Izaya 26 - Mukanda Wa Zambi 1970

Zambi makwasa atu jenyi kukumba

¹ Tangwa mulikeza lize atu maakembamba mwaso uno mu chifuchi cha Yuda ngwo: Limbo lietu lili lia tachi! Zambi iye mwene kakufunga chipanga chalio!

² Azululenu yajilo ya limbo hanga vungu lia ululi anjile, vungu lize atu jalio kaakulinga kanawa.

³ Mwene Zambi yena wakuhana uhwimino wamwenemwene kuli waze akusa manyonga jo hali yena, ni akushachila hali yena.

⁴ Shachilenu hali Mwene Zambi ndoo ku miaka yeswe, kumatufunga matangwa eswe.

⁵ Hanakehesa akwa kulengumuka; hanabuzula limbo lia tachi muze te atwama, hanabuzwila yipanga yalio hashi.

⁶ Atu waze akwa limbo abinjishile hatangu haliabwila kaakuliliataliata.

⁷ Mwene Zambi kuwakululamisa jila ya akwa ululi, jila yo yilulame.

⁸ Twakulinga yize unazange ni kusa mbunge kuli yena; yena uli yeswe yize twakuzanga.

⁹ Ha ufuku nakukushinginyeka ni mbunge yami yeswe; muze muukabatwila hashi ni atu jaho, eswe kumaakalilongesa chize ubwa ululi.

¹⁰ Chibwe yena wakulweza utu kuli yingulungulu, hindu keeshi kulilongesa kulinga kanawa. Chibwe muno mu chifuchi cha akwa ululi kaakulinga yibi: kaakulituna unene we.

¹¹ Akwa kole je kaasolo kunyingika ngwo, yena muukaamwesa lamba. Mwene Zambi, evwise kama sonyi, amwese lamba, amwese lamba lize hiunaalulikila. Alweze chize wakuzanga atu je.

¹² Mwene Zambi, muukatuwahisa, Yuma yeswe yize twakuyuka kuli yena yakukatuka.

¹³ Mwene Zambi, Zambi yetu, atu akwo haanatuyulu, alioze yena wika uli Mwene Zambi yetu.

¹⁴ Ayo haafwa kulu, keechi kubwa nawa ni mwono, habwa yizulie, kuyichi kuhinduka nawa, mumu hiwaamwesa lamba, hiwoonona. Niumwe meewuluka nawa nichimwe.

¹⁵ Mwene Zambi, hiwatatwisa vungu lietu, chifuchi hiwachitohwesa sali heswe; ha chino atu kaakukulemesa.

¹⁶ Mwene Zambi, hiunamwesa atu je lamba, mu lamba lio haanaliumbu kuli yena.

¹⁷ Mwene Zambi, kuli yena tunatete, ngwe chize umwe mama unatete muze anaseme.

¹⁸ Twabwile ni misongo, twabinjile, alioze kutwasemene nichimwe. Kutwakumbile mu chifuchi chetu, kutwamanunwine Chuma nichimwe.

¹⁹ Atu jetu waze haanafu kumaakahinduka nawa! Mijimba yo muyikahinduka nawa. Atu eswe waze akubomba mu mafuka jo maakahinduka ni kwimba ni chiseke. Ngwe chize mume wakuhuzulula hashi, Chenacho nawa Mwene Zambi makahindwisa waze haanafu kulu.

Zambi makabatwila atu

²⁰ Njilenu mu mazuwo jenu, yenu atu jami, ajilenu yajilo ku manyima jenu. Nuswame kamwe kashimbu ndoo ufwatulo wa Zambi muuhwa.

²¹ Mwene Zambi mwilu makeza akamwese akwa hashi lamba mumu ha milonga yo. Hashi muhakasolola atu waze ashihile ku tenga, kuhechi kaasweka nawa.