Izaya 29 - Mukanda Wa Zambi 1970

Kwonona cha Yerusaleme

¹ Yerusaleme chilumbilo cha Zambi, lamba lie! Limbo lize atwamine David, lamba lie! Mukubalika mwaka umuwika hanji yaali ni yiwanyino yayo,

² mba Mwene Zambi makamwesa lamba limbo lize anavuluka ngwo: “Chilumbilo cha Zambi.” Atu maakalila ni kulishimwoka, limbo heswe mulikalifwa ni chilumbilo chize hichachila cheswe ni manyinga.

³ Zambi makalimika ni lie limbo, makasa no jita.

⁴ Yerusaleme makabwa ngwe mujimu yoze unambe kuhanjika kushi lia mavu, kanyingenyinge.

⁵ Yerusaleme, tundaka eswe waze te analimika ni yena makaafuza ngwe fufuta, ni tujita two yiswii makaahehula ngwe yizungu. Chakutungumuna susumuku

⁶ Mwene Zambi Mukwa Ndundo Jeswe makakulamwina ni tungonga ni kunyika cha hashi, makatuma yijimbi ni kahia kakulalisa.

⁷ Mba tujita eswe a mavungu waze te analimika ni limbo lia chilumbilo cha Zambi, ni yitwa yo yeswe ya jita muyikajimuka ngwe chilota, ngwe Usolwelo wa ha ufuku.

⁸ Mavungu eswe waze te analimika ni Yerusaleme kumaakabwa ngwe mutu yoze unafu zala, malota ngwenyi hinalia, alioze muze mahinduka hindu kanayivu; hanji ngwe yoze Unevu pwila, malota ngwenyi hinanwa, alioze muze mahinduka hindu kanayivu.

Atu yaalelesa kukanyamisa cha mukwa munanyi

⁹ Komokenu, nulishimwoke! Fukenu ku meso, nupupute! Zengewenu alioze hi ni vinyu ko! Piepietenu alioze hi ni kunwa chisasu ko!

¹⁰ Mwene Zambi hanupwisa akwa kufungunuka tulo anji. Akwa munanyi chaatamba kubwa meso ja atu, alioze Zambi hanaapupuchisa.

¹¹ Ulumbunwiso wa Usolwelo weswe makausweka kuli yenu; muukabwa ngwe mukanda wa kukasa. Muze muuhana kuli umwe mutu yoze te maahasa kuutanga, iye mamba ngwenyi: “Chahashile kuutanga mumu uli wakukasa.”

¹² Nyi wauhana kuli yoze kanyingikine kutanga ni kumwamba ngwe: “Utange kama.” Iye makumbulula ngwenyi: “Chanyingikine kutanga.”

¹³ Mwene Zambi hanambe ngwenyi: “Atu wano kaakwamba ngwo kaakunguwayila, alioze maliji jo kaali amokomoko, mumu mbunge jo jili kusuku ni yami. Uwayilo wo kuushi nichimwe shina Shimbi ni ndako ya atu, yize haanalilongesa.

¹⁴ Kashika mungukaalamba chakutungumuna nawa ni nawa. Akwa mana maakalumuka yihepuke, mana jo eswe maakabwa amokomoko.”

Kusa mbunge ku yize muyiza ho

¹⁵ Lamba kuli atu waze akuswekela Mwene Zambi manyonga jo! Kaakulingila yuma yo ku tenga nikunyonga ngwo niumwe keeshi kwamona ni keeshi kunyingika yize akulinga.

¹⁶ Kaakwalumuna yuma yeswe. Ulemu wahiana uka, uma hanji tengi? Kuma, Chuma chize mutu halinga muchihasa kumwamba ngwenyi: “Kuwangulingile”, nyi? Hanji kumwamba ngwenyi: “Kuwanyingikine chize unalingi”, nyi?

¹⁷ Kaakuta chishima ngwo: “Kwasala hakepe mba usaki muwalumuka munda, ni munda muwalumuka usaki.”

¹⁸ Ha tangwa lize afwa matwi kumaakevwa kutanga cha mukanda, ni tupuputa waze te atwama mu milima meso jo maakalaula.

¹⁹ Yiswale ni yihomboloji kumaakawahilila nawa ni uwahililo uze Mwene Zambi, Munangi wa Israele, akuhana.

²⁰ Mulikabwa songo lia atu waze akumwesa akwo lamba ni waze akulelesa Zambi. Yingulungulu eswe makoonona.

²¹ Zambi makonona atu waze akulamikiza akwo, ni waze akukanjisa kumwesa yingulungulu lamba, ni waze akuhanjika mahuza hanga akwa kusamba keechi kwabatwila ni ululi.

²² Kashika haliabwila Mwene Zambi, Zambi ya Israele, yoze walamwinyine Abrahama mu lamba, kanambe ngwenyi: “Atu jami, kunuchi kevwa sonyi nawa, ni meso jenu keechi kahetama nawa.

²³ Muze munukamona ana waze mungukanwaha, mba munukanyingika ngwenu, yami nguli Zambi Munangi ya Israele. Mba munukangulemesa ni kulishimwoka.

²⁴ Yihepuke maakalilongesa yinyingi, ni waze akulinyenyeta matangwa eswe, maakevwa chiseke ha kutambula mana.”