Izaya 35 - Mukanda Wa Zambi 1970

Jila ya chijila

¹ Puya muyikawahilila; yitemo muyitemuka mu chifuchi chumu.

² Puya muyikemba ni uwahililo; muyikabwa yibema ngwe milundu ya Libano ni ya chinuno ngwe minda ya Karmele ni Sharone. Atu eswe maakamona uhenya wa Mwene Zambi, ni ulemu wenyi, ni ndundo jenyi.

³ Takamisenu moko a ubekebeke, kolesenu makungunwa waze keeshi tachi.

⁴ Ambulwilenu akwa mwono ngwenu: “Takamenu, kanda nwivwa woma! Zambi kaneza ni kunulamwina, kaneza ni kumwesa akwa kole jenu lamba.”

⁵ Tupuputa maakamona; afwa matwi maakevwa.

⁶ Yiiema maakatumbwoka ni kuhangana; tumama maakemba ni chiseke. Yitwetwe muyikapukwila meya mu puya.

⁷ Masekeseke a kahia maakalumuka chitende; mavu omu maakazala ni meya. Ku ubombo wa mikuza mukukabwa mwambu ni mbungu.

⁸ Mukukabwa jila yibema, yize maakavuluka ngwo, “Jila ya Chijila.” Chivulumunyi niumwe kechi kwenda mo, yihepuke niamwe keechi kapiangula waze menda mo.

⁹ Tambwe keechi kabwa ko, chibwe ngongo keechi kabalika mu jila yize. Atu waze Mwene Zambi haalamwina maakendangana mu chifuchi cho mu jila yize.

¹⁰ Maakaheta mu Yerusaleme ni chiseke, nikwimbamba ni kutumbwoka ni chiseke. Mumu chinyengo ni mikuma muyikahwa ku miaka yeswe.