Izaya 46 - Mukanda Wa Zambi 1970

¹ “Lino lie songo lia mazambi ja limbo lia Babilone! Atu te kakuwayila mahamba Bele ni Nebo, alioze haliabwila haanaase hali yimbulu, haanaalongeza hali yimbulu waze haahonga.

² Mahamba waze kaahashile kulilamwina ene; atu haabuba, haaya no. Lino lie songo lia mazambi ja Babilonia!

³ “Ngubanjikenu, yenu vungu lia Yakoba, masalila eswe ja atu jami. Hingunanufungu chize ku tangwa lize nwasemukine.

⁴ Yami nguli Zambi yenu, mungunufunga, ndoo ku ushinakaji wenu ni kutoma cha kambu jenu. Yami nanutangile, mungunufunga, mungunukwasa, mungunulamwina.”

⁵ Mwene Zambi ngwenyi: “Neya munungweseka?” Kwali umwe mukwo walifwa ni yami, nyi?

⁶ Atu kaakubakula ngonga jo, kaakuhana oru; kaakweseka prata ha pezo. Kaakuhula fuli hanga afule hamba; mba kaakufukama ni kumukombelela.

⁷ Kaakumuzundula ha yipaya ni kumumbata; kakumusa hamwe homa, henaho akutwama. Mweswawo maliumba kuli iye, kechi kumukumbulula hanji kumulamwina ku lamba lienyi.

⁸ “Yenu yivulumunyi iwulukenu chino, shinginyekenu chize nalingile,

⁹ Iwulukenu yize yabwile ku shakulu; tayizenu ngwenu, yami mwe Zambi wika, kukushi mukwo walifwa ni yami.

¹⁰ Chize ku Ubutukilo, yingulumbununa yuma yize muyikeza kulutwe. Ku shakulu nambujolele shimbu kanda yuma yize muyikabwa ko. Yingwamba ngwami, manyonga jami keechi kwalumuka nichimwe, ngwami mungukalinga yuma yeswe yize nanyongene.

¹¹ Ngunatambika umwe mutu wa ku chivumbuko; neye makabwila hashi ngwe chiselele ni kumanununa yize nalakenyene kulinga. Hingunachambe, muchikalingiwa.

¹² “Yenu akwa pami, ngubanjikenu, waze nwakunyonga ngwenu, kukumba chili kusuku.

¹³ Nakuneha tangwa lia kukumba, kulishi kusuku. Kukumba chami kuchichi kuvumewa. Mungukalamwina akwa Yerusaleme ni kulemesa Aisraele.”