Izaya 36 - Mukanda Wa Zambi 1970

Aasuria yaasaula akwa Yerusaleme

¹ Ha mwaka kumi ni wa muchiwana wa kuyula cha mwanangana Hezekia wa Yuda, mwanangana Senakeribe wa Asuria yasa jita ni membo akukoleka a mu Yuda, yaakumba.

² Mba yambila mwata wa tujita twenyi kukatuka mu limbo lia Lakishi ni kuya ku limbo lia Yerusaleme, hamwe ni tujita anji, akazeyese mwanangana Hezekia. Mwe mwata wa tujita yatambula jila kuze te akwa kutunga mahina akulingila milimo yo, ku kapila yoze wakuneha meya a ku chitende cha ku tunda.

³ Yikwiza Ayuda atatu ni kumubatwiza: Eliakime mwana wa Hilkia, kafunga ka zuwo lia mwanangana; ni Shebna, mukwa kusoneka milonga; ni Joa mwana wa Asafe, mukwa kusoneka sango.

⁴ Mwata wa tujita twa Asuria yaamba ngwenyi: “Mwanangana kanazange kunyingika ngwenyi, mumu yika mwanangana Hezekia unajikiza chichize.

⁵ Nunanyongo ngwenu, maliji wika maakwasa ngwe mana ni tachi ja tujita, nyi? Iya nunanyongo ngwenu, manukwasa ni kukatukila Aasuria?

⁶ Nunajikijila hali akwa Egiptu akanukwase, alioze chili ngwe lukanda wa lumbungu yoze mutu anajikijila ha kwenda nenyi. Nyi wamakuka malemeka kwoko lienyi. Chenacho abwa mwanangana wa Egiptu kuli waze maamujikijila.”

⁷ Mwata wa tujita yaweza ho ngwenyi: “Hanji munungwamba ngwenu, nunajikijila hali Mwene Zambi, Zambi yenu, nyi? Ngwami yili yilumbilo ya Mwene Zambi yize Hezekia abuzwile muze ambilile Ayuda ni akwa Yerusaleme kuwayila lume ku chilumbilo chimuwika.

⁸ Mungunulingila Chuma chibema mu jina lia mwanangana wa Asuria. Mungunwaha tuvwalu 2,000 nyi munuhasa kumona malunga waze meendela ho.

⁹ Yenu kunwahashile kukumba chibwe mwata mukepe wa hakachi ka Asuria, alioze nunajikijila hali akwa Egiptu kunutumina matemba ni akwa tuvwalu.

¹⁰ Nunanyongo ngwenu, Mwene Zambi kangukwashile ni kwasa jita mu chifuchi chenu ni kuchenyeka, nyi? Mwene Zambi mwe wangwambile kulimika nenu ni kwenyeka che chifuchi.”

¹¹ Mba Eliakime, ni Shebna, ni Joa yaambila mwe mwata ngwo: “Mwata, hanjikenu kama mu liji lia arame. Twakulivwa. Kanda nutuhanjikisa mu hebreu. Nyi ka, atu eswe ha chipanga maalivwa.”

¹² Mwata ngwenyi: “Kuma yenu nunanyongo ngwenu, mwanangana kanakangutuma kuhanjika yuma yino yeswe shina kuli yenu ni mwanangana wenu, nyi? Kaa, ngunahanjika nawa kuli waze atwama ha chipanga, waze maakalia tuji two ni maakanwa masusu jo, ngwe yenu.”

¹³ Mba mwe mwata yakatuka, yakololoka mu hebreu ngwenyi: “Banjikenu chize mwanangana wa Asuria anambe!

¹⁴ Kananukanyamisa, ngwenyi, kanda nutayiza Hezekia kunwonga. Hezekia kahashile kunulamwina.

¹⁵ Kanda anupiangula ni kujikijila hali Mwene Zambi. Kanda nunyonga ngwenu, Mwene Zambi manulamwina. Hanji ngwenu, Mwene Zambi makanjisa tujita twetu twa Asuria kutambula limbo lienu.

¹⁶ Kanda nubanjika Hezekia! Mwanangana wa Asuria kanambe ngwenyi, tuhukenu mu limbo, likunjikenu kuli iye. Yenu eswe munuhasa kulia mihuko yenu ya vinyu ni ya mikuyu, ni kunwa meya a mu mashima jenu,

¹⁷ ndoo mwanangana makanutwala mu chifuchi ngwe chino cha yenu, kuze kuli minda ya kukamina vinyu, ni mbuto ya kulinga nayo mbolo.

¹⁸ Kanda nutayiza Hezekia kunwonga ngwenyi, Mwene Zambi makanulamwina. Kuli umwe zambi wa ku chifuchi chikwo yoze hanalamwina atu jenyi ku moko ja mwanangana wa Asuria, nyi?

¹⁹ Mazambi ja membo ja Hamate ni Arpade kulihi ali? Ni a limbo lia Sefarvaime? Umwe haanalamwina kama akwa Samaria, nyi?

²⁰ Tangwa lika mazambi a ku yifuchi yino yeswe haanalamwina kama yifuchi yo kuli mwanangana wetu? Mba ngwe kuchi nunanyongo ngwenu, Mwene Zambi mahasa kulamwina Yerusaleme?”

²¹ Alioze atu yaahola lume kuluu, ngwe chize mwanangana Hezekia aalwezele, kaahanjikile ko liji nilimwe.

²² Henaho Eliakime, ni Shebna, ni Joa yaatanuna mahina jo ni chinyengo, yaatwala sango kuli mwanangana Hezekia jize ahanjikile mwata wa tujita wa Asuria.