Izaya 47 - Mukanda Wa Zambi 1970

Ubatwilo wa Babilone

¹ Mwene Zambi ngwenyi: “Babilone, katuka ha chitwamo che, twama hashi mu fufuta. Hatangu wabwile ngwe mwana pwo yoze kanda achilimona ni lunga limbo lize kanda achikumba. Alioze kuushi nawa ni mujimba unovula ni ubeme! Haliabwila uli ndungo!

² Yako ku utwilo, utwe wunga! Chiza Wanda we! Zula mahina je abema! Kanya mahina je uzauke yitwetwe!

³ Atu maakakumona uselesele; maakamona chize Unevu sonyi. Mungukanukala, niumwe kechi kangukanjisa.”

⁴ Zambi Munangi wa Israele hanatukula; jina lienyi Mwene Zambi Mukwa Ndundo Jeswe.

⁵ Mwene Zambi kanambila Babilone ngwenyi: “Twama mu milima uhole kuluu. Atu keechi kukuvuluka nawa ngwo: ‘Mwanangana wa mavungu wa pwo.’

⁶ Natenukinyine atu jami; nalimikine no ngwe keeshi nawa atu jami: yingwakunjika mu moko je. Alioze yena kuwevwilile ko keke; chibwe tushinakaji wamwesene lamba.

⁷ Yiunyonga ngwe, mungubwa mwanangana wa pwo matangwa eswe, yuma yino kuwayisele ko mbunge, hanji kunyonga songo liayo.

⁸ “Banjika, yena wakuzanga chiseke, wakunyonga ngwe yena uli mu uhwimino. Wakwamba ngwe uli munene ngwe Zambi, kukushi nawa mukwo walifwa ngwe yena, kuuchi kabwa tuliwa nichimwe hanji kuuchi kafwisa ana je.

⁹ Alioze yino yuma yeswe muyikakuwana susumuku, ha tangwa limuwika lume. Chibwe wakujikijila ha kando je muukafwisa lunga lie ni ana je.

¹⁰ “Hiunajikijila ha ungulungulu we, yiwamba ngwe, niumwe makumona. Mana je ni yinyingi ye yiikupiangula, yiulihanjikisa ngwe, ‘Yami mwe Zambi, kukushi nawa mukwo walifwa ni yami.’

¹¹ Lamba mulikakuwana, kando je kujichi kalikinda. Kuji ni tomo muyikakulundumukina susumuku, kuyichi kahasa kulinga nichimwe!

¹² Jikijila ha kando ni mbinga ye, yize wakulinga nayo chize kuwanuke we, hanji muyikukwasa; hanji muuhasa kuvwisa akwa kole je mwongo.

¹³ Kuushi tachi, chibwe akwa mana kaakukulongesa. Tahi eze akulamwine, atu waze akulilongesa kutala matongonoshi, waze akuhengula yuma ya lilu ni kukulweza kakweji ni kakweji yuma yize muyikakuwana.

¹⁴ “Kumaakabwa ngwe yiswaswa, kahia mukaakalesa upu! Keechi kahasa kulilamwina ene, mumu milengi muyikalekwoka hali ayo, hi kahia kakwota ko alioze kakuwema.

¹⁵ Tahi waze te wakwita mana mu mwono we weswe, keechi kakukwasa nichimwe. Ayo eswe maakakuhichika ni kuya jila yo ene, kukushi niumwe yoze makasala ni kukulamwina.”