Izaya 32 - Mukanda Wa Zambi 1970

Mwanangana wa ululi

¹ Limwe tangwa mukukabwa umwe mwanangana yoze makayula ni mbunge yakutuwika, ni miata ja mavungu maakayula ni ululi.

² Mutu mweswe wa kuli ayo makabwa ngwe chiswamo cha fuji, ngwe uchinyino mu kangonga. Kumaakabwa ngwe yitwetwe ya mu puya, ngwe chizulie cha luliwe mu chifuchi chamokomoko.

³ Meso jo maakamona ni matwi jo maakevwa kulinyenga cha atu.

⁴ Keechi katenuka nawa, alioze kumaakalinga ni mana, maakahanjika yize ananyongo.

⁵ Niumwe makanyonga ngwenyi chihepuke kali mulemu, chibwe kwamba ngwo chipalakasa kali ni mbunge yakutuwika.

⁶ Chihepuke kakuhanjika yuma ya uhepuke ni kakunyonga yuma yibi yize malinga. Kakushililika Mwene Zambi ni yize akulinga ni yize akuhanjika. Keshi kuhana yakulia kuli waze akwivwa zala chibwe kuli waze akwivwa pwila.

⁷ Chihepuke kali mubi, kakulinga yuma yibi. Kakulumbula yiswale ni mahuza ni kusa tachi hanga kechi kwabatwila ni ululi.

⁸ Alioze mutu wa vumbi ni mbunge yakutuwika, kakujikijila ha yize yinalite.

Ubatwilo ni Ulamwino

⁹ Yenu mapwo waze nwayuka, kunushi yibikalo, banjikenu nwivwe yize ngunambe.

¹⁰ Haliabwila nunawaha, alioze ha mwaka uze muwiza ho kumunukalibikala mumu kunuchi kabwa ni mihuko ya vinyu mu minda yenu.

¹¹ Hinunayuku, te kunushi yibikalo. Alioze haliabwila, hichikimenu ni woma! Zulenu mahina jenu lifukulenu, nuzale mianji mu zalilo jenu.

¹² Lishimwokenu ni kulilamba ha mabambo mumu minda yenu ya chinuno ya mbuto ya vinyu haayenyeka;

¹³ mikalale ni mingonga yinatatuka mu minda ya atu jami. Lilenu mumu ha majiko ja atu waze te akuwahilila ni limbo lize te ayuka ni yuma yeswe.

¹⁴ Chibwe zuwo lia wanangana mulikabwa liahululu. Mazuwo ni yipanga yize te yakulifunga muyikabuzuka; keechi kayitunga nawa ndoo ku miaka yeswe. Mukukabwa kuma kwa yimbulu a mu yambu ni ulilo wa yimuna ya ha chihunda.

¹⁵ Alioze ha chisuho chimuwika nawa Zambi makatutumina Mwiku wenyi. Mba chifuchi chize te kuchishi chinuno muchalumuka cha, chinuno, ni minda muyikema mihuko yinji.

¹⁶ Mba mu chifuchi cheswe atu maakalinga ni ululi.

¹⁷ Atu eswe maakalinga chize chinalite, kashika uhwimino muukabwa ndoo ku miaka yeswe.

¹⁸ Atu ja Zambi maakabwa keeshi woma, ni kumahio mukukabwa kwa uwahililo ni chiseke. (

¹⁹ Alioze vula wa chiwe makanoka ha usaki, ni limbo mulikanungukina hashi.)

²⁰ Atu eswe maakawahilila mumu ha meya anji a mbuto ni yambu yinji mumu ha yimuna.