Izaya 25 - Mukanda Wa Zambi 1970

Mwaso: chichimiekenu Mwene Zambi

¹ Mwene Zambi, yena uli Zambi yami; mungukulemesa ni kuchichimieka jina lie. Hiunalingi yuma ya kukomwesa; yuma yize wanyongene ku shakulu, yeswe hiunayimanununa kanawa.

² Membo hiwaalumuna yikulu hiwabuzula yipanga yo ya kukoleka. Mazuwo ja wanangana waze akwa kole jetu haanatungu keechi kaatungulula nawa nichimwe.

³ Mavungu a tachi maakakuchichimieka, mavungu yiswii a mu membo maakakuvwila woma.

⁴ Yiswale ni atu alelu haachinyina kuli yena, haawana ko uhwimino ha matangwa a lamba. Yena uli chiswamo cho ha tangwa lia chijimbi, ni chizulie cho mu chivukuminya cha tangwa. Yiswii kaakulimika ni yetu ngwe kangonga wa tachi ha chipanga chakukoleka,

⁵ ngwe chivukuminya mu chifuchi chumu. Alioze yena Mwene Zambi hiunaholesa akwa kole jetu, wakuholesa kukololoka cha yiswii, ngwe chize lelwa liakutulula mwalwa unji.

Zambi yalulika chiwanyino

⁶ Ha mulundu uno wa Zione Mwene Zambi Mukwa Ndundo Jeswe makalulika ho chiwanyino mumu hali mavungu eswe a hashi, chiwanyino cha yakulia yinji ni cha vinyu yibema.

⁷ Ha mulundu uno maafukula ho chifuko cha chinyengo chize afukile hali mavungu eswe.

⁸ Mwene Zambi makakumba kufwa ndoo ku miaka yeswe! Makakusumuna masoji ku meso ja atu eswe ni kuchiza sau lize atu jenyi aasawile hashi heswe. Mwene Zambi wachamba!

⁹ Ha tangwa lize atu eswe maakamba ngwo: “Iye kali Zambi yetu! Twakushachila hali iye, neye hatulamwina. Iye kali Mwene Zambi! Twakushachila hali iye, twakuwahilila ni kulikwiza mumu hatulamwina.”

Zambi makamwesa Amoabe lamba

¹⁰ Mwene Zambi makafunga mulundu wa Zione, alioze akwa kole maakaliataliata Amoabe ngwe chize atu akuliataliata mwambu.

¹¹ Kumaakolola moko jo ngwe chize akulinga mukwa kusana, alioze Mwene Zambi makaalelesa, moko jo maakalema ni meya.

¹² Makabuzwola yipanga yakukoleka ya Amoabe ni kuyinungwina mu fufuta.