Izaya 44 - Mukanda Wa Zambi 1970

Mwene Zambi wika mwe Zambi

¹ Mwene Zambi kanambe ngwenyi: “Israele kavumbi kami, haliabwila banjika; vungu lia Yakoba, atu jami waze natongwele.

² Yami nguli Zambi yoze wakutangile; nakukwashile chize ku kusemuka che. Kanda wivwa woma; yena uli kavumbi kami yoze natongwele, nakukuzanga.

³ “Munguhana meya ku chifuchi cha pwila; mungusa njiji ha mavu omu. Munguhinjila Mwiku wami hali ana je; munguwahisa vungu lie.

⁴ Kumaakabwa ngwe mwambu wa wisu hehi ni meya, ngwe yiseso yize yili ku mbumbulu ya lwiji yize yinazala ni meya.

⁵ “Mutu ni mutu kanambe ngwenyi: ‘Nguli wa mbala wa Mwene Zambi.’ Kumaakeza ni kulichinga ni Aisraele. Mutu mweswe makasoneka jina lia Mwene Zambi ha kwoko lienyi ni kulivuluka ngwenyi, nguli umwe wa kuli atu ja Zambi.”

⁶ Mwene Zambi yoze wakuyula ni kufunga Aisraele, Zambi Mukwa Ndundo Jeswe kanambe ngwenyi: “Nguli mutangu ni kasulasongo, mwe Zambi wika; kukushi Zambi mukwo shina yami.

⁷ Kuli mukwo yoze mahasa kulinga chize yami nalingile, nyi? Iya te mahasa kwambulula shimbu kanda, yuma yeswe yize muyikabwa ko, chize ku Ubutukilo ndoo ku songo?

⁸ Yenu atu jami, kanda nwivwa woma! Nunanyingika ngwenu, chize ku shakulu ndoo ni musono hingunaliange kwambulula shimbu kanda yuma yeswe yize muyikabwa ko; yenu nuli yela jami. Kuli Zambi mukwo, nyi? Kuli Zambi mukwo wa tachi yoze Chanyingikine, nyi?”

Mukwa munanyi yalelesa mahamba

⁹ Akwa kusonga mahamba kaali atu amokomoko, ni e mazambi waze akulemesa kaali amokomoko. Atu waze akuwayila mazambi waze kaali tupuputa kaanyingikine nichimwe, sonyi maakevwa.

¹⁰ Hi chibema ko kufula hamba wa utale ni kumuwayila ngwe umwe zambi.

¹¹ Eswe waze akumuwayila maakevwa sonyi. Atu waze akusonga mahamba kaali lume atu. Eze kwo ku chota cha kusopela, kumeevwa mwongo ni sonyi.

¹² Tuli kakwanda utale nikuusa ha jiko. Mba kakufula ni kwoko lienyi lia tachi ni mweto. Muze akufula kakwivwa zala ni pwila, kakuhonga.

¹³ Songi kakweseka mutondo. Kuufunjika ni sonekeso, kakuutota ni shizo jenyi, nikulifwa ni ubeme wa mutu, hanga amunangike mu zuwo lienyi.

¹⁴ Tangwa likwo mabatula mitondo sedru, hanji shene, hanji Shipre ya mu usaki. Hanji majika muyombo ni kushimbwila vula hanga utatuke.

¹⁵ Mutu kakwanda Chipinji cha mutondo ni kuchisa ha jiko, Chipinji chikwo machisonga hamba. Chipinji chitangu machisa ha jiko atenge kunyi hanga ote ni kwocha ho mbolo; Chipinji chikwo machipwisa zambi hanga amuwayile.

¹⁶ Chipinji chitangu mocha ho yifwo, malia, makuta. Mota kahia nikwamba ngwenyi: “Cho kuwaha ni kuvuma! Ayenu, kahia kuwaha!”

¹⁷ Chipinji cha muchaali machisonga hamba, mba mafukama ni kumuwayila. Maliumba nikwamba ngwenyi: “Yena uli zambi yami, ngulamwine kama!”

¹⁸ Atu ngwe waze kaali yihepuke, keeshi kunyingika yize akulinga.

¹⁹ Songi ya mahamba keshi yinyingi ni malinjekela akwamba ngwenyi: “Kuma hingunase Chipinji cha mutondo uno ha jiko. Hinocha ho mbolo ni yifwo, hinayilia. Chize chasala ho hinachisonga hamba. Kwe nguli, ngunafukama ni kuwayila mutondo!”

²⁰ Chili ngwe kulia uto. Manyonga jenyi a uhepuke kaakumupiangula. Keshi kutayiza ngwenyi, hamba yoze ali nenyi mu kwoko hi zambi ko.

Mwene Zambi kali Tangi kanda Chilamwina

²¹ Mwene Zambi ngwenyi: “Israele, iwuluka chino; iwuluka ngwe, yena uli kavumbi kami. Nakutangile kubwa kavumbi kami, chichi kakuvulama nichimwe.

²² Utanguko we hingunautangumuna ngwe lelwa. Milonga ye hingunayitandulula ngwe mbundu. Hiluka kuli yami mumu yami nakukulile.”

²³ Yena lilu, kololoka ni chiseke! Yenu muma mushi lia hashi, kololokenu! Yenu milundu ni mitondo yeswe ya mu usaki, kololokenu ni chiseke! Mwene Zambi hanasolola unene wenyi nikukula atu jenyi Aisraele.

²⁴ “Yami nguli Mwene Zambi, Mukwa Kunukula; nguli yoze wanutangile. Nguli Mwene Zambi, Tangi wa yuma yeswe. Yami mwene wika nazazulwile lilu; muze natangile hashi, niumwe wangukwashile.

²⁵ Yami nakuhepwisa tahi; ni kubinjisa maliji a munanyi. Maliji ja akwa mana nakwapwisa amokomoko, ni kusolola uhepuke wa malinjekela jo.

²⁶ Alioze muze kavumbi kami akuhanjika munanyi, ni muze nakutuma kanganda kami ha kusolola manyonga jami, manyonga waze ni maliji waze a munanyi nakwamanununa. Nakwambila akwa Yerusaleme ngwami, atu maakatwama nawa mu limbo lienu. Nakwambila akwa membo ja Ayuda ngwami, maakatungulula nawa e membo, membo waze abuzukile.

²⁷ Nakuhana Shimbi, mba kalunga lwiji moma.

²⁸ Nakwambila Siruse ngwami: ‘Yena muunguyulila atu jami; muukalinga chize ngunazange yena ulinge: muukahana Shimbi ya kutungulula Yerusaleme ni kusa fundametu ya zuwo lia Zambi.’ ”