Izaya 34 - Mukanda Wa Zambi 1970

Zambi makamwesa akwa kole jenyi lamba

¹ Tweyenu yenu akwa mavungu eswe! Kungulukenu, nubanjike. Hashi heswe ni eswe waze nwatwama mo, tweyenu nubanjike.

² Mwene Zambi yatenukina mavungu eswe ni tujita two aabatwile, oonone.

³ Mijimba yo keechi kayifunda, alioze muyikabomba hashi ni kubola ni kukupuka vumba; milundu muyikachila ni manyinga.

⁴ Tangwa, ni kakweji, ni matongonoshi muyikalifwita mu fufuta. Lilu mulikajimuka ngwe mukanda wa kuvunga, ni matongonoshi maakaholoka ngwe chize mafwo akuholoka ku mutondo wa vinyu hanji wa mukuyu.

⁵ Mwene Zambi hanalulika kulu mukwale wenyi mwilu, haliabwila makamwesa Aedome lamba, atu waze hanaabatwila ni kwoonona.

⁶ Mukwale wenyi muukabwa ni manyinga ni maji jo ngwe manyinga ni maji a mapanga ni a pembe waze atu akulambula. Mwene Zambi makalambula mulambu uno mu limbo lia Bozra, kushiha chinene muchikabwa mu chifuchi cha Edome.

⁷ Atu maalimbwoka ngwe yimbembe a ngombe ni mbau, ni chifuchi muchikachila ni manyinga, muchikabwa ni maji anji.

⁸ Lino lili tangwa lize Mwene Zambi makalamwina Zione ni kumukala kuli akwa kole jenyi.

⁹ Njiji ja mu Edome mujikalumuka usolososhi, ni mavu maakalumuka fundanga. Mba chifuchi cheswe muchikawema ngwe usolososhi.

¹⁰ Muchikawema mwalwa ni ufuku, mwishi muukafwindangana ku miaka yeswe. Ku miaka yeswe chifuchi cheswe muchikabwa chamokomoko; niumwe kechi kendangana mo nawa.

¹¹ Yikungulu ni yikwakwalo maakazuka che chifuchi. Mwene Zambi makachipwisa chamokomoko ngwe chize chabwile ku kabutu.

¹² Kukuchi kabwa umwe mwanangana yoze makayula che chifuchi, akwa kuyula eswe keechi kabwa ko.

¹³ Mingonga ni mikalale muyikatatuka mu mazuwo eswe ja wanangana ni mu yipanga yakukoleka ya membo, mikuza ni yikungulu maakatwama mo.

¹⁴ Tushitu a mu yambu maakabwa ko, ni mwiku wa luchisa muukatambiekela ko. Ha ufuku, umwe mwiku wa luchisa wa tachi kwenako muukabwa ni kufupa homa ha uhwimino.

¹⁵ Yikungulu maakatunga ko yaswa yo, ni kumba monda, ni kukunga ana mu mapulwa jo. Hulayula kwenako maakalikungulwila, mandemba ni yaali.

¹⁶ Hengulenu mu mukanda wa Mwene Zambi wa akwa mwono ni kutala yize anambe. Niumwe wa kuli akwa mwono wano makahona, niumwe chihwo mahona kuji. Mwene Zambi hanachambe, iye mwene makaakungila hamuwika.

¹⁷ Mwene Zambi mwe makatetela akwa mwono che chifuchi. No maakatwama mo ku miaka yeswe, muchikabwa nicho ndoo ku miaka yeswe.