Izaya 33 - Mukanda Wa Zambi 1970

Kulemba: Mwene Zambi tukwase kama

¹ Akwa kole jetu lamba lio! Haanabubu yuma ya atu, haanakunjika akwo ni mafwefwe, chibwe niumwe kabubile yuma yo ni kaakunjikile ni mafwefwe. Alioze tangwa lio lia kububa ni kuhanjika mafwefwe mulikasula, ayo ene maakabwa akwa yitela ni no maakaabuba kuli atu akwo, maakaakunjika ni mafwefwe.

² Mwene Zambi, tuvwile kama keke. Tunase mbunge kuli yena, utufunge kama tangwa ha tangwa, ni kutulamwina ha matangwa ja lamba.

³ Muze wakulinangamisa hamwe ni yetu, mavungu akwo kaakuchina muze akwivwa lundunjila wa jita.

⁴ Mba twakububa yuma yo.

⁵ Mwene Zambi kali mulemu! Kakuyula atu eswe. Akwa Yerusaleme makaapwisa akwa ululi ni akwa umwenemwene.

⁶ Makahana uhwimino ku vungu lia Israele makaafunga nikwaha mana ni yinyingi. Ubite wo Wahiana muukabwa kulemesa Mwene Zambi.

⁷ Malunga a hamu kaakutambika hanga aakwase. Akwa kuyula waze esekele kuneha uhwimino kaanalili nikubihilila.

⁸ Mu majila kumuli utoji kuhiana, kashika niumwe keshi kwendela mo. Kaakutangula Usendo ni kaakushiha yilakenyo, kaasolo kusa nawa mutu niumwe vumbi.

⁹ Mu minda keeshi kulima mo nawa; kumushi atu. Usaki wa Libano hiwalela, chikulo cha chinuno cha Sharone hichalumuka puya, mu chifuchi cha Bashane ni ha mulundu wa Karmele mafwo haaholwoka ku mitondo.

Mwene Zambi yatoweza akwa kole jenyi

¹⁰ Mwene Zambi kanambila mavungu ngwenyi: “Haliabwila mungukatuka. Mungusolola ndundo jize nguli najo.

¹¹ Nwakwaka yizungu, nwakusema mwambu. Mwiku wami uli ngwe kahia kaze mukanwonona.

¹² Munubulieka ngwe mawe waze hoocha ni kuumba pemba, ngwe mingonga yize hiyawema, hiyabwa uto wika.

¹³ Yenu waze nuli hehi ni waze nuli kusuku, banjikenu yize hingunalingi, mba nutayize ndundo jami.”

¹⁴ Yivulumunyi a Zione kaanachikima ni woma. Kaanambe ngwo: “Ubatwilo wa Zambi uli ngwe kahia kaze kakulengenya ku miaka yeswe. Iya wa kuli yetu mahasa kusala ni mwono ku kahia kaze?”

¹⁵ Munuhasa kusala ni mwono nyi nwahanjika ni kulinga yize yinalite. Kanda nwonga yiswale ni tachi jenu; kanda nutambula mbongo ja mbenga. Kanda nulikata ni waze anambe kushiha atu hanji kulinga yuma yikwo yibi.

¹⁶ Mba munukabwa ni uhwimino; uhwimino ngwe nwatwama mu zuwo liakukoleka. Munukabwa ni yakulia ni meya a kunwa.

Uhenya uze muwizaho

¹⁷ Munukamona nawa mwanangana wa uhenya nikuyula akwa chifuchi chize chinatande ku mbango jeswe ja hashi.

¹⁸ Kunuchi kabwa nawa ni mwongo hakutwala kuli yilambala akwa kufwetesa lijimu ni ngendeshi.

¹⁹ Kunuchi kumona nawa tundaka, akwa kulengumuka, waze anahanjika liji lize kunwanyingikine.

²⁰ Tala ku Zione, limbo kuze te twakuwayila Zambi ha yiwanyino yetu. Tala ku Yerusaleme! Atu maakatwama mo ni uhwimino! Mukukabwa ngwe zuwo lia makubu lize atu keeshi kulitumbula, mbambo jalio atu keeshi kujizula ni mihipu yalio kuyishi kubatuka nichimwe.

²¹ Mwene Zambi makatulweza uhenya wenyi. Mutukatwama ku mbumbulu ja njiji ni yitwetwe yinene, alioze mato a jita keechi kwenda ko.

^22-23 Mihipu yeswe ya mata waze kuyichi kakwasa nichimwe, mahina jo keechi kahasa kwazazulula. Mutububa ubite weswe wa tujita twa akwa kole jetu. Ubite unji muukabwa ko, kashika chibwe yitonji maakahasa kubwa ni Chihanda cho. Mwe Mwene Zambi makabwa mwanangana wetu; makatuyula ni kutufunga.

²⁴ Niumwe yoze watwama mu chifuchi chetu makamba nawa ngwenyi: “Ngunayiji,” ni akwa milonga eswe maakakonekena.