Izaya 37 - Mukanda Wa Zambi 1970

Mwanangana Hezekia yahula chiyulo kuli mukwa munanyi Izaya

¹ Muze mwanangana Hezekia hevwa sango jo, yatanuna mahina jenyi ni chinyengo, yazala mwanji, yaya mu zuwo lia Mwene Zambi.

² Yatuma Eliakime, kafunga ka zuwo lia mwanangana, ni Shebna, mukwa kusonyeka milonga, ni makulwana ja mahako kuli mukwa munanyi Izaya mwana wa Amoze. No nawa yaazala mianji.

³ Maliji waze ashikile alweze Izaya wano: “Musono lili tangwa lia lamba, kaanatumwesa lamba, tunevu sonyi. Tuli ngwe pwo yoze unambe kusema, alioze tachi ja kusema jakuhi.

⁴ Mwanangana wa Asuria hatuma mwata wenyi wa lutwe ashililike Zambi ya mwono. Mwene Zambi, Zambi yenu, evwe kama kushililika chino, amwese lamba waze achamba. Kashika atu jetu waze haasala ho, alembelenu Zambi.”

⁵ Muze Izaya hevwa maliji ja mwanangana Hezekia,

⁶ yakumbulula ngwenyi: “Mwene Zambi kanambe ngwenyi, kanda nutayiza Aasuria kunuvwisa woma ngwo, Mwene Zambi kahashile kunulamwina.

⁷ Mwene Zambi kumevwisa mwanangana wa Asuria amwe maliji waze maamuhilwisa ku chifuchi chenyi, ni Mwene Zambi makamushihila ko.”

Aasuria yaatoweza nawa Aisraele

⁸ Mwata wa tujita twa Asuria yevwa ngwo, mwanangana wa Asuria hakatuka ku limbo lia Lakishi haya ni kwasa jita ni limbo lia Libna; mba yaya ko ni kumuhula mana.

⁹ Aasuria yeevwa ngwo, mwanangana Tirhaka wa chifuchi cha Sudane kaneza ni tujita twa chifuchi cha Egiptu ni kwasa no jita. Muze mwe mwanangana hachivwa, yatuma mukanda kuli mwanangana Hezekia

¹⁰ wa Yuda ni kumwamba ngwenyi: “Zambi yoze unajikijila ni kwamba ngwe, kuuchi kalimbukila mu moko jami, kanda akwonga.

¹¹ Hiunevu chize mwanangana wa Asuria akulinga ku chifuchi chize anambe kwenyeka. Yena Unanyongo ngwe, muuhasa kulilamwina, nyi?

¹² Ngwami, tushakulu twami haanonona membo ja Gozane, ni Harane, ni Rezefe, ni haanashihi Abetedene waze te atwama mu Telasare; mazambi jo kaahashile ko kwakwasa.

¹³ Mianangana a membo ja Hamate ni Arpade, ni Sefarvaime, ni Hena, ni Iva kuli ali?”

¹⁴ Mwanangana Hezekia yatambula we mukanda kuli tunganda, yautanga. Mba yaya ku zuwo lia Zambi, yazazulula we mukanda ku meso ja Mwene Zambi,

¹⁵ yalemba ngwenyi:

¹⁶ “Aa Mwene Zambi Mukwa Ndundo Jeswe, Zambi ya Israele, kuwatwama ha chitwamo che helu lia akwa mwono a mwilu, yena uli mwe Zambi wika, kuwakuyula mawanangana eswe a hashi. Yena watangile hashi ni lilu.

¹⁷ Haliabwila, Mwene Zambi, banjika kama, utale yize hiyatuwana. Banjika kama maliji eswe waze Senakeribe anahanjika a kukusaula, yena Zambi ya mwono.

¹⁸ Mwene Zambi, yetu eswe tunanyingika chize mwanangana wa Asuria hanonona mavungu anji, hanahichika yifuchi yo yahululu,

¹⁹ hanocho mazambi jo waze te hi mazambi ko, shina lume mahamba a mitondo ni mawe a kusonga ni moko ja atu.

