Izaya 41 - Mukanda Wa Zambi 1970

Zambi yakolesa Aisraele

¹ Zambi kanambe ngwenyi; “Yenu nwatwama ku yifuchi kusuku, lihumikizenu, nungubanjike! Lulikenu mulonga wenu ha kuwambulula mu chota maanutayiza ni kuhanjika. Tukungulukenu tuusope.

² “Iya wanehene mukwa kukumba wa ku chivumbuko ni kumupwisa mukwa kukumba mianangana ni mavungu? Mukwale wenyi wakwafwenya hashi ngwe fufuta. Mata jenyi akwasa kaakwamwanga ngwe yizungu yize yinahehuka ni fuji.

³ Kakwahanga, kakuya lume, kakuzomboka ngwe mu tetela anende!

⁴ “Iya walingile Chuma chino? Iya wabatwile yize maalinga akwa hashi? Yami, Mwene Zambi, mwe nabwile ku Ubutukilo, ni yami, Mwene Zambi, mungukabwa nawa kasulasongo.

⁵ “Mavungu a ku yifuchi kusuku haanamono yize nalingile; kaakwivwa mwongo kaakuchikima. Kashika eswe akukunguluka ni kwiza.

⁶ Akwa utotombo kaakulikwasa ene.

⁷ Songi a mabaya kanambila mukwa kuzuzulula oru ngwenyi: ‘Walinga kanawa!’ Mukwa kusonga mahamba, kanatakamisa yoze wakuhata e mahamba. Kaanambe ngwo: ‘Yinabeme!’ Mba kaanakolesa mwe hamba ni mbambo.

⁸ “Alioze yena, Israele kavumbi kami, nuli atu waze natongwele, vungu lia Abrahama, kavumbi kami.

⁹ Hingunanuchiza ku mbango ja hashi; hingunanutambika ku mbango jisuku nikwamba kuli yena Israele ngwami: ‘Uli kavumbi kami.’ Chakulitunyine ko, alioze nakutongwele.

¹⁰ Kanda wivwa woma, nguli hamwe ni yena! Nguli Zambi ye, kanda wivwa mwongo wa Chuma nichimwe! Mungukutakamisa, mungukukwasa; mungukufunga ni kwoko liami lia chindume lia ululi.

¹¹ “Waze akukuvutwokela sonyi maakevwa. Waze akukukatukila kumaakafwa,

¹² kumaakatoka hano hashi.

¹³ “Yami nguli Mwene Zambi, Zambi ye; ngunakukwate ku kwoko lia chindume, ngwami: ‘Kanda wivwa woma; mungukukwasa.’ ”

¹⁴ Mwene Zambi ngwenyi: “Israele, uli mukepe, unalele; alioze kanda wivwa woma, mungukukwasa, Yami Mukwa Kukukula, Munangi wa Aisraele.

¹⁵ Mungukupwisa ngwe chikungo cha kuzungula nacho, chize chili ni mbambo jaha. Muukabuzula milundu ni kuyifwenya; mindundena muyikabuzuka.

¹⁶ Muukayihengula mu tetela; fuji muyikayimbata, kangonga makayimwanga. Mba muukawahilila mumu nguli Zambi ye; muukanguchichimieka, yami Zambi Munangi wa Israele.

¹⁷ “Muze atu jami maakafupa meya a kunwa, muze malimi jo hooma chau ni pwila, mba yami, Mwene Zambi, mungukakumbulula ku kuliumba cho; yami, Zambi ya Israele, chichi keehuka nichimwe.

¹⁸ Ha milundu yize kuyishi yibuta mungukasa ho njiji, ni mashima ja meya mu yikulo. Puya mungukayalumuna yitende ya meya, ni chifuchi chumu mafuji a meya.

¹⁹ Mu puya mungukatumba mo mitondo sedru, ni tongo, ni mirte, ni olive. Mu chifuchi chize kuchishi yibuta mungukasa mo usaki, wa mitondo Shipre, ni mizunge, ni mipinyu.

²⁰ Atu maakachimona ni maakanyingika ngwo, yami Mwene Zambi, mwe nachilingile. Kumaakanyingika ngwo, Zambi Munangi wa Aisraele hanachilingi.”

Maliji a Mwene Zambi kuli mazambi amokomoko

²¹ Mwene Zambi, mwanangana wa Aisraele, kanambe ngwenyi: “Yenu mazambi ja mavungu, lwezanenu chikuma chenu. Ambululenu uchela wenu!

²² Kundamenu kuno lumbununenu yuma yize muyikeza, mba hanga tuyinyingike muze muyikeza. Lumbununenu mu chota yikuma yize hiyinabalika; tulwezenu chize yinalumbunuka.

²³ Tulwezenu yuma yize muyikeza kulutwe, mba tunyingike ngwetu kuma nuli mazambi! Lingenu chimwe Chuma chibema hanji mwesenu lamba limwe; tuvwisenu woma ni tushimwokenu!

²⁴ Yenu ni yeswe yize nwakulinga yili yamokomoko; eswe waze akunuwayila kaali akwa kuzelwokesa ku meso jami!

²⁵ “Yami natongwele umwe mutu wa ku chivumbuko, mungumutuma hanga akatuke ku norde ni kwasa jita, kumaakaliata mianangana ngwe chize atu akuliata malowa, ngwe chize tengi akuliata uma.

²⁶ Iya wa kuli yenu wambile shimbu kanda ngwenyi, yuma yino muyikabwa mba hanga twambe ngwetu Chenacho? Niumwe wa kuli yenu wambile liji limwe; niumwe wamuvwile nikwamba chimwe Chuma!

²⁷ Yami, Mwene Zambi, naliangile kuchambulula ku Zione; natumine kanganda kami ku Yerusaleme nikwamba ngwami; ‘Atu je kaaneza! Kaanahiluka ku mahio!’

²⁸ Muze nahengwile mukachi ka mazambi, niumwe wa kuli ayo wabwile ni liji, niumwe wakumbulwile ku yihula yami.

²⁹ Mazambi eswe kaali amokomoko; kaahashile kulinga Chuma nichimwe! Mahamba jo kaanalele, keeshi tachi.”