Izaya 40 - Mukanda Wa Zambi 1970

Maliji akusa mbunge

¹ Zambi yetu kanambe ngwenyi: “Lembejekenu atu jami, alembejekenu!

² Takamisenu akwa Yerusaleme. Alweze ngwe, haamona kulu lamba miaka yinji, haliabwila hiliahwa, milonga yo haakonekena yo. Hingunaamwesa lamba linji mumu ha milonga yo yeswe.”

³ Mutambi kuunakololoka ngwo: “Lulikenu jila ya Mwene Zambi mu puya. Lulamisenu yikoka ya Zambi yetu mu chifuchi chumu.

⁴ Shikilenu yikulo yeswe; salamisenu milundu yeswe, mindundena kumuyikanyikumuka, ni chifuchi cha yingulunga muchikasalama.

⁵ Hohene uhenya wa Mwene Zambi muukasoloka, ni atu eswe maakaumona. Mwene Zambi mwe hanachilakenya.”

⁶ Mutambi kuunakololoka ngwo: “Ambujola sango!” Yinguhula ngwami: “Sango jika mungwambujola?” Iye ngwenyi: “Ambujola ngwe, atu eswe kaali ngwe mambu; ngwe yitemo ya mu yambu yize kuyishi kulinduluka.

⁷ Yambu yakuma ni yitemo kuyakulela, muze Mwene Zambi akufujila ho mwiku wenyi. Chamwenemwene atu kaali ngwe yambu.

⁸ Ewa, yambu kuyakuma ni yitemo kuyakulela, Alioze maliji a Zambi yetu kaakulinduluka ndoo ku miaka yeswe.”

⁹ Yerusaleme, kandukenu ha mulundu usuku nwambujole sango jibema! Zione, kololoka ni liji linene wambulule sango jibema! Hanjika kanda nwivwa woma. Lweza membo ja Ayuda ngwe, Zambi yenu kaneza!

¹⁰ Mwene Zambi kaneza ayule ni ndundo, kaneza ni atu waze alamwinyine.

¹¹ Kumakafunga mapanga jenyi ngwe kafunga; makakunga ana mapanga hamuwika, maakaakangayika mu kondo; makatembula anaye hakehe hakehe.

Ulemu wa Mwene Zambi

¹² Iya mahasa kuzonga kalunga lwiji ni kwoko lienyi hanji kweseka lilu ni moko jenyi? Iya mahasa kusa fufuta ya hashi mu musenge hanji kweseka milundu ni mindundena ha pezo?

¹³ Iya mahasa kulweza Mwene Zambi chize chamutamba kulinga? Iya mahasa kumulongesa hanji kumwaha chiyulo?

¹⁴ Mwene Zambi kuli iya akuhula mana ni yinyingi, hanji kulilongesa chize malinga?

¹⁵ Kuli Mwene Zambi mavungu kaali ngwe Chuma chamokomoko, kaali ngwe masotosoto a meya, mahongo waze ali kusuku kaanalele ngwe fufuta.

¹⁶ Tushitu eswe a mu usaki wa Libano kaazukile kulambula Mwene Zambi milambu, ni mitondo yamo kuyili yikepe ha kuyiwika kahia.

¹⁷ Mavungu eswe kaali amokomoko ku meso jenyi.

¹⁸ Mwe Zambi neya mutumweseka? Iya alifwa nenyi?

¹⁹ Iye keshi ngwe hamba yoze akusonga kuli mutu, yoze akulamika oru kuli akwa utotombo, ni kumumika ha chimanyino cha prata.

²⁰ Mutu yoze kahashile kulanda prata hanji oru, matongola mutondo uze kuuchi kubola. Mba mafupa mukwa utotombo yoze mamulingila hamba yoze keshi kulimbuka.

²¹ Kunusolo kunyingika, nyi? Kaanulwezele cho ku shakulu, nyi? Kunwevwile ko chize atangile hashi, nyi?

²² Yatanga ho kuli yoze watwama ha chitwamo chenyi cha wanangana, helu lia mavu kwilu kuhiana; atu kaakusoloka ngwe mapasu. Hanazazulula lilu ngwe chikalakala, ngwe zuwo lia makubu muze akutwama atu.

²³ Kakukehesa akwa kuyula a tachi, kakwapwisa amokomoko.

²⁴ Kaali ngwe yibuta yize haatombeka, yize muyichisoka miji. Muze Mwene Zambi akutuma fuji, kaakulela, kaakuhehuka ngwe yizungu.

²⁵ Zambi Munangi neya mutumweseka? Iya alifwa nenyi?

²⁶ Achitalenu mwilu! Iya watangile matongonoshi waze nunamono? Yoze wakwasongwela ngwe mbunga ya tujita, yoze wanyingika kwoka cho, ni kwavuluka majina jo! Ku ndundo jenyi jahiana, niumwe wa kuli ayo keshi kuhona!

²⁷ Aisraele, mumu yika nwakulinyenyeta ngwenu, Mwene Zambi kanyingikine lamba lietu, keshi kutubatwila ni ululi?

²⁸ Kuma kunwanyingikine, nyi? Kunwevwile, nyi? Mwene Zambi, kali Zambi wa miaka yeswe; hanatange hashi heswe. Keshi kuhona nichimwe hanji kwivwa yikatalo. Niumwe Unanyingika manyonga jenyi.

²⁹ Kakutakamisa akwa kuhonga. Kakukolesa akwa mulekeleke.

³⁰ Chibwe akweze meevwa yikatalo; kumaatalinga ni kulimbuka.

³¹ Alioze waze maasa mbunge kuli Mwene Zambi, kumaakahuzuluka, kumaakahumuka ha mapulwa ngwe tela; Kumaakazomboka, keechi kevwa yikatalo, kumaakendangana, keechi kahonga.