Izaya 48 - Mukanda Wa Zambi 1970

Zambi kakuyula yuma yize muyiza ho

¹ Banjikenu yenu Aisraele, yenu vungu lia Yuda. Yenu nwakulishinga ni jina lia Mwene Zambi, nwakwamba ngwenu, nwakuwayila Zambi ya Aisraele, alioze mahuza jenu.

² Nwakulisamba nikwamba ngwenu, nuli akwa limbo lia chijila, nawa ngwenu, nwakujikijila hali Zambi ya Israele, jina lienyi Mwene Zambi Mukwa Ndundo Jeswe.

³ Mwene Zambi kanambila Israele ngwenyi: “Ku shakulu shimbu kanda nambujolele yuma yize muyikabwa, mba susumuku hiyabwa.

⁴ Te hingunanyingika ngwami, yenu munubwa akwa pami, atu akalu lume.

⁵ Chenacho nanwambujolele shimbu kanda, shimbu te kanda yichibwa, hanga kunuchi kwamba ngwenu, mahamba jenu enoo haayilinga.

⁶ “Yuma yeswe yize nambujolele shimbu kanda, hiyabwa; chanutamba kutayiza ngwenu, longeso liami lili liamwenemwene. Haliabwila mungunwambulwila yuma yaha yize muyikeza, yize kanda nguchisolola.

⁷ Shina haliabwila lume ngunamanununa yuma yino; nichimwe ngwe chino kuchabwile ko ku shakulu. Nyi chinakabwa ko, kachi te munwamba ngwenu: Yino yeswe twayinyingika kulu.

⁸ Te ngunanyingika ngwami, hi nuli atu aumwenemwene ko mumu matangwa eswe nwakungukatukila. Kashika kunwevwile nichimwe cha yino yeswe, kashika kunwevwile liji nilimwe.

⁹ “Chichi kutenuka nawa, chichi kunwonona, hanga atu achichimieke jina liami.

¹⁰ Hingunanweseka mu kahia ka lamba, ngwe chize atu akweseka prata mu lutengo. Alioze namona ngwami, nuli atu amokomoko.

¹¹ Yize hingunalingi nayilingile mumu hali yami mwene. Chichi kutayiza atu kusaula jina liami, chibwe kuhana uhenya wami kuli mutu mukwo, muubwa lume wa yami mwene.”

Siruse tetekeli yoze atongwele Mwene Zambi

¹² Mwene Zambi kanambe ngwenyi: “Aisraele atu waze natambikile, ngubanjikenu! Yami nguli Zambi, mwe mutangu, ni mwe kasulasongo, nguli mwe Zambi wika!

¹³ Ni moko jami hingunase fundamentu ya hashi, yinguzazulula lilu. Muze nakutambika hashi ni lilu, kuyakwiza nikawashi ku meso jami.

¹⁴ “Yenu eswe kundamenu, nubanjike! Niumwe hakachi ka mazambi kahashile ko kwambulula shimbu kanda ngwo, mutu yoze natongwele makasa jita ni akwa Babilone; makalinga cheswe chize ngunazange alinge.

¹⁵ Yami nahanjikile, yami namutambikile; namusongwelele, namuwahishile.

¹⁶ “Haliabwila ngukundamenu, nubanjike chize ngunambe. Chize ku Ubutukilo nahanjikile mwazu, matangwa eswe maliji jami yaamanunuka.” (Haliabwila Mwene Zambi Mukwa Ndundo Jeswe hangwaha tachi jenyi, hangutuma.)

Manyonga ja Mwene Zambi mumu hali atu jenyi

¹⁷ Zambi Munangi wa Aisraele, Mwene Zambi, Mukwa Kunukula, kanambe ngwenyi: “Yami mwe Mwene Zambi, Zambi yenu, ngunazange kunulongesa ni kunuwahisa, ni kunusongwela mu jila yize chanutamba kuya.

¹⁸ “Mala! Nyi nwabanjikile kama Shimbi jami! Kachi nanuwahishile kuhiana ngwe lwiji yoze keshi kuma. Kachi nwakumbile kuhiana, ngwe chize miavu ya tachi yakulamba ku mbumbulu ya kalunga lwiji.

¹⁹ Kachi vungu lienu mulikabwa anji ngwe masekeseke, kachi nasele tachi hanga keechi kufwa.”

²⁰ Tuhukenu mu Babilone nutusuke! Kololokenu sango jino ni uwahililo, Ambujolenu kweswe ngwenu: “Mwene Zambi hakula kavumbi kenyi Israele!”

²¹ Muze atwalile mu puya keevwile ko pwila, yaasela meya mu liwe; yabula liwe, mba meya yaapukumuka.

²² Mwene Zambi kanambe ngwenyi: “Yivulumunyi keechi kubwa ni uhwimino.”