Izaya 24 - Mukanda Wa Zambi 1970

Mwene Zambi makamwesa hashi lamba

¹ Mwene Zambi makenyeka hashi ni kupwisa ho hahululu. Makabinjisa hashi ni kumwanga atu jaho:

² mahako ni atu akwo, ndungo ni akako, akwa kulanda ni akwa kulanjisa, mukwa mukuli ni mwenya mukuli, pichi ni yiswale.

³ Hashi kumaakenyeka ho ni kupwisa ho hahululu. Mwene Zambi hachamba, kumuchilingiwa.

⁴ Hashi hihalela, hihoma, hihahonga; yeswe yaali lilu ni hashi hiyabola.

⁵ Atu haanabihisa hashi mumu haakolema Shimbi ja Zambi ni haashiha Usendo wa miaka yeswe uze Zambi akolesele no.

⁶ Kashika Mwene Zambi hashinga hashi. Atu jaho kaanamono lamba mumu ha yize haanalingi. Akepe wika maasala ho.

⁷ Mitango ya vinyu yinalele, ni vinyu hiyasala yikepe. Atu eswe waze awahililile hatangu, haliabwila kaananenganyana.

⁸ Miaso ya chiseke ya tulialia two ni ngoma hiyahola.

⁹ Atu haalitwamina kwimba ni kunwa vinyu, kuyishi kuyema nawa.

¹⁰ Lamba linji lili mu limbo. Atu kaakulikashila mu mazuwo jo hanga abwe ni uhwimino.

¹¹ Atu mu majila kaanalili mumu anahono vinyu. Uwahililo hiwasula; kulikwiza cha hashi hichasula.

¹² Limbo haalienyeka yajilo yalio, hiyamakwoka.

¹³ Chenacho muchikabwa ku mavungu a hashi heswe. Muchikabwa ngwe ku songo lia kuhela mbuto, muze haalukumuna mawundu eswe a olive, haahela mihuko yeswe ya vinyu.

¹⁴ Atu waze maakasala ni mwono maakawahilila ni kwimbamba. Atu a ku chitokelo maakambulula unene wa Mwene Zambi,

¹⁵ ni waze ali ku chivumbuko maakamuchichimieka, ni waze akutwama ku mbumbulu ya kalunga lwiji maakahalisa Mwene Zambi, Zambi ya Aisraele.

¹⁶ Ku mbango jeswe ja hashi mutukevwa miaso ya uhaliso ya Aisraele, vungu lia ululi. Alioze hakutwala kuli yami chasele ko mbunge! Ngunalinyenge! Lamba linayi lume kulutwe, mumu akwa mafwefwe kaakulikoleza.

¹⁷ Atu eswe ngubanjikenu! Mwongo, ni mawumbu, ni makambwila yinanutwaminyina.

¹⁸ Mutu yoze makeseka kuchina mwongo, makaholokela mu wumbu, yoze makachina wumbu, makafwa mu muheto. Vula munji makanoka, fundamentu ya hashi muyikanyikumuka.

¹⁹ Hashi muhabulika ni kubuzuka, muhanekuka.

²⁰ Hashi muhapiepieta ngwe mutu yoze hazengewa ni kutekenga ngwe chikulika mu chijimbi. Akwa hashi haalimbuka ni milonga yo yinji, keechi kahinduka nawa.

²¹ Tangwa mulikeza lize Mwene Zambi makamwesa lamba akwa ndundo a kwilu ni akwa kuyula a hano hashi.

²² Zambi makaakungila hamuwika mu wumbu ngwe funge. Makaajilila mu zuwo lia lamba ndoo tangwa lia lamba lio mulikaheta.

²³ Henaho kakweji makalaa, tangwa nelio kulichi katwa mwalwa, mumu Mwene Zambi Mukwa Ndundo Jeswe makabwa mwanangana. Ha mulundu wa Zione mu Yerusaleme, makayula; miata ja atu maakamona uhenya wenyi.