Izaya 27 - Mukanda Wa Zambi 1970

¹ Ha tangwa lize Mwene Zambi makanda mukwale wenyi wa tachi ni kushiha kashitu munene Luchazangombe, mwe dragau yoze wakulihiza, makashiha nawa kashitu yoze munene, watwama mu kalunga lwiji.

² Ha tangwa lize Mwene Zambi makamba hakutwala ku munda wenyi Ubema wa vinyu ngwenyi:

³ “Nakuufunga ni kuuhinjila meya matangwa eswe. Nakuufunga ufuku ni mwalwa hanga mutu niumwe kahashile kuulinga chibi.

⁴ Chishi kuvwila munda wami wa vinyu wuli. Nyi kuli mikalale hanji mingonga ya kulimika nayo, kachi te mungulimika nayo ni kuyocha.

⁵ Alioze nyi akwa kole ja atu jami kaanazange ngwafunge, alinge uwanyino ni yami, alikunde ni yami.”

⁶ Ha matangwa a kulutwe Aisraele, vungu lia Yakoba, maakatanda miji ngwe mitondo, maakabwa ni yitemo, maakema mihuko. Hashi muhakazala ni mihuko yo.

⁷ Mwene Zambi kamwesene ko Aisraele lamba ngwe akwa kole jo, kukwafwile malunga anji.

⁸ Mwene Zambi hanamwesa atu jenyi lamba ni kwatuma mu undungo. Yaahanga ni kangonga wa tachi wa ku chivumbuko.

⁹ Alioze Aisraele mungwakonekena milonga yo shina muze haachiza mawe a yilumbilo ya mavungu ni kwafwenyafwenya ngwe pemba, ni muze haabuzula yilumbilo ya kwochela yuma ya vumba ni haachiza yizulie ya zambi wa pwo Ashera.

¹⁰ Limbo lia kukoleka hiliabwa yikulu. Kulili liahululu ngwe puya yize kuyishi kwendela atu. Yili ulilo wa ngombe, kwenako maahasa kuhuhujola yakulia.

¹¹ Mitango ya mitondo hiyoma, hiyamakwoka, mapwo haanayichaya kunyi. Atu keevwile ko nichimwe, kashika Zambi, Tangi yo, kechi keevwila keke hanji kwalweza utu.

¹² Ha tangwa lize, chize ku lwiji Ufrateze ndoo ku njiza ya chifuchi cha Egiptu, Mwene Zambi makachiza atu jenyi umuwika umuwika ngwe chize mutu akusakula mbuto ku yiswaswa.

¹³ Ha tangwa lize maakahumuna chitavwi ni kutambika Aisraele eswe waze ali mu undungo mu Asuria ni mu Egiptu. Kumaakeza ni kuwayila Mwene Zambi mu Yerusaleme, ha mulundu wa chijila.