Izaya 49 - Mukanda Wa Zambi 1970

Israele pangu lia mavungu

¹ Ngubanjikenu yenu mavungu, yenu waze nwatwama kusuku! Muze te kanda nguchisemuka, Mwene Zambi te hanangutambika, yangutongola kubwa kavumbi kenyi.

² Yapwisa maliji jami ngwe mukwale wa kuhela. Yangufunga mu kwoko lienyi. Yangupwisa ngwe mwivwi, wakukalula ha kwasa nawo.

³ Yangwamba ngwenyi: “Israele yena uli kavumbi kami; mumu hali yena atu maakangulemesa.”

⁴ Yingwamba ngwami: “Hinahondangana, alioze kufumbuka chakuhi.” Hindu ngunashachila hali Mwene Zambi hanga awahise milimo yami; makangukundulula mumu ha yize nakulinga.

⁵ Muze te kanda nguchisemuka, Mwene Zambi te hanangutambika; yangupwisa kavumbi kenyi hanga nguhilwise atu jenyi, nguhilwise mbunga ya Aisraele waze haanamwangashana. Mwene Zambi hanangulemesa; kali chishina cha tachi jami.

⁶ Mwene Zambi yangwamba ngwenyi; “Yena kavumbi kami, nguli ni milimo yikwo yinene yahiana. Hi ya kuhilwisa wika ko ulemu wa masalila ja atu jami Aisraele, alioze ya kukupwisa nawa pangu lia mavungu hanga akwa hashi eswe akaalamwine.”

⁷ Zambi Munangi wa Aisraele kanda Mukwa Kwakula kanambila kavumbi ka akwa kuyula yoze akulelesa ni kuvutwokela kuli mavungu, ngwenyi: “Mianangana maakamona chize muukatusuka, maakakatuka ni kukulemesa. Ana ja mianangana a malunga no maakachimona nawa, kumaakafukama ku meso je ni kukulemesa.” Chino muchikabwa mumu Mwene Zambi hanatongola kavumbi kenyi; Zambi munangi wa Aisraele hanamanununa yilakenyo yenyi.

Kutungulula cha Yerusaleme

⁸ Mwene Zambi kanambila atu jenyi ngwenyi: “Muze tangwa lia kunulamwina mulikaheta, mungukanulweza utu, mungukakumbulula ku kuteta chenu. Mungukanufunga ni kukolesa Usendo ni mavungu eswe mumu hali yenu. Mungukanuhilwisa nawa mu chifuchi chenu chize chili chahululu haliabwila.

⁹ Mungukambila funge ngwami: ‘Tusakenu!’ ni kuli waze ali mu milima ngwami: ‘Tweyenu mu pangu!’ Kumaakabwa ngwe mapanga waze anali ha milundu;

¹⁰ Keechi keevwa zala chibwe pwila. Chivukuminya cha tangwa ni cha mu puya kuyichi kaabinjisa nawa, mumu yoze wakwazanga makaasongwela. Kumakaasongwela ku shima lia meya.

¹¹ “Mungukatema jila yinene ha milundu ni kululikila atu jami jila yize chaatamba kwendela mo.

¹² Atu jami kumaakakatuka kusuku, ku norde, ni ku chitokelo, ni ku limbo lia Aswane ku sude.”

¹³ Yena lilu, kololoka ni uwahililo, yena hashi likwize! Yenu milundu imbenu! Mwene Zambi makalembejeka atu jenyi; kumakevwila atu jenyi keke, waze ali mu lamba.

¹⁴ Alioze akwa Zione yaamba ngwo: “Mwene Zambi hanatwehuka! Hanatuvulama.”

¹⁵ Alioze Mwene Zambi ngwenyi: “Kuma umwe pwo mahasa kuvulama mwanenyi yoze anamwisa, nyi? Kechi kuvwila keke mwana yoze hasema iye mwene, nyi? Chibwe mama mahasa kuvulama mwanenyi, yami chahashile kunuvulama nichimwe.

¹⁶ Yerusaleme, chahashile kukuvulama nichimwe! Jina lie hingunalisoneka ha mbanda moko jami.

¹⁷ “Atu waze maakakutungulula kumeeza, ni waze akubuzwile kumaakatuka.

¹⁸ Tala sali ni sali, umone yize yili ko! Atu je kaanalikungulula, kaaneza ku mahie! Mwene Zambi ngwenyi: “Ni mwe yami mwene, kumuukawahilila ni atu je, ngwe chize nandungi akuwahilila ni yingeliengelie yenyi.

¹⁹ “Chifuchi che chabwile chakwenyeka, chahululu, alioze muchikabwa chikehe mumu hali atu jami waze aneza ni kutunga mo. Atu waze achonwene kumaakabwa kusuku ni yena.

²⁰ Atu je waze asemukinyine mu undungo, limwe tangwa kumaakakwamba ngwo: ‘Chifuchi chino chahiana kukeha, tusele chifuchi chinene tutwame mo!’

²¹ Mba muukalihula ngwe: ‘Iya wangusemenene ana wano eswe? Nabwile mumba, hingunafwisa ana jami eswe. Akwa kole yaanguhanga, yaangutwala mu undungo. Mba iya walelele ana wano? Yami nabwile ukawami, mba wano eswe kulihi anakatuka?’ ”

²² Mwene Zambi kanambila atu jenyi ngwenyi: “Mungukatekula mavungu, mba maakaneha ana jenu ku chifuchi chenu.

²³ Mianangana maakabwa ngwe atatenu; miazovu ngwe anoko. Kumaakafukama kuli yenu ni kunulemesa; kumaakalikehesa ni kunulweza vumbi. Mba munukanyingika ngwenu, yami nguli Mwene Zambi; atu waze akungushimbwila ngwakwase, keechi kevwa sonyi.”

²⁴ Kuma munuhasa kutambula yuma yize kajita habuba, nyi? Munuhasa kutusula funge kuli chitakame, nyi?

²⁵ Mwene Zambi ngwenyi: “Chenacho muchikabwa. Funge a kajita kumaakaatusula; yuma yize chitakame abubile maakayitambula. Mungukalimika ni yoze makalimika ni yenu, mungukalamwina ana jenu.

²⁶ Mungukashinjika waze akunubinjisa akalishihe ene; kumaakazengewa ni manyinga ni ufwatulo. Mba mavungu eswe maakanyingika ngwo, Yami nguli Mwene Zambi, yoze wakunukula ni kunutusula. Kumaakanyingika ngwo, yami mwe Zambi ya Ndundo ya Aisraele.”