Izaya 52 - Mukanda Wa Zambi 1970

Zambi malamwina Yerusaleme

¹ Yerusaleme likoleze, bwako nawa ni tachi ni lufuma! Limbo lia chijila lia Zambi, zala mahina abema! Yilima keechi kanjila nawa mu yikolo ye.

² Yerusaleme, likukumune, utusuke! Katuka mu fufuta, utwame ha chitwamo che cha wanangana! Utusuke mu ngoji, funge wa Zione!

³ Mwene Zambi kanambila atu jenyi ngwenyi: “Muze nwalumukine ndungo, kaanulanjile ko ni mbongo; Chenacho nawa keechi kahana jimwe mbongo ha kunukula.

⁴ Muze nwayile ni kutunga mu chifuchi cha ungeji mu Egiptu, nwayile mu zango lia yenwene. Alioze Aasuria yaanutwala ni tachi ku chifuchi cho, kaafwetele ko Chuma nichimwe.

⁵ Haliabwila ku Babilonia neko hikwabwa nawa chizechene. Nuli funge, kaanufwetelele ko Chuma nichimwe. Waze akunuyula kaakulichichimieka tuhu, ni kungulelesa yami.

⁶ Tangwa kumulikeza lize munukanyingika ngwenu, yami nguli Zambi, hingunahanjika ni yenu.”

⁷ Kuwaha chahiana ha kumona kanganda kaneza ha milundu, kaneza ni sango jibema, sango ja uhwimino! Kanambujola chize Zambi hakumba; kanalweze Yerusaleme ngwenyi: “Zambi ye mwe mwanangana!”

⁸ Waze akufunga limbo kaanakololoka, kaanakololoka ni chiseke! Maahasa kumona ni meso jo ene chize Mwene Zambi kanahiluka mu Yerusaleme!

⁹ Kolojokenu ni chiseke, yenu yikulu ya Yerusaleme! Mwene Zambi kumalamwina limbo lienyi ni kutakamisa atu jenyi.

¹⁰ Mwene Zambi ni kwoko lienyi lia linanga, kumaakalamwina atu jenyi; akwa hashi eswe kumaakachimona.

¹¹ Yenu waze nwatwama mu Babilonia tuhukenu mo, yenu eswe waze nwakumbata yikashi ya mu zuwo lia Zambi. Kanda nukwata ku Chuma nichimwe cha luchisa; lifungenu, nuli akwa chijila, tuhukenu.

¹² Ha chisuho chino kunuchi kakatuka nawa kapupushi; kunuchi kachina cha kuchina. Mwene Zambi yenu makanutetekela, ni kunufunga sali lieswe.

Lamba lia kavumbi ka Mwene Zambi

¹³ Mwene Zambi kanambe ngwenyi: “Kavumbi kami makawaha mu milimo yenyi; atu maakamulemesa kuhiana.

¹⁴ Atu anji evwile kubiha muze amumwene; chifwa chenyi yichalumuka, kuchabwile ko nawa ngwe cha mutu.

¹⁵ Alioze haliabwila mavungu anji maakomoka muze maamumona, mianangana maahola yiholehole. Kumaamona ni kunyingika chuma chize kanda anyingika kama.”