Izaya 5 - Mukanda Wa Zambi 1970

Mwaso wa munda wa vinyu

¹ Banjikenu muze ngunembi mwaso uno; uli mwaso wakutwala kuli sepa liami ni munda wenyi wa vinyu. Sepa liami yabwa ni munda wenyi wa chinuno ha mulundu.

² Yauchiba ni kuchiza mo mawe, yatumba mo mitondo ya vinyu yiyema. Yautungila zuwo lisuku lia kuufunga, yafula mo wina wa ukamino, Mba yashimbwila mihuko yibema ya vinyu, alioze yimwima lume mihuko yisasu.

³ Kashika sepa liami yamba ngwenyi: “Yenu akwa Yerusaleme ni Ayuda, batulenu hakachi ka yami ni munda wami wa vinyu.

⁴ Chimwe Chuma chasala ko chize chalingile mu munda wami, nyi? Mba mumu yika, nashimbwilile ngwami wime mihuko yibema, alioze yikwima mihuko yisasu?

⁵ “Mungunulweza chize mungulinga munda wami wa vinyu. Munguchiza ko mitondo ya mingonga yize yajingilika we munda; mungubuzula chipanga chawo hanga auliateliate.

⁶ Munguupwisa ngwe chihutu, chichi kausalula chibwe kuusangula, hanga ukasoke mikalale ni mingonga. Mungukanjisa vula ha kunoka mo.”

⁷ Israele kaali munda wa Mwene Zambi Mukwa Ndundo Jeswe; Ayuda kaali vinyu yakutumba, Zambi yaashimbwila hanga alinge chize chinalite, alioze ayo yaashiha atu. Yaashimbwila hanga alinge yuma ya ululi alioze atu waze Aisraele haabinjisa, yaalila ha kwabatwila ni ululi.

Yibi yize akulinga atu

⁸ Lamba lienu! Nwakulanda mazuwo ni minda yakuwezela ku yize nuli nayo kulu. Shimbu likepe muhela wa atu akwo kuuchi kubwa ko, munusala ukawenu mu chifuchi.

⁹ Nevwile Mwene Zambi Mukwa Ndundo Jeswe nikwamba ngwenyi: “Mazuwo eswe waze anene, abema kumaabwa ahululu.

¹⁰ Munda wa vinyu wa metro 100 muwima wika litro nake ya vinyu; ni kilo 118 ja mbuto, muwima shina kilo 18 a mihuko.”

¹¹ Lamba lienu! Yenu nwakuhinduka ha chichamene cheswe ni kubutula kunwa vinyu, ni kuzengewa ndoo chingoloshi cheswe.

¹² Mu yiwanyino yenu nuli ni tulialia ni tungoma ni ndembo, ni vinyu. Alioze kunushi kunyingika yize akulinga Mwene Zambi.

¹³ Kashika akwa kole maakanutwala funge mu chifuchi cha yilambala. Miata jenu maakafwa ni zala, ni atu akwo maakafwa ni pwila.

¹⁴ Muma lia afu munevu zala mumu hali ayo, mumubakula kanwa liamo, mumuminya atu alemu a mu Yerusaleme, ni atu eswe akwo.

¹⁵ Atu eswe maakevwa sonyi; akwa kulengumuka eswe maakahomboka.

¹⁶ Alioze Mwene Zambi Mukwa Ndundo Jeswe kakusolola unene wenyi ni kulinga yuma ya ululi; kakusolola ulinange wenyi ha chize akubatwila atu jenyi.

¹⁷ Ana mapanga maalia mwambu mu yikulu ya membo, ni misamba a pembe maawana mo ulilo Ubema.

¹⁸ Lamba lienu! Kunwahashile kutusuka ku milonga yenu.

¹⁹ Nwakwamba ngwenu: “Mwene Zambi atambuke alinge chize anazange, hanga tuchimone. Zambi Munangi wa Aisraele alinge chize ananyongo; tumone manyonga jenyi.”

²⁰ Lamba lienu! Nwakuvuluka chibi ngwenu chibema, ni chibema ngwenu chibi. Nwakwalumuna milima yibwe Pangu, ni pangu libwe milima. Nwakupwisa chisasu chibwe chiyema, ni chiyema chibwe chisasu.

²¹ Lamba lienu! Nwakunyonga ngwenu, nuli akwa mana kanda akwa kukanyama.

²² Lamba lienu! Akwa lufuma wa kunwa vinyu, akwa hamu lia kuchingachinga vinyu yisasu!

²³ Nwakusambisa yingulungulu ni kutambula mbongo ja mbenga; nwakubinjisa mukwa kusamba hanga keechi kumubatwila ni ululi.

²⁴ Kashika ngwe chize kahia kakulalisa yiswaswa ni mwambu umu Chenacho miji yenu muyikabola ni yitemo yenu muyikalukumuka, ni kuhehuka ni fuji, mumu hinunehuka longeso lia Mwene Zambi Mukwa Ndundo Jeswe, Zambi Munangi wa Aisraele.

²⁵ Mwene Zambi yatenukina atu jenyi, yazoza kwoko lienyi hali ayo aamwese lamba. Mba milundu muyinyika, ni mijimba ya waze haanafwafwa maayihichika ngwe yiswaswa mu majila. Chibwe chocho utenu wa Mwene Zambi kuuchi kuhwa, hindu makazoza nawa kwoko lienyi ni kwamwesa lamba.

²⁶ Mwene Zambi kanatambika ni chilayi limwe vungu lize liatwama kusuku. Kanaatambika ni muluzu akakatuke ku masongo ja hashi. Talenu kaaneza nikawashi!

²⁷ Hakachi ko kuheshi niumwe unahongo, niumwe unatalinga, kaasolo kunongwoka hanji kubomba. Muya wo niumwe kuushi kujituka, lwoji wa sapato niumwe unabatuka.

²⁸ Mivwi yo yakukalula, mata jo akulema kulu. Sende ja tuvwalu two jinakale ngwe liwe, matemba jo kaanende ngwe chijimbi.

²⁹ Tujita kaanakenana ngwe tambwe waze haakwata kashitu, niumwe mahasa kwatambula yo.

³⁰ Muze tangwa lize mulikeza, maakakenanyina Aisraele ngwe lundunjila wa kalunga lwiji. Achitalenu chifuchi chino! Milima ni kubinda! Pangu linalaa!