Izaya 45 - Mukanda Wa Zambi 1970

Mwene Zambi yatongola Siruse

¹ Mwene Zambi yatongola Siruse kubwa mwanangana! Yamutongola kukumba mavungu; yamutuma kulekumwisa mianangana; Mwene Zambi makasujola yajilo ya membo ku meso jenyi. Mwene Zambi kanambila Siruse ngwenyi:

² “Yami mwene mungululika jila ye, ni kusalamisa milundu ni mindundena. Mungumakuna yajilo ya unengu, ni mikungo yayo ya utale.

³ Mungukakwaha ubite wa muma mwa milima mwa ku tenga; mba muukanyingika ngwe, yami nguli Mwene Zambi, nawa ngwe, Zambi ya Aisraele hakutambika ha jina.

⁴ Ngunakutongola kukwasa kavumbi kami Israele, atu waze natongwele. Hingunakulemesa kuhiana, chibwe kuwangunyingikine.

⁵ “Yami nguli Mwene Zambi, kukushi Zambi mukwo. Mungukwaha tachi jize unahono, chibwe kuwangunyingikine.

⁶ Ngunachilingi hanga atu eswe a ku mambango eswe a hashi akanyingike ngwo, yami nguli Mwene Zambi, kukushi Zambi mukwo.

⁷ Yami nakutanga pangu ni milima; nakuwahisa ni nakumwesa lamba. Yami, Mwene Zambi nakulinga yuma yino yeswe.

⁸ Yami mwilu mungukakukwasa kukumba ngwe chize vula akukwasa atu, hashi muhakabakuka ni kutambula vula, hashi muhakabwa ni utuswilo ni ululi ngwe chize vula akutemwisa yitemo. Yami Mwene Zambi mungukalinga yuma yino.”

Mwene Zambi mwe Tangi kanda mukwa kusongwela akwa hashi

⁹ Uma muuhasa kuhamika ni tengi yawo, uma uze uli ngwe uma ukwo weswe, nyi? Uma muuhasa kuhula tengi yawo ngwenyi, yika unalingi, nyi? Uma muuhasa kulinyenga kuli tengi ngwenyi, kuushi mana akutenga Chuma, nyi?

¹⁰ Umwe uliko yoze mahamuka ni kwambila yisemi jenyi ngwenyi: “Kuchi wangusemene ngwe chino, nyi?”

¹¹ Mwene Zambi Munangi wa Israele, Yoze wakululika yuma yize muyikeza kulutwe kanambe ngwenyi: “Yenu kunwatelele kunguhula mumu nuli ana jami, hanji kungulweza chize Changutamba kulinga!

¹² Yami natangile hashi, ni atu waze atwama ho. Nazazulwile lilu ni ndundo jami; nakuyula tangwa, ni kakweji, ni matongonoshi.

¹³ Yami mwene hinakolesa Siruse amanunune kunyonga chami ni kululika yuma. Mungukalulamisa majila eswe waze makenda. Kumakatungulula limbo liami Yerusaleme, ni kutusula atu jami waze te atwama mu undungo. Niumwe makamufweta hanji kumwaha mbongo ja mbenga akachilinge.” Mwene Zambi Mukwa Ndundo Jeswe hachamba.

¹⁴ Mwene Zambi kanambila Aisraele ngwenyi: “Ubite wa yifuchi ya Egiptu ni Sudane muukabwa niwenu, ni malunga ataluka a ku chifuchi cha Seba maakabwa ndungo jenu; maakanukaula akukasa mu ngoji ja utale, maakafukama ku meso jenu ni kunuwayila ngwo: ‘Zambi kali hamwe ni yenu, iye wika kali Zambi.

¹⁵ Zambi ya Israele, yoze Wakulamwina atu jenyi, kali Zambi yoze waswama.

¹⁶ Eswe waze akusonga mahamba kumaakevwa sonyi; eswe a kuli ayo kumaakahetama.

¹⁷ Alioze Israele hanamulamwina kuli Mwene Zambi, kukumba chenyi muchikabwa ndoo ku miaka yeswe; atu jenyi keechi kevwa nawa sonyi nichimwe.’ ”

¹⁸ Mwene Zambi yatanga lilu, iye mwe Zambi wika! Iye yatanga hashi, yakolesa ho, kechele ho hahululu, alioze yakolesa ho hanga hakatwame atu. Iye mwene yamba ngwenyi: “Yami nguli Mwene Zambi, kukushi Zambi mukwo.

¹⁹ Chahanjikilile ko ku tenga, hanji kusweka manyonga jami. Chalwezele ko Aisraele kungufupila mu puya. Yami nguli Mwene Zambi, nakuhanjika umwenemwene; nakunyingika ni kulinga yize yinalite.”

Mwene Zambi ya hashi heswe ni mahamba a Babilone

²⁰ Mwene Zambi kanambe ngwenyi: “Akwa mavungu kungulukenu hamuwika, masalila a ku wanangana uze hiwafwa; tweyenu ku chota chakusopela! Atu waze endangana ni mahamba jo a mitondo, ni kuwayila mazambi waze kaahashile kwalamwina, atu waze kaanyingikine nichimwe!

²¹ Tweyenu nwambulule milonga yenu ku chota cha kusopela; akwa milonga alihule ene ni ene. Iya waliangile kwambulula shimbu kanda yiwape yize muyikabwa ko? Hi yami Mwene Zambi ko, chilamwina cha atu jami, nyi? Kukushi Zambi mukwo.

²² “Hilukenu kuli yami nulilamwine, yenu akwa hashi heswe! Yami mwe Zambi wika.

²³ Chilakenyo chami chili chamwenemwene, kuchichi kwalumuka. Nalishingile ngwami: atu eswe maakeza ni kufukama, ni kungulakenya ngwo, mutubwa akwa kushishika.

²⁴ “Kumaakatayiza ngwo, shina kuli yami kwe kuli kukumba ni ndundo; alioze eswe waze akunguvutwokela kumaakevwa sonyi,

²⁵ Yami, Mwene Zambi, mungukalamwina vungu lieswe lia Yakoba, no maakanguchichimieka.