye yitwa.

¹⁷ Alioze chitwa cha jita nichimwe muchihasa kukulemeka; muukabwa ni kumbululo kuli eswe waze maakakusuma. Mungukafunga tuvumbi twami ni kwakwasa kukumba.” Mwene Zambi hachamba.