Izaya 30 - Mukanda Wa Zambi 1970

Kulikata ni akwa Egiptu chili chamokomoko

¹ Mwene Zambi hanambe ngwenyi: “Akwa kuyula ja Ayuda maakamona lamba mumu kaakungukatukila. Kaakulinga yuma yize chatayijile; kaakulikata ni mavungu waze yami Chishi kuzanga; kaakuliwezela milonga.

² Kaanayi ku chifuchi cha Egiptu aakwase, alioze yami, keeshi kunguhula. Kaakuzanga akwa Egiptu aafunge, kashika akushachila hali mwanangana wa Egiptu.

³ Alioze mwanangana kechi kuhasa kwakwasa; kufunga cha akwa Egiptu muchalumuka lamba linji.

⁴ Chibwe akwa kuyula jo haaheta kulu mu membo ja Zoane ni Hanese mu Egiptu,

⁵ Ayuda maakalinyenga ngwo, mumu yika twashachilile ha vungu lize kulishi kushishika, vungu lize kulishi kukwasa ngwe chize akulakenya.”

⁶ Hakutwala kuli tushitu a mu puya a ku sude Zambi yamba ngwenyi: “Tunganda kaanabalika mu chifuchi cha utoji muze mwatwama tambwe ni manoka a ulembe ni tushitu anene dragau. Kaakumbata yawana ya ndando yinji hali yimbulu ni tumelu ya kuhana ku vungu lize kaahashile kwakwasa nichimwe.

⁷ Kukwasa cha Egiptu chili chamokomoko. Kashika hinaluka Egiptu ngwami: ‘Dragau yoze keshi tachi.’”

Aisraele tuhulia

⁸ Zambi yangwamba ha kusoneka ndako jibi ja atu mu mukanda, hanga sango jitwame matangwa eswe.

⁹ Matangwa eswe kaakukatukila Zambi ni kuhanjeka mahuza; matangwa eswe kaakulituna kubanjika longeso lia Mwene Zambi.

¹⁰ Kaakwambila akwa munanyi kuhola kulungungaa ngwo: “Kanda nuhanjika kuli yetu hakutwala ku ululi. Tulongesenu kwetu chize twakuzanga kwivwa. Twechenu kwetu cheswacho tubwa.

¹¹ Katukenu mu jila, kanda nutukanjisa, kutwazangile kwivwa nawa hakutwala kuli Zambi Munangi wa Israele.”

¹² Alioze mwe Zambi Munangi ya Israele kanambe ngwenyi: “Nwakulelesa chize ngunanwambe, nunajikijila ha kwonga ni kushiha atu.

¹³ Nuli akwa yitela. Nuli ngwe chipanga chisuku chize hichabulika, susumuku muchibuzuka.

¹⁴ Munukafwa ngwe kubuzuka cha mulondo wa uma; kubuzuka chize kuchichi kubwa ni kamwe ka Chihanda kanene kaze maahasa kwokwela nako kahia hanji kuswita nako meya mu shima.”

¹⁵ Mwene Zambi, Zambi Munangi wa Israele, kanambila atu jenyi ngwenyi: “Hilukenu, shachilenu hali yami, mba munubwa ni tachi ni uhwimino.” Alioze nunalitunu kuchilinga!

¹⁶ Nunambe kuchina akwa kole jenu ni kwenda ha tuvwalu waze akuzomboka fuji. Chamwenemwene munuchina! Nunanyongo ngwenu, tuvwalu twenu kaakuzomboka fuji, alioze waze maanuhanga maazomboka fuji kuhiana!

¹⁷ Kanunu umuwika wa kuli yenu maachina kajita umuwika wa akwa kole jenu, ni tujita atano maahasa kunuhanga yenu eswe. Shina Chuma chimuwika muchisala cha kuli tujita twenu, bendelo limuwika, lize anazezeleka helu lia mulundu!

¹⁸ Hindu Mwene Zambi kanashimbwila kunulweza keke. Kanalilulika kunulweza keke mumu matangwa eswe kakulinga yize yinalite. Kawaha waze akushachila hali Mwene Zambi.

Mwene Zambi makawahisa atu jenyi

¹⁹ Yenu waze nwatwama mu Zione kunuchi kahia nawa nichimwe. Mwene Zambi kali mukwa utu, muze munuteta kuli iye hanga anukwase, kumanukumbulula.

²⁰ Mwene Zambi makanumwesa lamba, alioze iye mwene kwe makabwa ni kunulongesa, ni yenu kunuchi kamufupa nawa nichimwe.

²¹ Nyi munukondoloka ku chindume hanji ku chimeso, kumunwivwa liji lienyi kunyima nikwamba ngwenyi: “Yino ye jila, yikaulenu.”

²² Munukanda mahamba jenu akulamika prata ni oru, nikwaambila ngwe Chuma cha luchisa, nikukololoka ngwenu: “Katukenu ko!”

²³ Muze munukakuwa mbuto jenu, Mwene Zambi makanokesa vula ni kuyitatwisa, makanwaha mihuko yinji, ni ngombe jenu maakabwa ni yambu yinji ya kulia.

²⁴ Ngombe ni yimbulu waze akulima minda yenu kumaakalia yuma yibema yakulungisa ni mungwa.

²⁵ Ha tangwa lize hinwakumba yipanga yakukoleka ya akwa kole jenu, ni atu jayo haafwa, yitwetwe ya meya muyikapalumuka ha milundu ni ha mindundena yeswe.

²⁶ Kakweji makabwa ni mitemite ya tangwa, ni tangwa mulikabwa ni mitemite yisuho shimbiali kuhiana. Pangu lialio mulikabwa pangu lia matangwa shimbiali. Chino cheswe muchikabwa muze Mwene Zambi makakasa ni kuwuka yilonda yize aalemekene iye mwene.

Zambi makamwesa Asuria lamba

²⁷ Ndundo ja Mwene Zambi ni uhenya wenyi yinamoneka kusuku. Kahia ni mwishi yinalweze ufwatulo wenyi. Muze akuhanjika maliji jenyi kaakusasaminya ngwe kahia.

²⁸ Kakutuma fuji kulutwe lienyi ngwe sanga lia meya lize hakuchiza yuma yeswe. Kakushiha mavungu ni kuhwisa manyonga jo abi.

²⁹ Alioze yenu atu ja Zambi munukawahilila ni kwimba ngwe chize nwakulinga ha tangwa lia chimwe chiwanyino. Munukabwa ni chiseke ngwe chiseke cha waze akwenda nikwimba miaso ya ndembo muze anayi ku zuwo lia Mwene Zambi, kafunga ka Aisraele.

³⁰ Mwene Zambi makevwisa atu eswe liji lienyi lia ulamba ni kusolola tachi ja ufwatulo wenyi. Mukukabwa milengi ya kahia, ni vula munji ni chiwe, ni yijimbi.

³¹ Aasuria maakevwa mwongo mumu ha liji lia Mwene Zambi mumu ha tachi ja lamba lize makaamwesa.

³² Muze Mwene Zambi makalamba Aasuria nawa ni nawa, atu jenyi maakemba ngoma ni tulialia. Zambi iye mwene makalimika ni Aasuria.

³³ Jiko lia kahia alilulikile kulu lia kwochela mwanangana wa Asuria. Lili linene ni lisuku, yilizala ni kunyi. Mwene Zambi makafuza mulengi wa kahia wa kujocha.