Izaya 51 - Mukanda Wa Zambi 1970

Maliji akutakamisa akwa Yerusaleme

¹ Mwene Zambi kanambe ngwenyi: “Ngubanjikenu yenu nwazanga anulamwine, yenu waze nwakwiza kuli yami hanga ngunukwase. Talenu ku luliwe luze anuchijile, ku wina uze anutuhwishile.

² Nyongenu kashakulu kenu Abrahama, ni Sara, yoze wanusemene. Muze natambikile Abrahama, te keshi ana, alioze yingumuwahisa, yingumwaha ana; yingwokesa vungu lienyi.

³ “Mungulembejeka Yerusaleme, ni eswe waze atwama mu yikulo yenyi. Chibwe chifuchi chenyi hichinabu puya, mungukachipwisa munda wa chinuno, ngwe munda wa Edene. Mukukabwa chiseke ni uwahililo, ni miaso ya uhaliso ni kusakwilila.

⁴ “Atu jami, ngubanjikenu, ivwenu yize ngunanwambe ngwami, ngunalongesa akwa mavungu; ululi wami muwapangulwisa.

⁵ Mungukeza nikawashi ni kwalamwina; tangwa lia kukumba chami hiliakundama. Yami mwene mungukayula mavungu. Atu a ku yifuchi kusuku kaakungushimbwila; kaakushimbwila ni kusako mbunge ngwalamwine.

⁶ “Talenu kwilu, talenu hashi! Lilu mulikajimuka ngwe mwishi; hashi muhakapapuluka ngwe chibuzu cha hina, ni e atu jaho eswe kumaakafwa ngwe tututu. Alioze ulamwino wami muukabwa ko ku miaka yeswe, ni ululi wami kuuchi kahwa nichimwe.

⁷ “Ngubanjikenu, yenu nwanyingika yize yinalite, yenu nuli ni longeso liami mu mbunge jenu. Kanda nwivwa woma muze atu maanuchoka ni kunusaula;

⁸ kumaakabatwoka ngwe mahina waze haanaliwa kuli yiswa! Alioze ulamwino wami muubwa ko wa miaka yeswe, ni ululi wami kuuchi kahwa nichimwe.”

⁹ Mwene Zambi, katuka, utukwase! Tulamwine ni ndundo je; linga ngwe chize walingile ku shakulu. Yena wabatwile kashitu munene wa mu kalunga lwiji yipinji yipinji.

¹⁰ Yena nawa womishine kalunga lwiji, yiutema jila mu meya, hanga waze wakulile azauke.

¹¹ Atu waze wakulile maakeza ku Yerusaleme ni uwahililo, nikwimba nikukololoka ni chiseke. Maakawahilila ku miaka yeswe, muze lamba ni yinyengo hiyahwa.

¹² Mwene Zambi kanambe ngwenyi: “Yami nakunutakamisa. Kuchi nwakuvwila woma mutu yoze mafwa ngwe mwambu?

¹³ Hinunavulama Mwene Zambi yoze wanutangile, yoze wazazulwile lilu, yoze wasele fundamentu ya hashi? Ngwe kuchi nwakuvwila woma waze akunuhungumiona, ni waze haanalulika ni kunwonona? Ufwatulo wo kuuchi kanulinga nichimwe.

¹⁴ Funge ha shimbu likepe maakaatusula; Kumaakabwa ni mwono wa miaka yinji, maakabwa ni yakulia yinji.

¹⁵ “Yami nguli Mwene Zambi, Zambi yenu; nakuvundula kalunga lwiji ni kuchungula miavu yenyi. Jina liami lili Mwene Zambi Mukwa Ndundo Jeswe!

¹⁶ Yami nazazulwile lilu, yingusa fundamentu ya hashi; ngunambila akwa Yerusaleme ngwami: ‘Nuli atu jami! Hingunanulongesa, nakunufunga ni kwoko liami.’ ”

Songo lia lamba lia Yerusaleme

¹⁷ Yerusaleme, laula! Hinduka, ukatuke! Hiunanu musenge wa lamba uze Mwene akunwishine ni ufwatulo wenyi; hiunanu ni je ndoka, hiunapiepieta.

¹⁸ Kumushi niumwe yoze makusongwela, niumwe hakachi ka atu je makukwata ku kwoko.

¹⁹ Lamba lino hali hiliakuwana: chifuchi hachenyeka ni jita, ni atu je haafwa zala. Kukushi niumwe yoze makulembejeka.

²⁰ Ha konda ya jila jeswe atu je kaanalisenye ni mulekeleke; ngwe kai yoze unafu mu lwoji. Haakwachika mu ndundo ja ufwatulo wa Zambi.

²¹ Yenu akwa lamba mu Yerusaleme, nwakupiepieta ngwe hinwazenga.

²² Mwene Zambi, Zambi yenu, kananuhakwila nikwamba ngwenyi: “Ngunachiza musenge uze nanunwishine ni ufwatulo wami. Kunuchi kanwa nawa vinyu yize nwakupiepieta nayo.

²³ Mungukauhana kuli waze anubinjishile; kuli waze anubombesele hashi mu majila ni kunuliataliata ngwe nuli fufuta.”