Izaya 53 - Mukanda Wa Zambi 1970

¹ Mavungu maakumbulula ngwo: Iya te mahasa kufuliela kama sango jetu? Iya te mahasa kumona kama ndundo ja Mwene Zambi mu yuma yino?

² Mwene Zambi mwe wazangile ngwenyi, kavumbi kenyi atatuke ngwe chibuta chize chinatande miji mu mavu omu. Mwe kavumbi te keshi ubeme wa mujimba hanji wa ku meso, hanga tumutale. Te keshi uhenya, te keshi ni Chuma chize muchitukoka kuli iye.

³ Yetu yitumulelesa, yitulituna ye; yalihumikiza ni yikola ni lamba. Kukushi niumwe yoze te mahasa kumutala! Yitumulelesa ngwe mutu wamokomoko.

⁴ “Alioze yalihumikiza ni lamba lize te chatutamba kumona yetu, ni yikola yize te chatutamba kwivwa yetu. Alioze yitumona ngwetu, Zambi unamumwesa lamba.

⁵ Alioze Zambi yamulemeka mumu ha milonga yetu, yamulamba mumu ha ungulungulu wetu. Kanatuwuku ku lamba lize amwene, kanatuhindwisa ku mijiji yenyi.

⁶ Yetu eswe twabwile ngwe mapanga waze haanatoko, mutu mweswe yaya mu jila yenyi mwene. Alioze Mwene Zambi yamumwesa lamba, lamba lize te chatutamba kumona yetu.

⁷ “Yaamumwesa lamba kuhiana, alioze yalihumikiza nalio ni kulikehesa; kahanjikile ko liji nilimwe. Ngwe mwana panga yoze anatwala ku chishihilo, ngwe panga yoze anambe kukamba wona, kahanjikile ko liji nilimwe.

⁸ Yaamukwata, yaamubatwila, yaamutwala akamushihe, niumwe kamubalile ko, yaamushiha mumu ha milonga ya atu jetu.

⁹ Fuka lienyi yilibwa hamwe ni yingulungulu, yamufunda hamwe ni pichi, chibwe kalingile ko chibi nichimwe hanji kuhanjika limwe liji lia mahuza.”

¹⁰ Mwene Zambi kanambe ngwenyi: “Yami nazangile ngwami, iye amone lamba; kufwa chenyi chabwile mulambu hanga akonekene akwa hashi. Ha chino makamona vungu lienyi; makabwa ni mwono wa miaka yinji, upale wami muukamanunuka mumu hali iye.

¹¹ Muze hamona lamba, makawahilila nawa; makanyingika ngwenyi, chamwene lamba chamokomoko. Kavumbi kami mukwa ululi, yoze nakuwahilila nenyi, makamubatwila hanga amone lamba lize te atu akwo chaatamba kumona. Mungukaakonekena mumu hali iye.

¹² Ha chino mungukamwaha muhela wa vumbi mukachi ka atu a tachi ni alemu. Yafwa ku zango lienyi mwene, yamwalula mukachi ka yingulungulu. Yambata shili ya atu anji, yalemba ngwenyi: ‘Akonekene kama.’ ”