Izaya 28 - Mukanda Wa Zambi 1970

Zambi yakanyamisa Israele wanangana wa ku norde

¹ Wanangana wa Israele, lamba liawo! Uhenya wawo uli ngwe yipangula ya yitemo yize yinatemuka ku mitwe ya tetekeli jo yizenge. Haalisa maji a vumba libema ku mitwe yo ya kulengumuka, alioze kaanabombo mu fufuta, haazengewa.

² Mwene Zambi kali ni umwe chitakame yoze unalulika ase no jita. Makeza ngwe vula munji wa chiwe, ngwe sanga lia meya lia tachi lize mulimwangana ha chifuchi cheswe.

³ Mba e tetekeli yizengi makaaliachila hashi.

⁴ Uhenya wa tetekeli waze yizengi muukajimuka ngwe mihuko yitangu ya mikuyu, yize atu akuhela ni kulia muze hiyahia.

⁵ Tangwa mulikeza lize Mwene Zambi Mukwa Ndundo Jeswe makabwa ngwe chipangula cha uhenya cha yitemo hali masalila ja atu jenyi.

⁶ Makasa manyonga a ululi mu mbunge ja ngaji, makatakamisa tufunga twa yajilo ya limbo.

Izaya ni akwa munanyi yizengi a mu Yuda

⁷ Chibwe akwa munanyi ni mahako kaakupiepieta mumu haazengewa. Kaakunwa vinyu yisasu yinji, kashika akutalinga ni kubinda. Akwa munanyi kaakuzengewa kuhiana, kaahashile kunyingika ulumbunwiso wa Usolwelo uze Zambi akuhana, ni mahako kaakuzengewa kuhiana, kaahashile kubatula milonga yize atu akwanehena.

⁸ Yisajilo yakuzala ha mesa kuze akutwama, kuheshi kubwa habema.

⁹ Kaakungunyenyeta. Kaakwamba ngwo: “Mutu yono kananyongo kulongesa iya? Iya unazange maliji jenyi? Shina lume ana akemba waze haasumuka!

¹⁰ Kanasoneka lume kutulongesa chisona ha chisona, mukala ha mukala, kuno hakehe ni kuze hakehe.”

¹¹ Nyi kunusolo kungubanjika, Zambi makatuma tundaka anulongese ni liji lio likalu.

¹² Kanakamba kunulembejeka ni kunwaha uhwimino, alioze te kunusolo kubanjika.

¹³ Kashika Mwene Zambi makanulongesa chisona ha chisona, mukala ha mukala, kuno hakehe ni kuze hakehe. Hohene munukatalinga ni kulimbwoka. Maakanulemeka. Maakanukwata, maakanupwisa funge.

Liwe lia Zione lia ha mbango

¹⁴ Haliabwila yenu akwa kulenya waze nwayula muno mu Yerusaleme, banjikenu chize anambe Mwene Zambi.

¹⁵ Yenu nwakulisamba ngwenu: “Hitwakolesa Usendo ni kufwa, hitwalitesa ni muma lia afu.” Nunanyongo ngwenu, kunuchi kufwa mumu nwakushachila ha kwonga chenu ni mahuza jenu ha kunufunga.

¹⁶ Mwene Zambi kanambe ngwenyi: “Ngunase fundamentu ya tachi mu Zione. Ngunase mu ye fundamentu liwe lia tachi ha mbango, haze hanasonewa maliji wano ngwo: ‘Yoze majikiza mu ufulielo malihumikiza.’

¹⁷ Ululi muubwa ngwe lwoji wa kweseka nenyi kusuhwa cha fundamentu, ni kutuwika cha mbunge ngwe lwoji wa kweseka nenyi kululama chayo.” Vula wa chiwe makachiza mahuza jenu eswe ni yuma yize yeswe nwakulumbika ho, ni sanga lia meya mulikachiza uhwimino wenu.

¹⁸ Usendo uze nwakolesele ni kufwa ni kulitesa chenu ni muma lia afu kuyichi kakola. Muze lamba mulikanuheta, mulikanuhiana kwoka.

¹⁹ Mulikanuzemukina nawa ni nawa, ha chichamene ni chichamene. Mulikanubwila ha mwalwa ni ufuku. Sango jeswe jaha ja Zambi mujikanuvwisa mwongo!

²⁰ Muchikanubwila ngwe mutu mu chishima, yoze unabombo ha muhela wa Chipinji, kahashile kutandala, ni blankete yihi, kahashile kulifuka yo.

²¹ Mwene Zambi makasa jita ngwe chize alingile ha mulundu wa Perazime ni mu chikulo cha Gibeone akamanunune milimo yenyi, milimo ya kukomwesa.

²² Kashika kanda nulelesa kukanyamisa chami! Nyi nwachilinga muchikabwa chikalu kuhiana hali yenu. Hinevwa chize Mwene Zambi Mukwa Ndundo Jeswe habatula enyeke chifuchi cheswe.

Mana ja Zambi

²³ Ivwenu chize ngunahanjika, banjikenu kanawa chize ngunanwambe.

²⁴ Muze njimi akulima akuwe mbuto, kakulima wika, nyi? Kakuchibula ni kulima matangwa eswe, nyi?

²⁵ Ka, muze halulieka e mavu, kakutumba mo mbuto yikepe ya vumba, ndila ni nonge. Kakutumba tiriku ni masangu mu mikala, ni mbuto jikwo ku sesa lia minda.

²⁶ Kanyingika chize malinga milimo yenyi, mumu Zambi hanamulongesa.

²⁷ Keshi kwanda mbulo ha kweta nayo ndila ni nonge alioze kakwanda mitondo yize yilelu azungule nayo.

²⁸ Mbuto ya tiriku keshi kuyizungula kuhiana. Njimi kananyingika chize akuyizungula ni kwenda ho ni temba, kuyishi kufwenyoka.

²⁹ Mana eswe kaakwiza kuli Mwene Zambi Mukwa Ndundo Jeswe. Kululieka cha kuli Zambi chikwete mana, kuchakulinduluka!