Izaya 50 - Mukanda Wa Zambi 1970

¹ Mwene Zambi kanambe ngwenyi: “Nunanyongo ngwenu, hinunahange atu jami ngwe chize lunga akuhanga pwo lienyi, nyi? Mba yilihi ye mikanda yakulakwila? Nunanyongo ngwenu, nanulanjishile mu undungo, ngwe chize mutu akulanjisa ana jenyi ngwe ndungo, nyi? Ka, nwayile mu undungo mumu ha milonga ya yenwene; nanuhumine mumu ha yitela yenu.

² “Mumu yika atu jami kaatayijile ko muze nayile ni kwalamwina? Mumu yika kaangukumbulwile ko muze naatambikile? Kuma tachi jami jili jikepe ja kwakula, nyi? Ngunahase kumisa kalunga lwiji ni liji; ni kwalumuna njiji jibwe puya, hanga yishi waze alimo afwe mumu kunushi meya.

³ Ngunahase kwalumuna lilu kubwa milima, ngwe yoze unazala mwanji muze analili mufu wenyi.”

Kwononoka cha kavumbi ka Mwene Zambi

⁴ Mwene Zambi yangulongesa chize chatamba kwamba, hanga nguhase kutakamisa akwa mulekeleke. Chichamene cheswe kakungulawisa, Hanga ngubanjike kanawa yize anangulongesa.

⁵ Mwene Zambi hanangujikula matwi, Chakolemene, chapiangukile.

⁶ Nakunjikile nyima yami kuli waze angulambile. Chaakanjishile ko muze angusawile, muze angusuchile wevu, ni kungufwila mate ku meso.

⁷ Kusaula cho kuchanguvwishile ko chinyengo. Mumu Mwene Zambi kakungukwasa. Nakulikoleza ni kulihumikiza no. Ngunanyingika ngwami, chichi kevwa sonyi,

⁸ mumu Zambi kali hehi ni yami, mangupwisa mukwa kusamba. Iya mahasa kungusuma mulonga? Tuyenu hamuwika ku chota cha Kusopela! Mwechenu angusume mulonga!

⁹ Mwene Zambi kakunguhakwila, iya kevwe mahasa kunguhisa? Akwa kungusuma milonga kumaakabubujoka; kumaakabatwoka ngwe mahina waze anali kuli ndulu.

¹⁰ Yenu eswe waze nwakulemesa Mwene Zambi ni kwononokena maliji a kavumbi kenyi, jila yize nwakwenda muyihasa kubwa milima bwii, alioze jikijilenu hali Mwene Zambi. Shachilenu hali Zambi yenu.

¹¹ Yenu eswe nwakutwama punga ja kwonona akwenu, makanushiha mumu ha punga jenu. Mwene Zambi mwe makachilinga; lamba linji munukamona.