Izaya 42 - Mukanda Wa Zambi 1970

Kavumbi ka Mwene Zambi

¹ Mwene Zambi kanambe ngwenyi: “Talenu kavumbi kami yoze ngunatakamisa yoze natongwele, yoze nakuwahilila nenyi. Hingunamuzalisa ni Mwiku wami, makakolesa atu hanga akaliendele ni ululi.

² Kechi kakololoka hanji kukalumioka, hanji kuvwisa liji lienyi mu majila.

^3-4 Kechi kuwonda lumbungu yoze wamakuka, hanji kujima ndeya yize yinafwinji mwishi. Makakolesa atu hanga akaliendele ni ululi. Kechi kahonga hanji kukokoloka; akwa chifuchi kusuku maakashimbwila longeso lienyi.”

⁵ Zambi yatanga lilu, yalizazulula; yawumba hashi ni yeswe yize yatwama ho; yahana mwiku wenyi kuli atu eswe waze atwama ho, yaapwisa akwa mwono. Haliabwila Mwene Zambi kanambila kavumbi kenyi ngwenyi:

⁶ “Yami, Mwene Zambi, nakutambikile, yingukutakamisa ukakolese atu hanga akaliendele ni ululi. Ni yena mungukolesa Usendo ni atu eswe; ni yena mungutwala pangu kuli mavungu.

⁷ Muukalawisa meso ja tupuputa, muukatusula atu waze atwama mu milima mu mazuwo a lamba.

⁸ “Yami wika nguli Mwene Zambi, Zambi ye. Chichi kuhana uhenya wami kuli zambi mukwo, chichi kutayiza atu kuwayila mahamba.

⁹ Yuma yize naliangile kwamba hiyabwa. Haliabwila ngunanwambulwila yuma yaha, shimbu kanda yichisoloka.”

Chichimiekenu Mwene Zambi

¹⁰ Imbilenu Mwene Zambi mwaso Waha; imbenu uhaliso wenyi, akwa hashi heswe! Yenu waze nwakwendangana ha kalunga lwiji, muchichimiekenu; yenu eswe waze nwatwama mu kalunga lwiji, muhalisenu! Akwa yifuchi ya kusuku, ni waze eswe atwama ko, imbenu!

¹¹ Akwa mu puya ni ye yihunda yako, chichimiekenu Mwene Zambi; atu a ku Kedare, muhalisenu! Atu waze nwatwama mu limbo lia Sela, kololokenu ni chiseke helu lia milundu!

¹² Atu waze atwama ku yifuchi ya kusuku, chichimiekenu Mwene Zambi mulemesenu!

¹³ Mwene Zambi kanatuhuka ngwe kajita wa tachi; halilulika kulu ase jita. Kanakololoka, kanakalumioka ni kwasa jita; kanasolola ndundo jenyi ni kulimika ni akwa kole jenyi.

Zambi yalakenya kukwasa atu jenyi

¹⁴ Zambi ngwenyi: “Shimbu lisuku nalihumikijine; chakumbulwile ko atu jami. Alioze haliabwila tangwa lia kulinga hilieza; ngunatu mikuma ngwe pwo yoze unambe kusema.

¹⁵ Mindundena ni milundu mungukayibuzwola, yambu ni mitondo mungukayumisa. Njiji ja mu mambongo mungukajalumuna puya, mashima ja meya mungukoomisa.

¹⁶ “Tupuputa mungwasongwela mu majila waze kanda enda kama nichimwe. Milima yo munguyalumuna pangu, chifuchi cha mingulunga mungwasalamishina cho. Yino yili yilakenyo yami, munguyimanununa kanawa.

¹⁷ Eswe waze akushachila ha mahamba, waze akwamba ngwo, mahamba e mazambi jetu, mungukalelesa ni kwevwisa sonyi.”

Aisraele kaalilongesele ko

¹⁸ Mwene Zambi kanambe ngwenyi: “Yenu afwa matwi, banjikenu! Yenu tupuputa talenu!

¹⁹ Kuli umwe mutu unapuputa kuhiana kavumbi kami, nyi? Kuli umwe mutu unafu matwi kuhiana kavumbi kami yoze hinatuma, nyi?

²⁰ Israele, hiwamona yuma yinji, alioze kuwayibalile. Ukwete matwi akuvwila, alioze kuwabanjikile.”

²¹ Mwene Zambi kanazange kulamwina, kashika yalemesa Shimbi jenyi ni longeso lienyi, yazanga atu jenyi ajilemese.

²² Alioze haliabwila atu akwo haabuba yuma ya atu jenyi; haakashila mu mena, haasweka mu mazuwo a lamba. Yaabuba yuma yo; niumwe wejile ni kwalamwina.

²³ Iya hakachi kenu machibanjika? Iya machisa mbunge chize musono ndoo ku miaka ya kulutwe?

²⁴ Iya wakunjikile Aisraele kuli akwa kububa? Iye Mwene Zambi yoze twavulumwine mwe watukunjikile! Kutwalingile nikulita ni upale wenyi hanji kwononoka ku longeso lienyi.

²⁵ Kashika watuvwilile ufwatulo wenyi ni kutumwesa lamba lia jita. Ufwatulo wenyi yiubwa ngwe kahia mu Israele, alioze kutwanyingikine chize abwile; kutwalilongesele ko nichimwe ku yuma yino yeswe.