Izaya 3 - Mukanda Wa Zambi 1970

Kabinda mu Yerusaleme

¹ Mwene Zambi Mukwa Ndundo Jeswe kanambe kuchiza kuli akwa Yerusaleme ni kuli Ayuda ujikijilo wo weswe. Kanambe kuchiza yakulia yo ni meya jo,

² ni akwa lufuma wo ni tujita two, ni ngaji jo, ni akwa munanyi jo, ni tahi jo, ni makulwana jo,

³ ni miata jo a tujita, ni miata jo akwo, ni akwa kuyula, ni eswe waze akulinga yipupu.

⁴ Mwene Zambi makapwisa ana malunga akwa kuyula jo.

⁵ Atu maakalibinjisa ene ni ene. Akweze keechi kalemesa makulwana jo.

⁶ Tangwa mulikeza lize akwa vungu limwe maakatongola umwe hakachi ko, ni kumwamba ngwo: “Yena unazala mahina, kashika bwako kasongo ketu ha matangwa wano a lamba.”

⁷ Alioze makakumbulula ngwenyi: “Hi yami ko! Chahashile kunukwasa. Chishi ni yakulia hanji mahina. Kanda nungutongola kubwa kasongo kenu!”

⁸ Ewa, akwa Yerusaleme maamona lamba! Ayuda haalimbuka! Mu yeswe yize akulinga ni yize akwamba kaakulimika ni Mwene Zambi, kaakumulelesa.

⁹ Neye makaabatwila mumu ha katonde ko. Kakuvulumuna mwalwa kachi ngwe chize alingile akwa Sodome. Kumaamona lamba; haanalikokela lio ayo ene.

¹⁰ Akwa ululi maakawahilila, yuma yo yeswe muyiwaha. Kumaakawahilila ni yuma yeswe yize haayuka.

¹¹ Alioze yingulungulu maakamona lamba; yuma yeswe yize alingilile akwo, akwo no maakalingila yo.

¹² Akwa kusondamisa mbongo kaakubinjisa atu jami, ni akwa kusweka mbongo jo kaakweeya ubite wo. Atu jami, miata jenu kaakunwonga. Kashika kunwanyingikine yize munulinga.

Mwene Zambi kakubatwila atu jenyi

¹³ Mwene Zambi haheta ku chisopelo, halilulika kulu kubatwila atu jenyi.

¹⁴ Mwene Zambi kananeha makulwana ni miata ja atu jenyi ku chisopelo. Ngwenyi: “Hinwatukula minda ya vinyu, mazuwo jenu kaanazala ni yuma yize nwabubile kuli yiswale.

¹⁵ Mumu yika nunakafwenya atu jami ni kubinjisa yiswale? Chenacho anambe Mwene Zambi Mukwa Ndundo Jeswe.”

Kulengumuka cha mapwo a mu Yerusaleme

¹⁶ Mwene Zambi kanambe ngwenyi: “Talenu kulengumuka cha mapwo a mu Yerusaleme! Kaanende ni kunumina mazulu jo. Matangwa eswe kutala cho kuchikula, kwenda cho kuchichangila, ni kuzozomona kota jo.

¹⁷ Kashika mungukaamwesa lamba, ni kwatewula tuwewe, nikweevwisa sonyi.”

¹⁸ Tangwa mulikeza lize Mwene Zambi makachiza yuma yeswe yize mapwo a mu Yerusaleme akulengumuka nayo: yijingo, ni yibenya ya ha mitwe, ni malenge a mu kota,

¹⁹ ni mikosa ya ku moko, ni Wanda,

²⁰ ni yifulu, ni masaku,

²¹ ni tuzeya a ku minwe ni a ha mazulu,

²² ni mahina jo eswe abema, ni alubula, ni tuzaku, ni ngonga,

²³ ni mahina a muchima, ni yitambala, ni mahina a swaa, ni manda asuku asuku waze akuzala ku mitwe.

²⁴ Mapwo waze maakafutama; keechi kabwa nawa ni maji a vumba libema. Ha miya yibema muhasalakana mihipu. Ha kambu ja kuyinda muhasalakana kawewe; ha mahina abema muhasalakana mwanji. Ubeme wo muwalumuka sonyi.

²⁵ Malunga jenu a tachi kuhiana maakafwa mu jita.

²⁶ Ku yajilo ya limbo atu maakalila ni kulishimwoka, ni lie limbo mulikabwa ngwe pwo yoze unatwama hashi uselesele.