²⁰ Haliabwila, Mwene Zambi yetu, tulamwine kama kuli Aasuria, hanga mavungu eswe a hashi anyingike ngwo, yena wika uli Zambi.”

Maliji a Izaya kuli mwanangana

^21-22 Mukwa munanyi wa Zambi yatuma maliji a kulweza mwanangana Hezekia kumbululo lia Mwene Zambi ku kulemba chenyi, ngwenyi: “Senakeribe, akwa limbo lia Yerusaleme kaanakusehe, kaanakulelesa.

²³ Iya yoze unasaula ni kulelesa? Hiwangulelesa yami, Zambi Munangi wa Aisraele.

²⁴ Hiwatuma tuvumbi twe ni kulisamba ngwe: ‘Hinakumba milundu ya Libano yisuku kuhiana, ni matemba jami. Hinapakula mitondo sedru yisuku kuhiana ni mitondo Shipre yibema kuhiana, hinaheta mukachi ka usaki.’

²⁵ Hiwalisamba ngwe: ‘Hinafula mashima ni kunwa meya mu yifuchi ya mbala. Yiliato ya tujita twami hiyomisa lwiji wa Nile.’

²⁶ “Kuma kanda wivwa kama ngwo, yuma yize yeswe hingunayilulika, nyi? Haliabwila mba hinayimanununa. Hingunakwehe tachi ja kububa membo akukoleka akabwe milumba ya mawe.

²⁷ Atu waze atwama ko te keeshi tachi; yeevwa mwongo, yaalishimwoka. Yaabwa ngwe yambu mu minda hanji ngwe yambu yamokomoko yize yakusoka ha fulumba lia zuwo, yize yakulela ni fuji ya ku chivumbuko.

²⁸ “Alioze ngunanyingika yuma yeswe hakutwala kuli yena, yize wakulinga ni kuze wakuya, ni chize wakunguvwila ufwatulo.

²⁹ Hingunatambula sango ja ufwatulo we ni kulengumuka che. Haliabwila mungusa lowa mu zulu lie ni lwoji wa utale mu kanwa lie, mungukuhilwisa mu jila yizeyene wejilile.”

³⁰ Mba mukwa munanyi Izaya yambila mwanangana Hezekia ngwenyi: “Chino chili chilayi cha yuma yize muyikabwa. Mwaka uno ni uze muwizaho munukalia lume mbuto ya muzumba, alioze mwaka uze ukwo munukatumba mbuto jenu ni kujibatula, ni kutumba mitondo ya vinyu ni kulia ye mihuko.

³¹ Ayuda waze maakasala ho maakasokoloka ngwe yibuta yize yinatande miji ni kwima mihuko.

³² Mukukabwa atu mu Yerusaleme ni ha mulundu wa Zione, mumu Mwene Zambi Mukwa Ndundo Jeswe hanachibatula kulu.

³³ “Mwene Zambi yamba hakutwala kuli mwanangana wa Asuria ngwenyi: ‘Kechi kanjila mu limbo lino hanji kukonga mo kamwe ka mwivwi. Tujita niamwe maakundama ni kebwe ku limbo, keechi kulumbika mulumba wa mavu hanga alimike ni akwa limbo.

³⁴ Mwe mwanangana makahiluka mu jila yizeyene ejilile, kechi kanjila mu limbo lino. Yami Mwene Zambi nachamba.

³⁵ Mungufunga limbo lino ni kulilamwina, mumu hali yami mwene, ni mumu ha chilakenyo chize nalakenyene kavumbi kami David.’ ”

³⁶ Ha ufuku uzewene kanganda ka Mwene Zambi yaya ku musumba wa Aasuria, yashiha ko tujita 185,000. Muze hikwacha, kuwana eswe haafwa!

³⁷ Mba Senakeribe, mwanangana wa Asuria, yakatuka, yahiluka ku limbo lia Ninive.

³⁸ Limwe tangwa muze te anawayila mu zuwo lia zambi yenyi Nishoroko, ana jenyi aali a malunga, Adramaleke ni Sharezere yaamushiha ni mikwale, mba yaachinyina ku chifuchi cha Ararata. Ezare Hodane, mwanenyi mukwo wa lunga, yamuhinga.